ლეგიონი. ორი ქართველი ექსტრაკლასას სიმბოლურში

გიორგი მერებაშვილმა ისეთი შედეგი აჩვენა, რაც არასოდეს არც ერთ ქართველ ფეხბურთელზე არ გვსმენია.

თუმცა, მივყვეთ თანამიმდევრობით. ექსტრაკლასას ოფიციალურმა ვებგვერდმა, საქართველოს ნაკრების ორი მოთამაშე აღიარა - პლოცკის "ვისლას" შემტევი და შჩეცინის "პოგონის" მცველი ლაშა დვალი პოლონეთის ჩემპიონატის (ექსტრაკლასას) 21-ე ტურის სიმბოლურ ნაკრებში მოხვდნენ.

ლიგის აუტსაიდერმა "პოგონმა" ზედიზედ მეორე შეხვედრა მოიგო და სატურნირო მდგომარეობა ოდნავ მაინც გაიუმჯობესა - ამჯერად, დვალის გუნდმა პოლონეთის თასის მფლობელს, ლუკა ზარანდიას გდინიას "არკას" 1:0 სძლია და "პიასტთან" ჩამორჩენა 3 ქულამდე შეამცირა.

დვალმა შეუცვლელად ითამაშა, ყვითელი ბარათი მიიღო და ექსტრაკლასას ჟურნალისტთა შეფასებით, შჩეცინელთა გამარჯვებაში საიმედო თამაშით დიდი წვლილი შეიტანა.

პლოცკის "ვისლა" ქვეყნის გრანდს, ვარშავის "ლეგიას" ესტუმრა და 2:0 დაამარცხა. მერებაშვილი გამორჩეული ფიგურა იყო. პირველი გოლი "ვისლას" ურუგვაელმა ნახევარმცველმა ნიკო ვარელამ სწორედ მისი წაქცევისთვის დანიშნული პენალტიდან გაიტანა.

მთლიანობაში, მერებაშვილმა ძალიან კარგი თამაში ჩაატარა და სიმბოლურში ადგილი დაიმსახურა.

"ლელოსთან" კომენტარისას მერებაშვილმა არ დამალა, რომ მისთვის მოულოდნელი აღმოჩნდა, პლოცკელებიდან მხოლოდ ის რომ გამოარჩიეს.
"ჯერ, ლაშა დვალს მივულოცავ სიმბოლურში მოხვედრას. მიმაჩნია, რომ ის ექსტრაკლასაში ერთ-ერთი საუკეთესო ახალგაზრდა მცველია.

ვარშავის "ლეგია" პოლონეთისთვის რა გუნდია, ამაზე არაფერს ვიტყვი. არმიელები ახლაც ჩემპიონატის ლიდერები არიან, საშემოდგომო ეტაპის ჩემპიონები გახდნენ და სიმბოლურში მოხვედრამ განსაკუთრებით გამახარა.

თუმცა გაოცებულიც დავრჩი - "ლეგიასთან" მატჩი მთელმა გუნდმა უმაღლეს დონეზე ჩაატარა. ექსტრაკლასას ოფიციალურმა გვერდმა სამ გამორჩეულ მოთამაშეს შორის მეც დამასახელა, მაგრამ საუკეთესოდ ჩვენი მეკარე აღიარა.

ამის ფონზე გამიკვირდა, "ვისლადან" სიმბოლურ ნაკრებში მხოლოდ მე რომ მოვხვდი. ასეთ მეტოქესთან მოგების შემდეგ ეს სასიამოვნო სიურპრიზი იყო", - გვითხრა მერებაშვილმა.

საინტერესოა, რომ სიმბოლურ ნაკრებში მერებაშვილი ექსტრაკლასას ოფიციალურმა გვერდმა მესამედ დაასახელა, ხოლო დვალი - პირველად. ის სიმბოლურში შეიყვანეს ასევე Gol24.pl-მა, Przeglad sportowy-მ, Pilka Nozna-მ, 2x45.infoi-მ, WP Sportowe Fakty-იმ, Weszlo-მ.

ანუ სულ შვიდმა გამოცემამ, რაც ქართველებში აბსოლუტური რეკორდია - აქამდე არ გვსმენია, ცალკე აღებული ტურის სიმბოლურ ნაკრებში ქართველი ერთდროულად ამდენ გამოცემას დაესახელებინოს.

აი, რას წერენ მერებაშვილის შესახებ პოლონური გამოცემები.

GOL24.PL

"ამ ფეხბურთელმა შეტევის დაბოლოება რომ გააუმჯობესოს, ექსტრაკლასაში ვერავინ გააჩერებს, რადგან ჩვენი ლიგისთვის ძალიან კარგი ფეხბურთელია. ის ძალიან ბევრ მომენტს ქმნის, მაგრამ ყველას გოლით ვერ ამთავრებს.

რაც შეეხება ამ კონკრეტულ შეხვედრას, ბურთს მშვენივრად ფლობდა და "ლეგიას" მცველები ვერ ართმევდნენ. მან მნიშვნელოვანი წვლილი შეიტანა იმაში, რომ გუნდმა მაზოვსკიეს დერბი მოიგო".

2x45.ინფო

"მერებაშვილი "ლეგიას" დაცვაში დიდ პრობლემებს ქმნიდა, რისი საწინააღმდეგო რეცეპტი მეტოქემ შეხვედრის ბოლომდე ვერ მოიფიქრა. ქართველმა გასაოცარი ფეხბურთი აჩვენა და მოიპოვა პენალტი, რომელიც ნიკო ვარელამ გამოიყენა".

 

ყოველდღიური სპორტული გაზეთი "ლელო"
541
მკითხველის კომენტარები / 0 /
მსგავსი ამბები
რუბრიკის სხვა სიახლეები