ლეგიონი. პაპუნაშვილი პრიმერას მიუახლოვდა, სიხარულიძე დარჩა უთამაშებელი

გიორგი პაპუნაშვილმა პრიმერაში გადასასვლელ პლეი ოფში თამაშის უფლება გაინაღდა, გვეყოლება მომავალ სეზონში ქართველი მსოფლიოს ყველაზე ძლიერ საკლუბო ჩემპიონატში?

ესპანეთი

ლა ლიგა 2. ბოლოსწინა ტურში გიორგი პაპუნაშვილის "სარაგოსამ" 10 კაცით შეძლო "ვალიადოლიდის" დამარცხება - 3:2. ბორხა იგლესიასმა ჰეთ თრიკი შეასრულა, პაპუნაშვილი კი 68-ე წუთზე გამოცვალეს, მას მერე, რაც "სარაგოსა" 10 კაცის ამარა დარჩა.

ამ მოგებით არაგონელებმა პლეი ოფში თამაში გაინაღდეს. ოთარ კაკაბაძის "ჟიმნასტიკმა" სტუმრად 1:0 მოუგო "უესკას", რომელიც მომავალ სეზონში პრიმერაში ითამაშებს.

კაკაბაძემ შეუცვლელად ითამაშა. "ჟიმნასტიკი" 2 ქულით უსწრებს გასავარდნ ზონას. გიორგი აბურჯანიას "სევილია ატლეტიკო" უკვე გავარდნილია, ამ ტურში გუნდმა შინ 2:1 მოუგო "ნუმანსიას". აბურჯანია განაცხადშიც კი არ ყოფილა, "სევილიას" დუბლები ბოლოსწინა ადგილზე გადავიდნენ.

ავსტრია

ბუნდესლიგა. ტრავმირებულ გიორგი ქვილითაიას არ უთამაშია "რაპიდის" სასტუმრო მატჩში "ვოლფსბერგერთან", რომელიც ბოლო იყო სეზონში, "რაპიდი" ევროპალიგაზე ითამაშებს.

ერსტე ლიგა. ბოლო ტურში ლევან ელოშვილის "კაპფენბერგერი" სტუმრად "რიდთან" შერცხვა - 1:7. ქართველმა პირველად ითამაშა სასტარტოში და 78-ე წუთზე პრესტიჟის გოლი გაიტანა. "კაპფენბერგერმა" სეზონი მე-8 ადგილზე დაასრულა.

დანია

სუპერლიგა. პლეი ოფის ფინალში ლაშა პარუნაშვილის "ესბიერგმა" საპასუხო მატჩში 3:0 მოუგო დავით სხირტლაძისა და მათე ვაწაძის "სილკებორგს" და ორი მატჩის ჯამში 3:1 აჯობა. "ესბიერგი" და პარუნაშვილი გაისად სუპერლიგაში ითამაშებენ, ხოლო "სილკებორგი" გავარდა. პარუნაშვილმა შეუცვლელად ითამაშა (გააფრთხილეს), ხოლო სხირტლაძე (გააფრთხილეს) 67-ე წუთზე გამოცვალეს. ვაწაძე დიდი ხანია, არ ჩანს.

შვედეთი

ოლსვენსკანი. გიორგი ხარაიშვილის "გიოტებორგი" სტუმრად "სუნდსვალთან" 0:2 დამარცხდა. ქართველმა ახალწვეულმა შეუცვლელად ითამაშა.

ჩეხეთი

I ლიგა. სეზონი ისე დასრულდა, ირაკლი სიხარულიძემ ერთხელაც ვერ ითამაშა "სლოვაცკოს" პირველ გუნდში. საქართველოს ჩემპიონატის ყოფილი ბომბარდირი არც "იაბლონეცთან" 0:2 წაგებულ შეხვედრაში ყოფილა, "სლოვაცკო" კი გადაურჩა გავარდნას.

უნგრეთი

OTP. ქართველთა "ბალმაზივაროშმა" სტუმრად 1:0 დაამარცხა "პაკში", ბაჩანა არაბულმა და ირაკლი მაისურაძემ (გააფრთხილეს) 90-90 წუთი ითამაშეს, ლაშა შინდაგორიძე ტრავმირებულია. "ბალმაზივაროში" 35 ქულით მე-10 ადგილზეა.

