ლეგიონის უქმეები: ხუთი ქართული გოლი [VIDEO]

ამ უქმეებზე ქართული გოლები ვიხილეთ გერმანიაში, პორტუგალიაში, უნგრეთში, დანიაში, სლოვაკეთში...

ესპანეთი. ლა ლიგა 1|2|3.

იშვიათი ფაქტი დაფიქსირდა სევილიაში, სადაც "სევილია ატლეტიკო" 2:2 დაუზავდა "სარაგოსას". მეორე ტაიმში მინდორზე მასპინძელთა და სტუმართა რიგებში ლამის ერთდროულად ორი ქართველი შევიდა სათამაშოდ. ჯერ არაგონელი გიორგი პაპუნაშვილი გამოვიდა და რამდენიმე წამში ანდალუსიელი გიორგი აბურჯანიაც გამოჩნდა. სტუმრებმა ამის მერე გადაარჩინეს ქულა.

ოთარ კაკაბაძემ შეუცვლელად ითამაშა, მაგრამ ვერაფერი უშველა "ჟიმნასტიკს", რომელიც შინ 0:3 დამარცხდა "ალკორკონთან".

გერმანია. II ბუნდესლიგა.

არა გვგონია, რომ აკაკი გოგიაზე უკეთესი ბევრი ლეგიონერი გვყავდეს. არადა, სამწუხაროა, რომ მას ეს სტატუსი მხოლოდ მომავლის იმედით "მივანიჭეთ", სფფ-მ ვერაფრით შეძლო მისი "გაქართველება", ფეხბურთელის მიერ არაერთხელ დაფიქსირებული სურვილის მიუხედავად. გოგიას "უნიონმა" 3:1 მოუგო "ფიურტს". ჩვენებურმა კი მარჯვენა შემტევის პოზიციაზე ბრწყინვალედ ითამაშა. ჯერ თანაგუნდელს გაატანინა, შემდეგ კი შემობრუნებით, ცაციით კარგად "ჩაახვია" ბურთი სტუმართა კარში.

ჰოლანდია. ერედივიზიე.

გურამ კაშიას "ვიტესი" ევროთასებისგან განსხვავებით, შინაურ პირველობაზე ბრწყინვალედ ასპარეზობს (მე-3 ადგილზეა). ამ ტურში "ვიტესმა" სტუმრად 4:0 მოუგო "ჰეერენვეენს", ქართველმა კაპიტანმა შეუცვლელად ითამაშა.

პორტუგალია. სეგუნდა.

ავთო ებრალიძემ "ვიზეუს" სტუმრად "ფამალიკაოსთან" 1:0 მოაგებინა, ქართველმა მატჩის 34-ე წუთზე გაიტანა გამარჯვების გოლი, რომელიც მისთვის მეორეა ჩემპიონატში. "ვიზეუ" ტურნირის ერთპიროვნული ლიდერია.

პოლონეთი. ექსტრაკლასა. 

ნიკა კაჭარავას "კორონა" სტუმრად "გურნიკს" დაუზავდა. 59-ე წუთამდე (მაშინ ჩაერთო თამაშში ქართველი) "კორონა" 1:3 მარცხდებოდა, მაგრამ ლიდერთან ქულის გადარჩენა შეძლო.

ქართველთა "პოგონი" შინ "ტერმალიცასთან" დამარცხდა. მხოლოდ ლაშა დვალმა ითამაშა, რომელმაც ყვითელი ბარათიც მიიღო.

"არკას" რიგებში გამოჩნდა ლუკა ზარანდია, თუმცა უკვე 93-ე წუთზე, როცა "არკა" "იაგელონიას" 4:1-ს უგებდა, თამაშიც მალევე დასრულდა.

პოლონეთი. I დივიზიონი. 

ლუკა ასათიანმა შეუცვლელად ითამაშა, ხოლო მისმა "სუვალკიმ" შინ 2:2 ითამაშა "დრუტექსთან".

დანია. სუპერლიგა.

ქართველთა "სილკებორგმა" "სონდერისკეს" 1:0 მოუგო. ორივე ჩვენებური სასტარტოში იყო, თუ დავით სხირტლაძემ ბოლომდე ითამაშა, მათე ვაწაძე 69-ე წუთზე გამოცვალეს.

