ლეგიონი. მამუკა გორგოძე დაბრუნდა, გაჩეჩილაძემ გაიტანა

ჩემპიონთა თასის გათამაშების ჯგუფურ ეტაპზე პირველი წრე დასრულდა.

აქ მოასპარეზე ქართველ მორაგბეთა გუნდებიდან პლეი ოფში გასვლის ყველაზე კარგი შანსი გურამ გოგიჩაშვილისა და ვასილ კაკოვინის "რასინგს" აქვს, რომელმაც სამი თამაშიდან სამივე მოიგო.

"რასინგი", რომელიც D ჯგუფში ასპარეზობს, მესამე ტურში შინ შეხვდა ინგლისურ "ლესტერ ტაიგერზს" და ზედმეტი დაძაბულობის გარეშე, როგორც სჩვევია, აკადემიურ სტილში დაამარცხა - 36:26. ამ შეხვედრაში გოგიჩაშვილი მოედანზე 42-ე წუთიდან გამოჩნდა. კაკოვინი კი განაცხადში არ იყო.

ამავე ჯგუფში, "რასინგის" კონკურენტმა ირლანდიურმა "ალსტერმა" სტუმრად მოუგო უელსურ "ჰლანეჰლის" - 25:24.

მიუხედავად იმისა, რომ თითო-თითო მოგება აქვთ, პლეი ოფში გასვლის შანსს მაინც ინარჩუნებენ E ჯგუფში მოასპარეზე ქართველ მორაგბეთა გუნდები "ტულონი" და "მონპელიე". მესამე ტურში ერთმანეთს სწორედ ეს გუნდები შეხვედნენ. მამუკა გორგოძისა და ბადრი ალხაზაშვილის "ტულონმა" მიხეილ ნარიაშვილის, ლევან ჩილაჩავას, კონსტანტინე მიქაუტაძის, გელა აფრასიძისა და უშანგი ჭეიშვილის "მონპელიეს" საკმაოდ დამაჯერებლად გაუსწორდა - 38:28.

ტულონელთა რიგებში გამორჩეული იყო ტრავმის მოშუშების შემდეგ დაბრუნებული მამუკა გორგოძე, რომელიც 53-ე წუთზე შეცვალეს. მონპელიელი ქართველებიდან მხოლოდ ჭეიშვილმა ითამაშა, რომელმაც მოედანი ოთხი წუთით ადრე დატოვა. "ტულონსა" და "მონპელიეს" ახლა თანაბარი, ექვს-ექვსი ქულა აქვთ.

ამ ჯგუფს 11 ქულით შოტლანდიური "ედინბურგი" ლიდერობს, რომელმაც შინ დაამარცხა ინგლისის "ნიუკასლი" - 31:13.

A ჯგუფში მოასპარეზე ზურაბ ჟვანიას "ვოსფსმა" შინ ვერაფერი გააწყო ლიდერ "ტულუზთან" და 16:24 დამარცხდა. ჟვანია თამაშში 61-ე წუთიდან ჩაერთო. ჩვენებურის გუნდი 3 ქულით ბოლო ადგილზეა და უშანსოდაა დარჩენილი.

ჩემპიონთა თასისგან განსხვავებით, გაცილებით უკეთ ასპარეზობენ ქართველ მორაგბეთა გუნდები ჩელენჯ კაპის გათამაშებაში. აქ რეალურ პრეტენზიას პლეი ოფში გასვლაზე სამი "ქართული გუნდი" აცხადებს.

A ჯგუფის ლიდერი დავით ზირაქაშვილის, ბექა კაკაბაძისა და ვიქტორ კოლელიშვილის "კლერმონია", რომელმაც სამი თამაშიდან სამივე მოიგო. "ვულკანებმა" მესამე ტურში სტუმრად ითამაშეს რუმინულ "ტიმიშოარასთან" და 47:17 მოიგეს. ქართველებიდან მხოლოდ კაკაბაძემ ითამაშა, რომელიც მოედანზე 62-ე წუთიდან გამოჩნდა.

"კლერმონს" კვალში უდგას ინგლისური "ნორსჰემთონი", რომელიც "ვულკანებს" ხუთი ქულით ჩამორჩება.

B ჯგუფის ლიდერი გიორგი ნემსაძის "ოსფრიზია", რომელმაც სამი თამაშიდან ორი მოიგო და 11 ქულა დაუგროვდა. ოსფრიზელებმა შინ მიიღეს გიორგი მელიქიძის "სტად ფრანსე" და დიდი სხვაობით 51:20 დაამარცხეს. მელიქიძე ძირითად შემადგენლობაში იყო და მე-60 წუთზე შეცვალეს, ნემსაძეს არ უთამაშია. "სტად ფრანსე" ერთი ქულით ბოლო ადგილზეა.

პლეი ოფში გასვლის კარგი შანსი აქვს E ჯგუფში მოასპარეზე დავით ქუბრიაშვილისა და ბექა გიგაშვილის "გრენობლს", რომელმაც ჯგუფურ ეტაპზე მეორე გამარჯვება გიორგი თეთაშვილისა და თამაზ მჭედლიძის "აჟენთან" საშინაო მატჩში მოიპოვა - 22:15. ქართველებიდან მხოლოდ თეთრაშვილმა ითამაშა, რომელიც ძირითად შემადგენლობაში იყო და 55-ე წუთზე შეცვალეს.

"გრენობლი" რვა ქულით მეორე ადგილზეა და ორი ქულით ჩამორჩება ლიდერ იტალიურ "ბენეტონს".

დავით კაჭარავას, შალვა მამუკაშვილისა და მიხეილ გაჩეჩილაძის "ენისეიმ", რომელიც D ჯგუფის აუტსაიდერია, შინ წააგო იტალიურ "ზებრესთან" - 14:31. გაჩეჩილაძემ, რომელმაც სრულად ითამაშა, 36-ე წუთზე ლელო გაიტანა, მამუკაშვილი თამაშში 55-ე წუთიდან ჩაერთო.

ყოველდღიური სპორტული გაზეთი "ლელო"
1107
მკითხველის კომენტარები / 0 /
მსგავსი ამბები
რუბრიკის სხვა სიახლეები
;