ლეგიონი. ზაქარიას ჰეთ თრიკი და სუპერსტატისტიკა [VIDEO]

ამ უქმეებზე ქართველმა ლეგიონერებმა 7 გოლი გაიტანეს, რომლის ლამის ნახევარი ზაქარია ბეგლარიშვილზე მოდის. ესტონეთში ამ ნახევარმცველს საოცარი სტატისტიკა აქვს - 31 გოლი და 21 საგოლე პასი! რაც უნდა სუსტი იყოს ესტონეთის ჩემპიონატი - ციფრები შთამბეჭდავია!

იტალია
სერია A. ტრავმირებული ლევან მჭედლიძის "ემპოლი" სტუმრად "ნაპოლისთან" განადგურდა - 1:5.

ესპანეთი
ლა ლიგა 2. გიორგი აბურჯანიას არ უთამაშია, მისი "ლუგო" კი სტუმრად "რეუსს" დაუზავდა - 0:0. არ უთამაშია გიორგი პაპანაშვილსაც ("სარაგოსა"), რომელიც ჯერ კიდევ ტრავმირებულია.

გერმანია
II ბუნდესლიგა. აკაკი გოგიას (63-ე წუთზე გამოცვალეს) "უნიონი" სტუმრად "რეგენსბურგს" დაუზავდა - 1:1. ეს ბერლინელთა ზედიზედ მეოთხე ფრე იყო.
III ლიგა. ლუკას ჰუფნაგელის "უნტერჰახინგი" სტუმრად "ცვიკაუს" დაუზავდა - 2:2, ქართველ ნახევარმცველს არ უთამაშია.

საფრანგეთი
ლიგა 2. ჯაბა ჯიღაურის "გრენობლმა" სტუმრად 3:0 სძლია "ორლეანს". საქართველოს ნაკრების ფლანგელი ნახევარმცველი მოედანზე მხოლოდ 85-ე წუთზე გამოჩნდა.
ნასიონალი. ამირან სანაიას "როდეზი" სტუმრად 1:1-ს ეთამაშა "კონკარნოს".

ბელგია
ჟუპილერ პროლიგა. "გენტმა" შინ 3:1 მოუგო "კორტრაიკს". გიორგი ჩაკვეტაძეს ამჯერად არ გაუტანია. 19 წლის ქართველმა ვარსკვლავმა თავიდან ბოლომდე ითამაშა.

შვეიცარია
სუპერ ლიგა. ქართველთა "ლუცერნი" შინ განადგურდა "ციურიხთან" თამაშში - 2:5. მხოლოდ ოთარ კაკაბაძემ ითამაშა (90 წუთი, გააფრთხილეს), ვაკო გვილია განაცხადში არ ყოფილა.

დანია
სუპერლიგა. საბა ლობჟანიძის (ბოლო წუთზე გამოცვალეს) "რანდერსმა" სტუმრად შეძლო "ორჰუსის" დამარცხება - 2:0. დისკვალიფიცირებული ლაშა პარუნაშვილის "ესბიერგმა" კი "მიდტიულანდს" უმასპინძლა და ფრეს დასჯერდა - 2:2.

პოლონეთი
ექსტრაკლასა. ლუკა ზარანდიას "არკა" შინ ლაშა დვალის "პოგონთან" 2:3 დამარცხდა. ორივე ქართველმა შეუცვლელად ითამაშა. ზარანდიამ პირველ ტაიმში 35-ე წუთზე გოლი გაიტანა და "არკა" 2:1 დააწინაურა.