დანია. I დივიზიონი.

ლაშა პარუნაშვილმა "ესბიერგში" პირველი გოლი გაიტანა, მისმა გუნდმა კი "ფრემადი" 5:2 დაამარცხა.

ავსტრია. ბუნდესლიგა.

ვენის დერბიში გიორგი ქვილითაიას "რაპიდმა" სტუმრად მოუგო "აუსტრიას" - 1:0. ქართველი ფორვარდი 66-ე წუთზე გამოცვალეს.

რუმინეთი. ლიგა 1.

აკაკი ხუბუტიას "გაზ მეთანი" შინ 0:2 დამარცხდა "პოლი იაშისთან", რუმინეთის ჩემპიონატის ერთ-ერთი აუტსაიდერის ("გაზ მეთანი" მხოლოდ ძალამიძის "იუვენტუსს" უსწრებს) რიგებში შეუცვლელად ითამაშა ქართველმა მცველმა.

უნგრეთი. OTP ბანკ ლიგა.

ქართველთა "ბალმაზივაროშმა" სტუმრად ერთ-ერთ ლიდერ "ვაშაშს" 2:1 მოუგო და ბოლო ადგილს თავი დააღწია. ბაჩანა არაბულმა 42-ე წუთზე ანგარიში 2:0 გახადა. ჩვენებური 86-ე წუთზე შეცვალეს. სასტარტოში იყო ირაკლი მაისურაძეც (გააფრთხილეს), რომელიც ბოლო წუთზე გამოცვალეს. 23 წლის არაბულმა 12 მატჩში 5 გოლი გაიტანა.

სლოვაკეთი. ფორტუნა ლიგა.

გიორგი ბერიძის "ტრენჩინმა" ზედიზედ მეხუთე მატჩი მოიგო, ამჯერად, სტუმრად დაამარცხა ერთ-ერთი ლიდერი "დუნაისკა სტრედა". ქართველი ლეგიონერი მოედანზე 83-ე წუთამდე იყო, მანამდე კი გააფრთხილეს.

ლიგაში "ტრნავას" შემჩერებელი არ ჩანს, ვახტანგ ჭანტურიშვილის გუნდმა ამჯერად "პოდბრეზოვა" დაამარცხა. ერთი გოლი სწორედ ჩვენებურმა გაიტანა, თუმცა ზოგი წყარო ავტოგოლს უთვლის "პოდბრეზოვას" ფეხბურთელს.

მაკედონია. I ლიგა.

ჯაბა ჯიღაურის (65-ე წუთზე გამოცვალეს) "ვარდარი" სტუმრად "პობედასთან" დამარცხდა - 0:1.

ფინეთი. იუკონენლიგა.

ირაკლი სირბილაძის (77-ე წუთზე შეცვალეს) კპვ შინ 1:1 დაუზავდა ოპს-ს.

კვიპროსი. I დივიზიონი.

გიორგი ილურიძემ შეუცვლელად ითამაშა "ახნასისა" და "ანორთოსისის" მატჩში (1:2). სხვათა შორის, მასპინძელთა ერთადერთი გოლი რუსეთის მოქალაქე ნიკოლოზ ყიფიანის ანგარიშზეა.

რუსეთი. პრემიერლიგა.

გიორგი ნავალოვსკის (90 წუთი) "სკა-ხაბაროვსკი" შინ 2:2 დაუზავდა ჯიმი ტაბიძის "უფას". ნავალოვსკი გააფრთხილეს, ტაბიძე კი განაცხადში არ ყოფილა.

აუტსაიდერმა "ანჟიმ" 3:2 მოუგო ტულის "არსენალს". მასპინძელთა კარში გიორგი ლორია იდგა, სტუმართა შორის 33-ე წუთზე შევიდა გია გრიგალავა.

უკრაინა. პრემიერლიგა.