უკრაინა

პრემიერლიგა. პლეი აუტში "დესნამ" საპასუხო მატჩში 4:0 მოუგო "ზირკას" და ორი მატჩის ჯამში 5:1 იმარჯვა და გაისად ელიტაში ითამაშებს. დუბლი შეასრულა ლევან არველაძემ, რომელიც მომავალი სეზონიდან "ზორიაში" ითამაშებს, შეუცვლელად გაისარჯა ლუკა კობერიძეც.

ლატვია

ვირშლიგა. თამაზ პერტიას "ლიეპაია" შინ "ვენტსპილსთან" 1:4 დამარცხდა. ლაშა შერგელაშვილისა (90 წ) და ბექა ვაჩიბერაძის (90 წ) "რიგასმა" სტუმრად "იელგავას" მოუგო - 2:0. "რიგასი" 10 ტურის შემდეგ 25 ქულით ერთპიროვნული ლიდერია.

ესტონეთი

პრემიუმ ლიიგა. ზაქარია ბეგლარიშვილის "ფლორა" "ნარვას" ესტუმრა და 4:2 მოუგო. 38-ე წუთზე ქართველი ნახევარმცველის პასით ალოემ ანგარიში გაათანაბრა - 1:1. 77-ე წუთზე 2:2-ზე ზაქარიამ პენალტი გაიტანა, ხოლო 90-ე წუთზე დუბლი შეასრულა.Soccernet.ee-მ ქართველი ფეხბურთელი მატჩის საუკეთესო მოთამაშედ დაასახელა. ზაქარიას ამ სეზონში 16 თამაშში 17 გოლი აქვს გატანილი, მის ანგარიშზე 5 დუბლია.

ყაზახეთი

პრემიერ ლიგა. მორიგ ტურში ჯაბა კანკავასა (დისკვალიფიკაცია) და ნიკა კვეკვესკირის (90 წ) "ტობოლმა" სტუმრად მოუგო "შახტარს" - 1:0. "ტობოლი" 25 ქულით მე-3 ადგილზეა. ჯაბა ჯიღაურის (სათადარიგო) "ორდაბასიმ" სტუმრად 2:1 დაამარცხა ქართველთა "ყიზილ-ჟარი" - 2:1. გოგიტა გოგუა 71-ე წუთზე გამოცვალეს, შოთა გრიგალაშვილმა და გიორგი ფოფხაძემ კი შეუცვლელად ითამაშეს. "ორდაბასი" 19 ქულით მე-4 ადგილზეა, ხოლო "ყიზილ-ჟარი" 8 ქულით ბოლო ადგილზეა. ლაშა კასრაძის (არ უთამაშია) "ჟეტისუ" სტუმრად ლიდერ "ასტანასთან" პირწმინდად დამარცხდა - 0:3. "ჟეტისუ" 11 ქულით მეცხრეა.

უზბეკეთი

ოლიი ლიგა. შოთა არველაძის "ფახთაქორმა" დერბიში 1:0 დაამარცხა "ბუნიოდკორი" და 29 ქულით ერთპიროვნული ლიდერია. გიორგი კვესიეშვილისა და ელგუჯა გრიგალაშვილის "ყიზილქუმმა" სტუმრად "კოკანს" 1:0 მოუგო, გამარჯვების გოლი 45-ე წუთზე გრიგალაშვილმა გაიტანა. ელგუჯას 6 გოლი დაუგროვდა და ბომბარდირთა დავაში მე-2 ადგილზეა. კახა მახარაძის "ლოკომოტივი" სტუმრად "მეტალურგთან" დამარცხდა - 0:2.

აშშ
MLS. "გელექსიმ", რომელსაც დისკვალიფიცირებული იბრაჰიმოვიჩი აკლდა, 1:0 მოუგო "სან ხოსეს", რომლის რიგებში 82-ე წუთამდე ითამაშა ვაკო ყაზაიშვილმა.

დღეს ითამაშებენ
* გიორგი ქანთარიას "ნემანი" "ჟოდინოს" მასპინძლობს.
* ზურაბ ცისკარიძის "ესკილსტუნა" "ნორბის" დაუხვდება.

ყოველდღიური სპორტული გაზეთი "ლელო"
1605
მკითხველის კომენტარები / 0 /
მსგავსი ამბები
რუბრიკის სხვა სიახლეები
;