ლეგიონი. დავით ზირაქაშვილი საფრანგეთის ელიტურ, პირველ დივიზიონში, მე-11 ტურის, სიმბოლურ ნაკრებშია

საფრანგეთის სარაგბო ჩემპიონატის ელიტურ, პირველ დივიზიონში მე-11 ტურის შემდეგ ორი ლიდერი გამოიკვეთა. მათ შორის ერთ-ერთი ქართველ მორაგბეთა გუნდი "კლერმონია", რომელაც აქამდე რვა შეხვედრაში გაიმარჯვა და დამაჯერებლად უდგას სატურნირო ცხრილს სათავეში.

დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონმა" სტუმრად ითამაშა მიხეილ ნარიაშვილის, ლევან ჩილაჩავას, კონსტანტინე მიქაუტაძისა და გელა აფრასიძის "მონპელიესთან" და 28:23 მოიგო. "ვულკანები" მთელი მატჩის განმავლობაში ფლობდნენ უპირატესობას და მეტოქეს ანგარიშში დაწინაურების საშუალებას არ აძლევდნენ.
ზირაქაშვილი, რომელიც 52-ე წუთზე შეცვალეს, ყოველდღიურმა სარაგბო გაზეთმა "მიდი ოლიმპიკმა" ტურის სიმბოლურ ნაკრებში დაასახელა. ძირითად შემადგენლობაში იყო ნარიაშვილიც, რომელიც 58-ე წუთზე შეცვალეს, ხუთი წუთით მეტი დაჰყო მოედანზე ჩილაჩავამ. ტრავმა მოიშუშა და მოედანს დაუბრუნდა საქართველოს ნაკრების მეორეხაზელი კონსტანტინე მიქაუტაძე, რომელიც თადარიგში იყო და თამაშში 59-ე წუთიდან ჩაერთო.
ქართველ მორაგბეთა გუნდებიდან პლეი ოფისთვის ბრძოლას "რასინი", "ბორდო" და "სტად ფრანსე" განაგრძობენ. ვასილ კაკოვინისა და გურამ გოგიჩაშვილის "რასინგმა" სტუმრად წააგო "ლა როშელთან" - 11:16. კაკოვინი თამაშში მე-60 წუთიდან ჩაერთო.
ბექა გორგაძის, ლაშა ტაბიძისა და ლექსო ყაულაშვილის "ბორდომ" სტუმრად დაამარცხა აუტსაიდერი "პერპინიანი" - 22:11. გორგაძე თამაშში 56-ე წუთიდან ჩაერთო.
კარგი სტარტის შემდეგ ოდნავ უკლო თამაშს გიორგი მელიქიძის "სტად ფრანსემ", რომელმაც დიდი ანგარიშით წააგო სტუმრად "ტულუზთან" - 20:49. მელიქიძე დაშავდა და 68-ე წუთზე შეცვალეს.
ოდნავ გამოასწორა სატურნირო მდგომარეობა მამუკა გორგოძისა და ბადრი ალხაზაშვილის "ტულონმა", რომელმაც შინ მოუგო ბექა გიგაშვილისა და დავით ქუბრიაშვილის "გრენობლს" - 22:3. ამ მარცხის შემდეგ "ალპელები" სატურნირო ცხრილში ბოლოსწინა ადგილზე დაეშვნენ.
გორგოძე გაფართოებულ შემადგენლობაში იყო, მაგრამ სამატჩო განაცხადში არ შეიყვანეს, გიგაშვილი 56-ე წუთზე შეცვალეს, ქუბრიაშვილი და ალხაზაშვილი განაცხადში არ იყვნენ.
თამაზ მჭედლიძისა და გიორგი თეთრაშვილის "აჟენმა" მოულოდნელად სტუმრად მოუგო საფრანგეთის მოქმედ ჩემპიონ "კასტრს" - 16:13. თეთრაშვილი თამაშში 37-ე წუთიდან ჩაერთო, მჭედლიძემ ბოლო ათი წუთი ითამაშა.
I დივიზიონი
XI ტური
მონპელიე-კლერმონი 23:28, კასტრი-აჟენი 13:16, ლიონი-პო 30:10, ლა როშელი-რასინგი 16:11, ტულონი-გრენობლი 22:3, პერპინიანი-ბორდო 11:22, ტულუზი-სტად ფრანსე 49:20
სატურნირო მდგომარეობა
1. კლერმონი - 41, 2. ტულუზი - 38, 3. ლა როშელი - 33, 4. ლიონი - 31, 5. რასინგი - 31, 6. ბორდო - 30, 7. კასტრი - 29, 8. სტად ფრანსე - 28, 9. მონპელიე - 26, 10. ტულონი - 19, 11. პო - 18, 12. აჟენი - 17, 13. გრენობლი - 15, 14. პერპინიანი - 4.
ბესიკ ჯანგავაძე

ყოველდღიური სპორტული გაზეთი "ლელო"
189
მკითხველის კომენტარები / 0 /
მსგავსი ამბები
რუბრიკის სხვა სიახლეები