დიდი გუნდების შეხვედრამდე ერთმანეთში კიევის "დინამოსა" და "შახტარის" დუბლებმა ითამაშეს. მატჩი ამ უკანასკნელებმა 2:0 მოიგეს, გიორგი არაბიძე მე-80 წუთზე გამოცვალეს. მას მომენტი ჰქონდა, მაგრამ თავი არ გამოუჩენია.

ბელარუსი. ვისშაია ლიგა.

გიორგი ქანთარიას "ნემანმა" 3:0 დაამარცხა "გომელი". ქართველმა შეუცვლელად ითამაშა.

ოთარ ჯავაშვილის (90 წ, გააფრთხილეს) "სლავია" სტუმრად მინსკის "დინამოს" დაუზავდა - 0:0.

ლიტვა. A ლიგა.

ლევან მაჭარაშვილის (59-ე წუთზე გამოცვალეს) "შტუმრასი" შინ "უტენისთან" დამარცხდა - 0:3.

კიდევ უფრო დიდი ანგარიშით დამარცხდა ვასიკო ბაჩიაშვილისა და ლევან ჭაფოძის "კაუნო" სტუმრად "ტრაკაისთან" მატჩში - 1:5. ქართველებმა შეუცვლელად ითამაშეს. ქართველთა გუნდები ლიტვის ჩემპიონატის უიმედო აუტსაიდერები არიან.

ლატვია. ვირშლიგა.

ლაშა შერგელაშვილის "რიგასმა" დერბი მოუგო "რიგას" და მეორე ადგილიც ჩამოართვა - 1:0 . ქართველმა მცველმა შეუცვლელად ითამაშა და ყვითელი ბარათი მიიღო.

თამაზ პერტიას "ლიეპაია" შინ 1:1 დაუზავდა "ვენტსპილსს".

ესტონეთი. მეისტრილიგა.

ზაქარია ბეგლარიშვილის "ფლორამ" სტუმრად "ნარვა" 7:0 გაანადგურა და ახლა ნაადრევ ჩემპიონობას მოგებაღა აშორებს. გუნდის ქართველმა ლიდერმა 2 საგოლე პასითა და გაფრთხილებით გამოიჩინა თავი. ზაქარიას ანგარიშზე 16 გოლი და 21 საგოლე პასია.

აზერბაიჯანი. პრემიერლიგა.

ზაურ სვანაძის "ინტერმა" სტუმრად "საბაილთან" 0:1 დათმო, რომლის რიგებშიც სასტარტო შემადგენლობაში იყო თამაზ ცეცხლაძე. სხვათა შორის, სვანაძის გუნდმა უკანასკნელად ითამაშა "ინტერის" სახელით, მალე მას "კეშლიას" დაარქმევენ.

ყაზახეთი. პრემიერლიგა.

ქართველთა "ატირაუ" სტუმრად "კაისართან" დიდი ანგარიშით დამარცხდა - 1:4. ჩვენებურთაგან მხოლოდ უჩა ლობჟანიძემ (შეუცვლელად) ითამაშა.

ანალოგიური ანგარიშით დასრულდა ნიკა კვეკვესკირის (შეუცვლელად ითამაშა) "ტობოლისა" და გოგიტა გოგუას "ოკჟეტპესის" თამაში. ქართული დაპირისპირება არ შედგა, კვეკვესკირს თავი გოლებით არ გამოუჩენია.

უზბეკეთი. ოლიი ლიგა.

"ლოკომოტივმა" სტუმრად 2:0 მოუგო "ყიზილყუმს" და 48 ქულით ლიდერობას იყოფს "ბუნიოდკორთან". გამარჯვებულთა რიგებში სასტარტო შემადგენლობაში იყო კახა მახარაძე.

შოთა არველაძის "ფახთაქორმა" 2:0 მოუგო სტუმრად "ბუხარას".

სამხ. კორეა. ჩელენჯ ლიგა.

ლევან შენგელიას (64-ე წუთზე გამოვიდა "დაეჟეონი" სტუმრად "სეონგნამს" დაუზავდა - 1:1.

აშშ. MLS.