ტაიმის მიწურულს მან ყვითელი ბარათი მიიღო. ეს მისი მეორე გოლია ჩემპიონატში. მიუხედავად იმისა, რომ მთელი 1 საათი კაცნაკლულმა ითამაშა, "პლოცკმა" მაინც შეძლო სტუმრად "შლიონსკის" დამარცხება, თან დიდი ანგარიშით - 3:0. მატჩის ბოლო გოლი საქართველოს ნაკრების შემტევმა გიორგი მერებაშვილმა (ძირითად შემადგენლობაში იყო და შეუცვლელად ითამაშა) გაიტანა. ვატო არველაძის (სათადარიგო) "კორონამ" სტუმრად 1:0 მოუგო "ზაგლებიეს".

I დივიზიონი. გუგა ფალავანდიშვილის (70-ე წუთზე შევიდა, გააფრთხილეს) "პოდბესკიძიემ" შინ 3:0 მოუგო "გლოგოვს".

ავსტრია
ბუნდესლიგა. საქართველოს ნაკრების ნახევარმცველმა ოთარ კიტეიშვილმა სრულად ითამაშა "შტურმისა" და "ვაკერ ინსბრუკის" მატჩში - 1:1.
2 ლიგა. ლევან ელოშვილის (56-ე წუთზე შევიდა) "კაპფენბერგი" სტუმრად 0:4 განადგურდა "იუნიორსთან" თამაშში.

სლოვაკეთი
ფორტუნა ლიგა. ვახტანგ ჭანტურიშვილის გოლი გადამწყვეტი აღმოჩნდა "ტრნავა"-"პოდბრეზოვას" მატჩში. საქართველოს ნაკრების ნახევარმცველმა მასპინძელთათვის 90-ე წუთზე გაიტანა (მანამდე გაფრთხილებაც მიიღო), ანგარიში 2:0 გახადა და თამაში ასეც დასრულდა. "ტრნავას" ძირითად შემადგენლობაში იყო ქართველი ფორვარდი დავით სხირტლაძეც, რომელიც 76-ე წუთზე შეცვალეს.

უნგრეთი
OTP ბანკ ლიგა. გიორგი ბერიძის "უიპეშტმა" შინ 2:0 მოუგო "ჰალადაშს". ქართველი ნახევარმცველი 90-ე წუთზე შეცვალეს, მან საგოლე პასი მიითვალა. გაიმარჯვა "პუშკაშ აკადემიამ" და ამაში დიდი იყო ბაჩანა არაბულის (90 წუთი) როლი. სწორედ ჩვენებურმა ფორვარდმა გახსნა ანგარიში 79-ე წუთზე, როცა კუთხურიდან ჩაწოდებულ ბურთს კარში მიუჩინა ადგილი. ამის შემდეგ გუნდებმა თითო გოლი "გაცვალეს" და თამაში ასეც დასრულდა - 2:1.

ხორვატია
HNL. გიორგი მჭედლიშვილის (75-ე წუთზე შევიდა) "გორიცა" შინ "ჰაიდუკს" დაუზავდა - 1:1.

ბულგარეთი
პერვა ლიგა. გოდერძი მაჩაიძის (არ უთამაშია) "ვერეია" სტუმრად "სეპტემვრისთან" დამარცხდა - 0:1 და 4 ქულით უკანასკნელ ადგილზეა.

შვედეთი
ოლსვენსკანი. გიორგი ხარაიშვილის "გიოტებორგი" შინ 0:3 განადგურდა "მალმიოსთან" მატჩში. ქართველმა ლეგიონერმა შეუცვლელად ითამაშა. მიუხედავად სამმატჩიანი წაგებების სერიისა, "გიოტებორგი" გავარდნას გადაურჩა.
სუპერეტანი. ზურაბ ცისკარიძემ ("ესკილსტუნა") ავტოგოლი გაიტანა "ფრეისთან" საშინაო მატჩში - 2:2.

ნორვეგია
ობოს-ლიგაენი. ოთარ ჯავაშვილის "ფლორიო" სტუმრად "ნოტოდენთან" დამარცხდა - 1:2. ქართველმა შეუცვლელად ითამაშა და ის გააფრთხილეს. ამით "ფლორიო" ფინიშამდე ერთი ტურით ადრე რანგით მესამე დივიზიონში გავარდა.

