ლეგიონი. გურამ კაშიას მე-100 გამარჯვება

ლეგიონის რაოდენობაც და მონაგარიც, ჯერჯერობით, ძალზე მწირია. გამოვარჩევთ გურამ კაშიას საიუბილეო გამარჯვებას ჰოლანდიის ჩემპიონატში.

ჰოლანდია

ერედივიზიე. მე-20 ტურში გურამ კაშიას "ვიტესი" "ზვოლეს" ესტუმრა და 2:1 მოუგო. კაპიტანმა კაშიამ, ჩვეულებისამებრ, სასტარტო შემადგენლობაში ითამაშა, ის 77-ე წუთზე შეცვალეს. "ვიტესი" 20 თამაშიდან 31 ქულით მე-6 ადგილზეა და 2 თებერვალს გრონინგენს მასპინძლობს.

კაშიამ ჰოლანდიის ჩემპიონატში თავისი მე-100 გამარჯვება იზეიმა. კლუბში მასზე მეტი მოგება მხოლოდ სამ ფეხბურთელს აქვს - იონ ვან დენ ბრომის რეკორდამდე კი მას 8 მოგება აკლია.

ესპანეთი

ლა ლიგა 2. ოთარ კაკაბაძის "ჟიმნასტიკი" სტუმრად "სპორტინგთან" დამარცხდა. ხიხონელებთან მატჩში შეუცვლელად ითამაშა ქართველმა მცველმა.

ასევე არ შეუცვლიათ გიორგი აბურჯანიაც, რომლის "სევილია ატლეტიკომ" სტუმრად "ლეონესასთან" დათმო - 1:2. გიორგი პაპუნაშვილს თამაშის შანსი არ მისცემია "სარაგოსასა" და "კორდობას" მატჩში (1:0), ქართველი სათადარიგო იყო.

გერმანია

II ბუნდესლიგა. ქართული დუელი არ გამოვიდა - აკაკი გოგიამ სრულად ითამაშა "უნიონისა" და "ნიურნბერგის" მატჩში, მაგრამ სტუმართა რიგებში არ ყოფილა ლუკას ჰუფნაგელი. ბერლინელები შინ 0:1 დამარცხდნენ, მათ მატჩი 9 კაცით ჩაამთავრეს, სტუმრებმა - ათით.

იტალია

სერია B. ლევან მჭედლიძე კვლავ ტრავმირებულია, მისმა "ემპოლიმ" კი სტუმრად "ბარი" გაანადგურა - 4:0.

ბელგია

ჟუპილერლიგა. გიორგი ჩაკვეტაძე "გენტი"-"ბრიუგეს" (2:0) მატჩში მხოლოდ 91-ე წუთზე გამოჩნდა.

მალტა

პრემიერლიგა. მალტაზე გიორგი გოროზიას ოფიციალური დებიუტი შედგა. მან 90 წუთი ითამაშა "ჰიბერნიანსის" შემადგენლობაში, რომელმაც შინ "გზირა" დაამარცხა - 2:0.

ყოველდღიური სპორტული გაზეთი "ლელო"
1360
მკითხველის კომენტარები / 0 /
მსგავსი ამბები
რუბრიკის სხვა სიახლეები
;