რეგულარული სეზონის ბოლო ტური გაიმართა. ვაკო ყაზაიშვილის (90 წ) "სან ხოსე" შინ "მინესოტა" მასპინძლობდა. გამარჯვების შემთხვევაში და სხვა მატჩებში სასურველი შედეგების გათვალისწინებით, ქართველის გუნდი პლეი ოფში გადიოდა. "სან ხოსემ" დრამატულ მატჩში 3:2 გაიმარჯვა და მიზანს მიაღწია.

არ უთამაშიათ...
* ლევან ელოშვილს ("კაპფენბერგერი", ავსტრია, ერსტელიგა) სტუმრად "ნოიშტადტთან" 2:4 წაგებულ შეხვედრაში.
* შოთა გრიგალაშვილს ("ოლმალიქი", უზბეკეთი) შინ "მაშალთან" 2:1 მოგებულ შეხვედრაში.
* ირაკლი შეყილაძეს ("სპეცია", იტალია, სერია B) შინ "პერუჯასთან (4:2).
* ზურაბ ცისკარიძეს ("ესკილსტუნა", შვედეთი) შინ "ელფსბორგთან (2:3).
* ნიკა ძალამიძეს ("იუვენტუსი", რუმინეთი) შინ "სეპსისთან" (2:1).
* მათე ცინცაძეს ("პოგონი", პოლონეთი).
* გიორგი ჩაკვეტაძეს ("გენტი", ბელგია) სტუმრად "კორტაიკთან" (1:1).
* გიორგი გველესიანს ("ზობ აჰანი", ირანი) შინ "ფარსთან" (0:3).
* ლადო დვალიშვილს ("ატირაუ", ყაზახეთი).
* გოგიტა გოგუას ("ოკჟეტპესი", ყაზახეთი).
* გიორგი ჭანტურიას ("ურალი", რუსეთი) შინ "ახმატთან" 2:0 მოგებულ შეხვედრაში (სათადარიგო).
* ლუკას ჰუფნაგელს ("ნიურნბერგი", გერმანია, II ბუნდესლიგა) შინ "დინამოსთან" 2:1 მოგებულ შეხვედრაში (სათადარიგო).
* ბუდუ ზივზივაძეს ("ესბიერგი", დანია, I დივიზიონი) "ფრემადთან" 5:2 მოგებულ თამაშში.
* რომან ჭანტურიას ("პრატო", იტალია, ლეგა პრო) სტუმრად "პრო პიაჩენცასთან" 2:2 დასრულებულ შეხვედრაში (სათადარიგო).
* ჯაბა ლიპარტიას ("ანჟი", რუსეთი).
* დავით ხოჭოლავას ("შახტარი", უკრაინა) კიევის "დინამოსთან" სტუმრად 0:0 დასრულებულ შეხვედრაში (სათადარიგო).

ტრავმა
* ჯიმი ტაბიძემ ("უფა", რუსეთი) ტრავმა კი მოირჩინა, მაგრამ "სკა-ხაბაროვსკთან" სათამაშოდ არ წაუყვანიათ.
* ჯანო ანანიძე ("სპარტაკი", რუსეთი) - შინ "ამკართან" (0:0).
* ლევან მჭედლიძე ("ემპოლი", იტალია, სერია B) - სტუმრად "ვენეციასთან" (0:1).
* სანდრო კობახიძე ("ვორსკლა", უკრაინა) - შინ "კარპატისთან" (0:1).

დღეს ითამაშებენ
* ვაკო გვილიას ბატე (ბელარუსი) "დნეპრს" ესტუმრება.
* გიორგი მერებაშვილის "პლოცკი" (პოლონეთი) "შლიონსკს" მიიღებს.
* საბა კვირკველიას "ლოკომოტივი" (რუსეთი) თორნიკე ოქრიაშვილის "კრასნოდარს" უმასპინძლებს.
* საბა ლობჟანიძის "რანდერსი" "ოლბორგს" დაუხვდება.
* გიორგი მაკარიძის "მორეირენშე" "ბრაგას" უმასპინძლებს.

(იბეჭდება მცირე ცვლილებით)
ყოველდღიური სპორტული გაზეთი "ლელო"

1607
მკითხველის კომენტარები / 0 /
მსგავსი ამბები
რუბრიკის სხვა სიახლეები
;