ლეგიონი. კაკოს რევანში: - ჩვენებური საფრანგეთის ჩემპიონატის ელიტურ, პირველ დივიზიონში მე-9 სეზონს ატარებს

პარიზული "რასინგისა" და საქართველოს ნაკრების შერკინების ბურჯი ვასილ კაკოვინი საფრანგეთის ჩემპიონატის ელიტურ, პირველ დივიზიონში მე-9 სეზონს ატარებს.

მისი ამჟამინდელი გუნდი შაბათს, სტუმრად "ტულუზს" დაუპირისპირდება, სადაც "კაკომ", როგორც მას საფრანგეთში ეძახიან, ხუთი სეზონი გაატარა.
ყოველდღიურმა სარაგბო გაზეთმა "მიდი ოლიმპიკმა" ვასილ კაკოვინზე წერილი გამოაქვეყნა. გთავაზობთ ამონარიდს ამ პუბლიკაციიდან.

"რასინგის" შერკინების ბურჯები ედი ბენ არუსი და ჰასან კოლინგარი ტრავმირებულნი არიან. შედეგად, 28 წლის ვასილ კაკოვინი ლამის ერთადერთი შერკნების მარცხენა ბურჯია (#1), რომელიც მწყობრშია.

ბოლო ორი კვირის განმავლობაში შერკინებისას პრობლემები გვქონდა. ამიტომ, საჭიროა, მის აღმოსაფხვრელად ბევრი ვიმუშაოთ. პირადად მე, გასულ ტურში, "აჟენთან" მატჩში სამჯერ დამაჯარიმა არბიტრმა შერკინებისას. ეს ძალიან მაბრაზებს და ამ უქმეებზე რევანშის ასაღებად ვემზადები. - გვიამბობს ვასილ კაკოვინი მისთვის დამახასიათებელი ბოხი ხმით.

კაკოვინმა რაგბის თამაში თბილისში, 13 წლის ასაკში დაიწყო და მუდამ შერკინების პირველ ხაზში ირჯებოდა. - საქართველოში რაგბი სულ უფრო პოპულარული ხდება. სულ უფრო კარგი ახალი თაობა მოდის. მაგალითად, გურამ გოგიჩაშვილი, რომელმაც "აჟენის" წინააღმდეგ ნახევარი საათი ითამაშა, 19 წლისაა, რასინგში ერთი თვის წინათ ჩაირიცხა და საბრძოლველად უკვე მზადაა" - დასძინა მან.

კაკოვინის პირველი ფრანგული კლუბი "ბრივი" იყო, რომელშიც მისი დებიუტი 2010 წელს შედგა. მას შემდეგ პირველი ხაზის თამაშის წესები და მანერაც საგრძნობლად შეიცვალა. "კაკოს" მიაჩნია, რომ შერკინების ბურჯები უფრო ტექნიკურები გახდნენ და არც ფიზიკურ კონდიციებს უჩივიან.

"ბრივში" გატარებული ორი სეზონის შემდეგ "კაკო" "ტულუზში გადაბარგდა, სადაც ხუთი სეზონი გაატარა - "ტულუზში" ტრავმებმა საგრძნობლად შემიშალეს ხელი. თითქმის წელიწად-ნახევარი არ მითამაშია. თანაც, "ტულუზში" გატარებული ხუთი სეზონის შემდეგ ვგრძნობდი, რომ ყველა დღე ერთფეროვანი გახდა. ახალი, სუფთა ჰაერი მჭირდებოდა, რომელიც "რასინგში" გადასვლის შემდეგ ჩავისუნთქე." - იხსენებს "კაკო".

შაბათს, ვასილ კაკოვინს ყოფილი გუნდის წინააღმდეგ მოუწევს თამაში. მას მიჩნია, რომ ტულუზი სარაგბო დედაქალაქია.

სეზონის დასაწყისში არასტაბილურად გამოვიყურებით. ტულონში კარგ თამაშს, "კლერმონთან" საშინელი მარცხი მოჰყვა. მერე უკეთ ვითამაშეთ "აჟენთან". ახლა, მსოფლიოს ერთ-ერთ საუკეთესო კლუბთან, "ტულუზთან" გვიწევს დაპირისპირება. მიმაჩნია, რომ ეს თამაში სეზონის პირველი, ყველაზე დიდი გამოცდაა - დასძინა შერკინების ქართველმა ბურჯმა."

ყოველდღიური სპორტული გაზეთი "ლელო"
212
მკითხველის კომენტარები / 0 /
მსგავსი ამბები
რუბრიკის სხვა სიახლეები