ლეგიონი. ევროთასები. 'კლერმონი' პლეი ოფშია, სხვები იბრძვიან

სარაგბო ევროთასებზე ბოლოსწინა ტურის შეხვედრები გაიმართა. ყველაზე პრესტიჟულ, ჩემპიონთა თასზე, ერთადერთი გუნდი, რომელზეც შეიძლება ითქვას, რომ თავი ქუდში აქვს, ინგლისური „სარასენზია“. ქართველ მორაგბეთა გუნდებიდან კი პლეი ოფში გასლის შანსს ორი, „რასინგი“ და „მონპელიე“ ინარჩუნებს.

ვასილ კაკოვინისა და გურამ გოგიჩაშვილის „რასინგი“ D ჯგუფში ასპარეზობს და 21 ქულით ლიდერია. მე-5 ტურში პარიზელებმა სტუმრად ითამაშეს ირლანდიურ „ალსტერთან“ და 22:26 დამარცხდნენ. ირლანდიელებმა ამ გამარჯვების შემდეგ 17 ქულა დააგროვეს და პირველი ადგილის დაკავების შანსი გაუჩნდათ. თუმცა, „რასინგი“ ბოლო შეხვედრას შინ გამართავს უშანსოდ დარჩენილ უელსურ „ჰლანეჰლისთან“ და მომდევნო ეტაპზე გასასვლელად ფრეც ყოფნის. უელსურმა კლუბმა აქამდე მხოლოდ ერთი მატჩი მოიგო და 7 ქულით მესამე ადგილზეა.

„ალსტერთან“ მატჩში გოგიჩაშვილი ძირითად შემადგენლობაში იყო და 61-ე წუთზე კაკოვინმა შეცვალა.

მიხეილ ნარიაშვილის, კონსტანტინე მიქაუტაძის, ლევან ჩილაჩავას, უშანგი ჭეიშვილისა და გელა აფრასიძის „მონპელიე“ E ჯგუფში 16 ქულით მეორე ადგილზეა. ჩვენებურთა ამ გუნდს სამი ქულით შოტლანდიური „ედინბურგი“ უსწრებს. „მონპელიემ“ ბოლოსწინა ტურში შინ მიიღო ინგლისური „ნიუკასლი“ და დიდი ანგარიშით 45:8 დაამარცხა.

ბოლო ტურში „მონპელიე“ სწორედ ლიდერ „ედინბურგს“ ხვდება სტუმრად და გამარჯვების შემთხვევაში ჯგუფში პირველ ადგილს დაიკავებს.
„ნიუკასლთან“ მატჩში მიქაუტაძე ძირითად შემადგენლობაში იყო და 44-ე წუთზე შეცვალეს, იმავდროულად თამაშში ჩილაჩავა ჩაერთო, ჭეიშვილი მოედანზე მე-60 წუთიდან გამოჩნდა.

ერთი გამარჯვების ამარაა ამავე ჯგუფში მოასპარეზე მამუკა გორგოძის „ტულონი“. ჩვენებურის გუნდმა ბოლოსწინა ტურში სწორედ „ედინბურგთან“ წააგო - 17:28. გორგოძე თამაშში 56-ე წუთიდან ჩაერთო.
ისევ ვერ მოიგო A ჯგუფში მოასპარეზე ზურაბ ჟვანიას „ვოსფსმა“, რომელმაც ამჯერად სტუმრად წააგო ინგლისურ „ბასთან“ - 16:18. ჟვანია ძირითად

შემადგენლობაში იყო და 53-ე წუთზე შეცვალეს. ამასთან ერთად, გავრცელდა ინფორმაცია, რომ საქართველოს ნაკრების პირველხაზელმა „ვოსფსთან“ კონტრაქტი ერთი წლით გაახანგრძლივა.

ჩელენჯ კაპის გათამაშებაში დავით ზირაქაშვილის, ვიქტორ კოლელიშვილისა და ბექა კაკაბაძის „კლერმონმა“ ხუთი თამაშიდან ხუთივე მოიგო და პლეი ოფის საგზური ერთი ტურით ადრე მოიპოვა. A ჯგუფის ლიდერმა „ვულკანებმა“ მეხუთე ტურში ინგლისურ „ნორსჰემპთონს“ უმასპინძლეს და 48:40 მოუგეს. ზირაქაშვილი ძირითად შემადგენლობაში იყო და 78-ე წუთზე შეცვალეს.

პლეი ოფში გასვლის თეორიულ შანსს ინარჩუნებს გიორგი მელიქიძის „სტად ფრანსე“. პარიზელებმა შინ დაამარცხეს „პო“ - 35:14. ბოლო ტურში „სტად ფრანსე“ ლიდერს, ინგლისურ „ვორსტერს“ სტუმრად დაუპირისპირდება. მელიქიძე თადარიგში იყო და მოედანზე 41-ე წუთიდან გამოჩნდა.

სრულიად უშანსოდ არიან დარჩენილი ქართველ მორაგბეთა გუნდები „ბორდო“, „აჟენი“, „გრენობლი“ და „ენისეი“. ამათგან, ბოლოსწინა ტურში მხოლოდ „ბორდომ“ მოიგო. ჩვენებურთა ამ კლუბმა სტუმრად დაამარცხა „პერპინიანი“ - 34:27. თუმცა, ეს საკმარისი არ აღმოჩნდა პლეი ოფის საგზურისთვის ბრძოლის გასაგრძელებლად. ლაშა ტაბიძე ძირითად შემადგენლობაში იყო და 52-ე წუთზე შეცვალეს. ბექა გორგაძეს დისკვალიფიკაცია აქვს.

მიხეილ გაჩეჩილაძის, შალვა მამუკაშვილისა და დავით კაჭარავას „ენისეიმ“ შინ დიდი ანგარიშით წააგო ინგლისურ „ბრისტოლთან“ - 9:65. გაჩეჩილაძემ სრულად ითამაშა, მამუკაშვილი მოედანზე 53-ე წუთიდან გამოჩნდა, კაჭარავა ტრავმირებულია.

გიორგი თეთრაშვილისა და თამაზ მჭედლიძის „აჟენმა“ სტუმრად წააგო იტალიურ „ბენეტონთან“ - 24:38. თეთრაშვილმა სრულად ითამაშა და 74-ე წუთზე ლელო გაიტანა. მჭედლიძე ტრავმირებულია.

ბექა გიგაშვილისა და დავით ქუბრიაშვილის „გრენობლმა“ კი ასევე სტუმრად დათმო შეხვედრა ინგლისურ „ჰარლიქვინზთან“ - 20:38. გიგაშვილი ძირითად შემადგენლობაში იყო და 46-ე წუთზე შეცვალეს.

ყოველდღიური სპორტული გაზეთი "ლელო"
701
მკითხველის კომენტარები / 0 /
მსგავსი ამბები
რუბრიკის სხვა სიახლეები
;