ლეგიონი. ზედიზედ მეორე ლელო პრემიერშიპში - ჟვანიამ ლიდერს გაუტანა

საფრანგეთის სარაგბო ჩემპიონატის ელიტურ, პირველ დივიზიონში 22-ე ტურის ცენტრალური მატჩი ტულუზში გაიმართა, სადაც ლიდერმა უახლოეს მდევარს, დავით ზირაქაშვილის, ვიქტორ კოლელიშვილისა და ბექა კაკაბაძის „კლერმონს“ უმასპინძლა.

„ვულკანები“ 71-ე წუთისთვის 44:33 იგებდნენ, მაგრამ ტულუზელებმა დასკვნით ცხრა წუთში ორი ლელოს გატანა და მატჩის მოგება მოახერხეს - 47:44.

ქართველებიდან მხოლოდ კაკაბაძემ ითამაშა, რომელიც ძირითად შემადგენლობაში იყო და 48-ე წუთზე შეცვალეს, ზირაქაშვილი და კოლელიშვილი ტრავმირებულნი არიან.

უმნიშვნელოვანესი გამარჯვება მოიპოვა შინ ვასილ კაკოვინისა და გურამ გოგიჩაშვილის „რასინგმა“. პარიზელებმა მიხეილ ნარიაშვილის, ლევან ჩილაჩავას, კონსტანტინე მიქაუტაძისა და გელა აფრასიძის „მონპელიეს“ მინიმალური სხვაობით, 26:25 მოუგეს.

მონპელიელბი 77-ე წუთისთვის 25:19 იგებდნენ, მაგრამ ბოლო 3 წუთი საკუთარი ლელო ვეღარ შეინახეს და დამარცხდნენ. პარიზელთა რიგებში კაკოვინი ძირითად შემადგენლობაში იყო და 46-ე წუთზე შეცვალეს, გოგიჩაშვილი ოჯახური ტრაგედიის გამო, ვერაფრით ითამაშებდა, ჩილაჩავა, რომელიც 75-ე წუთზე შეცვალეს, მე-40 წუთზე არბიტრმა სინბინში გაუშვა. სხვა ქართველ მორაგბეებს არ უთამაშიათ.

ლაშა ტაბიძის, ბექა გორგაძისა და ლექსო ყაულაშვილის „ბორდომ“ დასანანი მარცხი განიცადა შინ უშუალო კონკურენტ „კასტრთან“ - 12:16. გორგაძე თამაშში 59-ე წუთიდან ჩაერთო, ტაბიძე მოედანზე ორი წუთის შემდეგ გამოჩნდა. ყაულაშვილი ტრავმირებულია.

პლეი ოფში გასასვლელად იბრძვის გიორგი მელიქიძის „სტად ფრანსე“, რომელმაც შინ მოუგო გიორგი თეთრაშვილისა და თამაზ მჭედლიძის „აჟენს“ - 25:22. თეთრაშვილი თამაშში 59-ე წუთიდან ჩაერთო.

ბექა გიგაშვილისა და დავით ქუბრიაშვილის „გრენობლმა“ შინ დაამარცხა მამუკა გორგოძის „ტულონი“ - 19:18. ქართველებიდან მხოლოდ გორგოძემ ითამაშა, რომელიც მოედანზე 64-ე წუთიდან გამოჩნდა.

XXII ტური

ბორდო-კასტრი 12:16
ლიონი-პერპინიანი 47:9
სტად ფრანსე-აჟენი 25:22
ლა როშელი-პო 71:21
გრენობლი-ტულონი 19:18
რასინგი-მონპელიე 26:25
ტულუზი-კლერმონი 47:44

სატურნირო მდგომარეობა
1. ტულუზი - 80 ქულა, 2. კლერმონი - 72, 3. ლიონი - 65, 4. რასინგი - 62, 5. კასტრი - 62, 6. ბორდო - 57, 7. ლა როშელი - 57, 8. სტად ფრანსე - 56, 9. მონპელიე - 52, 10. ტულონი - 43, 11. პო - 34, 12. აჟენი - 30, 13. გრენობლი - 28, 14. პერპინიანი - 12

მეორე დივიზიონში რეგულარული გათამაშების დასრულებამდე ორი ტურით ადრე სატურნირო ცხრილს სათავეში ოთარ გიორგაძის, კარლენ ასიეშვილის, სოსო ბეკოშვილისა და ვასილ ლობჟანიძის „ბრივი“ მოექცა. ჩვენებურთა ამ გუნდმა შინ დიდი ანგარიშით დაამარცხა მირიან ბურდულის „კარკასონი“ - 54:17.

გიორგაძემ, რომელმაც სრულად ითამაშა, 61-ე წუთზე ლელო გაიტანა, ლობჟანიძე 57-ე წუთზე შეცვალეს, ბურდული თამაშში 49-ე წუთიდან ჩაერთო. „ბრივი“ 83 ქულით ლიდერობს, მას ქულით ჩამორჩება ირაკლი მირცხულავას „ოიონაქსი“, რომელმაც სტუმრად წააგო „პროვანსთან“ - 23:29. მირცხულავა 57-ე წუთზე შეცვალეს. მომდევნო ტურში „ბრივი“ სწორედ „ოიონაქსს“ სტუმრობს და, სავარაუდოდ, ამ მატჩში გამარჯვებული პირველობასაც მოიპოვებს.

დივიზიონში დარჩენისთვის იბრძვის მერაბ შარიქაძის, გიორგი ცუცქირიძის, გიორგი ჯავახიას, ბექა საღინაძისა და ვანო კარკაძის „ორიაკი“, რომელმაც სტუმრად წააგო „ვანთან“ - 5:25. ანგარიში მატჩის მეექვსე წუთზე ჯავახიამ ლელოთი გახსნა. ის 68-ე წუთზე შეცვალეს, შარიქაძემ სრულად ითამაშა.

ინგლისის ჩემპიონატის მე-19 ტურში შესანიშნავად იასპარეზა ზურაბ ჟვანიას „ვოსფსმა“, რომელმაც სტუმრად შეძლო ლიდერის, „ექსეტერის“ დამარცხება - 26:19. შერკინების ქართველმა ბურჯმა 61-ე წუთზე ლელო გაიტანა და ერთ წუთში შეცვალეს კიდეც.

„ვოსფს“ რეგულარული გათამაშების დასრულებამდე სამი ტურით ადრე 47 ქულა დაუგროვდა და მე-5 ადგილზეა. გუნდს კარგი შანსი აქვს პლეი ოფში გააღწიოს.

ყოველდღიური სპორტული გაზეთი "ლელო"
704
მკითხველის კომენტარები / 0 /
მსგავსი ამბები
რუბრიკის სხვა სიახლეები
;