კვიპროსი
პირველი დივიზიონი. ქართველთა "ანორთოსისმა" სტუმრად მოუგო "აპოლონს" - 2:1. ნიკა კაჭარავა სასტარტოში იყო და ის 81-ე წუთზე გამოცვალეს, ბექა მიქელთაძე სათადარიგო იყო. ირაკლი მაისურაძის (90 წუთი) "ენოსისმა" შინ 2:0 მოუგო "ალკის".

ალბანეთი
სუპერ ლიგა. ირაკლი ძარიას "კუკესი" შინ "ფლამურტარისთან" დამარცხდა - 1:2. ქართველი ნახევარმცველი ძირითად შემადგენლობაში არ ყოფილა.

ლუქსემბურგი
ნასიონალი. ლევან ყენიას "დუდელანჟმა" სტუმრად გაანადგურა "რუმელანჟი" - 9:2. ყენია გოლების ავტორებს შორის არ ფიგურირებს. სხვა მონაცემები კლუბის ოფიციალურად ვებგვერდს გვიან ღამემდე არ გამოუქვეყნებია.

რუსეთი
პრემიერ ლიგა. "ქართულ დერბიში" საბა კვირკველიას "ლოკომოტივმა" 3:1 მოუგო გია გრიგალავას "არსენალს". ეს "რკინიგზელთა" ზედიზედ მე-5 გამარჯვებაა. ქართველებმა შეუცვლელად ითამაშეს. კვირკველიამ "ჩემპიონატისგან" 7 ბალი დაიმსახურა, გრიგალავამ - 6. ტრავმირებული თორნიკე ოქრიაშვილის გარეშე "კრასნოდარი" შინ "როსტოვს" დაუზავდა - 2:2. ჯანო ანანიძის "სპარტაკი" მოსკოვში გიორგი ჭანტურიას "ურალთან" დამარცხდა - 1:2. ჯანოც და გიორგიც სათადარიგოს როლით დააკმაყოფილეს.

I დივიზიონი. ირაკლი კვეკვესკირის (90 წუთი) "სკა-ხაბაროვსკი" შინ "კრასნოდარის" სარეზერვო გუნდს დაუზავდა - 2:2. ნიკა ძალამიძის "ბალტიკა" სტუმრად "ტამბოვთან" დამარცხდა - 0:2. კარგა ხანია, რაც ქართველი "ბალტიკის" რიგებში არ გამოჩენილა.

უკრაინა
პრემიერ ლიგა. საქართველოს ნაკრების მცველ დავით ხოჭოლავას არ უთამაშია "შახტარისა" და კიევის "დინამოს" მატჩში, რომელიც დონბასელთა გამარჯვებით 2:1 დასრულდა. ლუკა კობერიძის "დესნა" სტუმრად "ოლექსანდრიას" დაუზავდა - 1:1. ლუკა 65-ე წუთზე გამოცვალეს, მანამდე გააფრთხილეს. ქართველთა "ვორსკლამ" სტუმრად "ლვივს" მოუგო 2:0. განაცხადში არც ანდრო გიორგაძე იყო და არც ტრავმირებული სანდრო კობახიძე.

ბელარუსი
ვისშაია ლიგა. ჩემპიონატის დასრულებამდე 3 ტურით ადრე, მინსკის "დინამომ", რომლის შემადგენლობაში სრულად ითამაშა გიორგი ნავალოვსკიმ, სტუმრად 1:0 სძლია "ვიტებსკს" და სამეულისთვის ბრძოლას აგრძელებს. გიორგი ქანთარიას არ უთამაშია, მისი "ნემანი" კი სტუმრად ბატე-სთან დამარცხდა - 0:1.

