ლეგიონის უქმეები: ქართული ტური სლოვაკეთში

ამ უქმეებზე სამი ქართული გოლი გავიდა და 19 ქართველ ლეგიონერს სხვადასხვა მიზეზის გამო არ უთამაშია.

გერმანია

II ბუნდესლიგა. აკაკი გოგია ყოფილ გუნდს დაუპირისპირდა - "უნიონმა" ბერლინში "დინამო" მიიღო და 0:1 დამარცხდა, გოგიამ მე-80 წუთამდე ითამაშა. გოგიას გუნდმა ბოლო 4 მატჩიდან 3 წააგო, 1 ფრედ დაასრულა და ლიდერთა ჯგუფს ჩამორჩა.

ესპანეთი

ლა ლიგა 2. გიორგი პაპუნაშვილის (90 წ.) "სარაგოსა" შინ 0:2 დამარცხდა ერთ-ერთ ლიდერ "კადისთან". არაგონელებმა თამაში 9 კაცის ამარა ჩაამთავრეს, ჩვენებურმა ყვითელი ბარათი იკმარა. ოთარ კაკაბაძემ შეუცვლელად ითამაშა, ხოლო მისმა "ჟიმნასტიკმა" 2:1 მოუგო "სევილიას" დუბლებს.

იტალია
ლეგა პრო. რომან ჭანტურიას (90 წ.) "პრატო" შინ 0:1 დამარცხდა "პონტედერასთან". "პრატო" 11 ქულით ბოლო ადგილზეა.

ჰოლანდია
ერედივიზიე. როტერდამში დიდთოვლობამ გურამ კაშიას "ვიტესის" თამაში "სპარტასთან" გადადო.

პოლონეთი
ექსტრაკლასა. ნიკა კაჭარავას (90 წ.) "კორონა" შინ "არკასთან" 0:3 დამარცხდა. აუტსაიდერი "პოგონი" შინ "ზაგლებიეს" დაუზავდა - 3:3. მასპინძელთა რიგებში შეუცვლელად გაისარჯა ლაშა დვალი.

დანია
სუპერლიგა. ქართველთა "სილკებორგმა" სტუმრად 2:1 მოუგო "ოდენსეს". ამ მატჩში 90-ე წუთამდე ითამაშა დავით სხირტლაძემ, რომელსაც, წინა მატჩებისგან განსხვავებით, თავი აღარ გამოუჩენია.

ავსტრია
ბუნდესლიგა. ვენის "რაპიდმა" შინ ვერ მოუგო "მატერსბურგს" - 2:2. ის კი არა, გიორგი ქვილითაიას გამოსვლამდე (65-ე წუთი) 0:2-ს აგებდა.

სლოვაკეთი

ფორტუნა ლიგა. სლოვაკეთში ქართული ტური გამოვიდა - ვახტანგ ჭანტურიშვილმა (90 წ.) "ტრნავას" "პრეშოვთან" 1:0 მოაგებინა, მან თამაშის დასაწყისში გაიტანა გამარჯვების გოლი, ხოლო გიორგი ბერიძემ "ტრენჩინის" რიგებში გაიბრწყინა. ქართველის გუნდმა მეორეადგილოსანი "ჟილინა" 5:2 დაამარცხა. ქართველის ანგარიშზე გოლი და საგოლე პასია.

რუსეთი
პრემიერლიგა. "ურალის" სასტარტო შემადგენლობას დაუბრუნდა გიორგი ჭანტურია, რომელმაც მე-80 წუთამდე ითამაშა ტულის "არსენალთან" 1:1 დასრულებულ დაპირისპირებაში. გიორგი ლორია ვერას გახდა "დინამოს" შემტევებთან და მისი "ანჟი" მოსკოვში 0:2 დამარცხდა და ბოლოსწინა ადგილზეა.

უკრაინა
პრემიერლიგა. სანდრო კობახიძე ტოპფორმაშია, მან კვლავ გაიტანა - "ვორსკლამ" დონეცკის "ოლიმპიკს" 4:1 მოუგო, მე-10 წუთზე ანგარიში სწორედ ქართველმა გახსნა, რომელმაც შეუცვლელად ითამაშა. დონეცკის "შახტარი" მოულოდნელად დამარცხდა "ზორიასთან" - 1:2.

დავით ხოჭოლავა წაგებულთა რიგებში 89-ე წუთზე გამოჩნდა. "შახტარი" იმ დროისთვის 1:0-ს იგებდა, მაგრამ 8 კაცის ამარა დარჩა და ორი გოლი გაუშვა.

უნგრეთი
OთP. ქართველთა "ბალმაზივაროში" "მეზოკოვეჟდს" შინ 0:0 დაუზავდა. ბაჩანა არაბულმა 81-ე წუთამდე ითამაშა, ირაკლი მაისურაძემ - სრულად.

აზერბაიჯანი
პრემიერლიგა. თამაზ ცერცვაძის (90 წ.) "საბაილი" შინ ჩემპიონ "ყარაბაღთან" 0:2 დამარცხდა.

1294
მკითხველის კომენტარები / 0 /
მსგავსი ამბები
რუბრიკის სხვა სიახლეები
;