ლიტვა
A ლიგა. ლევან მაჭარაშვილის "შტუმბრასმა" შინ 1:4 წააგო თითქმის ჩემპიონ "სუდუვასთან". ქართველმა ნახევარმცველმა სრული მეორე ტაიმი ითამაშა.

ლატვია
ვირშლიგა. გურამ ლუკავას (90 წუთი) "იელგავამ" სტუმრად 2:1 მოუგო "მეტას". ქართველთა "რიგასმა" შინ 1:2 დათმო "ვენტსპილსთან". სასტარტოში მხოლოდ ბექა ვაჩიბერაძე იყო, რომელმაც შეუცვლელად ითამაშა. ლაშა შერგელაშვილმა მეორე ტაიმი ითამაშა, ირაკლი სიხარულიძე სათადარიგო იყო, ნიკა სანდოხაძე კი განაცხადში არ ყოფილა. ამით "რიგასმა" მეორე ადგილიც დაკარგა.

ესტონეთი
პრემიუმ ლიიგა. გეგი კეკუას (74-ე წუთზე შეცვალეს) "პარნუ ვარპუსი" შინ 0:5 განადგურდა "კალიუსთან". ზაქარია ბეგლარიშვილის "ფლორამ" ბოლოსწინა უქმეებზე სტუმრად 3:1 მოუგო "ტულევიკს" და უკანასკნელ ტურში გაარკვევს, გახდება თუ არა ჩემპიონი. მანამდე კი აღვნიშნოთ, რომ გამარჯვებულთაგან სამივე გოლი ზაქარია ბეგლარიშვილმა გაიტანა.

ქართველს შემტევ ნახევარმცველს 31 გოლი აქვს გატანილი (ზოგი ვერსიით, 30) და პირველ-მეორე ადგილებს იყოფს "ნომე კალიუს" ბრაზილიელ ლეგიონერ ლილიუსთან. ეს ბეგლარიშვილის პირველი ჰეთ თრიკი იყო ამ ჩემპიონატში.

ყაზახეთი
პრემიერ ლიგა. ბოლოსწინა ტურში ქართველების "ტობოლი" ყარაღანდის "შახტიორთან" 1:2 დამარცხდა, თუმცა მესამე ადგილს ვეღარავინ შეეცილება. ტრავმის გამო არ უთამაშია ჯაბა კანკავას, ხოლო ნიკა კვეკვესკირი თავიდან ბოლომდე მოედანზე იყო.
კახა ცხადაძის გაწვრთნილმა "ორდაბასიმ" სტუმრად 2:1 სძლია "ყიზილჟარს". ამ უკანასკნელის რიგებში სრულად ითამაშა და გაფრთხილება მიიღო გიორგი ფოფხაძემ, შოთა გრიგალაშვილს არ უთამაშია. "ქაისარი"-"ჟეტისუს" მატჩში (1:0) სტუმართა შორის შეუცვლელად ითამაშა მცველმა ლაშა კასრაძემ.

დღეს ითამაშებენ
* რუსეთში ჯიმი ტაბიძის "უფა" "კრილია სოვეტოვს" მასპინძლობს.
* უზბეკეთში შოთა არველაძის "ფახთაქორი" "ბუხოროს" სტუმრობს, ხოლო კახა მახარაძის "ლოკომოტივი" სტუმრად "ბუნიოდკორს" ეთამაშება, გასავარდნ ჯგუფში გიორგი კვესიეშვილისა და ელგუჯა გრიგალაშვილის "ყიზილქუმი" "კოკანდს" სტუმრობს.
* პორტუგალიაში გიორგი მაკარიძის "რიუ ავე" გიორგი არაბიძის "ნასიონალს" უმასპინძლებს, ხოლო ავთო ებრალიძის "შავეში" "ავეშს" დაუხვდება.

ყოველდღიური სპორტული გაზეთი "ლელო"
728
მკითხველის კომენტარები / 0 /
მსგავსი ამბები
რუბრიკის სხვა სიახლეები
;