ლეგიონი. პლეი ოფისთვის ქართველთა ოთხი გუნდი იბრძვის

საფრანგეთის სარაგბო ჩემპიონატის ელიტურ, პირველ დივიზიონში რეგულარული გათამაშების დასრულებამდე ათი ტური დარჩა.

პლეი ოფში მოხვედრის რეალური შანსი კი ქართველ მორაგბეთა ოთხ გუნდს აქვს. ესენია: „კლერმონი“, „ბორდო“, „სტად ფრანსე“ და „რასინგი“.

დავით ზირაქაშვილის, ვიქტორ კოლელიშვილისა და ბექა კაკაბაძის „კლერმონი“ შინ დაუპირისპირდა ბექა გორგაძის, ლექსო ყაულაშვილისა და ლაშა ტაბიძის „ბორდოს“. „ვულკანებმა“, როგორც მოსალოდნელი იყო, საშინაო დაპირისპირებაში მეტოქეს აჯობეს და 40:20 დაამარცხეს.

ზირაქაშვილი ძირთად შემადგენლობაში იყო და 74-ე წუთზე შეცვალეს, ტაბიძე თამაშში მე-60 წუთიდან ჩაერთო, ორი წუთის შემდეგ მოედანზე კაკაბაძეც გამოჩნდა, კოლელიშვილი და ყაულაშვილი ტრავმირებულნი არიან. გორგაძე საქართველოს ნაკრებში ირჯებოდა.

ვასილ კაკოვინისა და გურამ გოგიჩაშვილის „რასინგმა“ შინ მიიღო გათამაშების ლიდერი „ტულუზი“ და 29:34 დამარცხდა. ანგარიშიდანაც კარგად ჩანს, რომ თამაშმა „მხიარულად“ ჩაიარა. კაკოვინი თადარიგში იყო და მოედანზე 52-ე წუთიდან გამოჩნდა, გოგიჩაშვილმა საქართველოს ნაკრებში ითამაშა.
გიორგი მელიქიძის „სტად ფრანსე“, რომელიც ასევე პლეი ოფში გასვლისთვის იბრძვის, შინ დამარცხდა უშუალო კონკურენტ „ლიონთან“ - 13:24. მელიქიძე საქართველოს ნაკრებში იყო გამოძახებული.

მიხეილ ნარიაშვილის, ლევან ჩილაჩავას, კონსტანტინე მიქაუტაძის, უჩა ჭეიშვილისა და გელა აფრასიძის „მონპელიემ“ მოულოდნელად შინ წააგო აუტსაიდერ „პერპინიანთან“ - 10:28. კატალონიური გუნდისთვის ეს პირველი გამარჯვება იყო მიმდინარე გათამაშებაში. ჭეიშვილი და მიქაუტაძე, რომლებიც ძირითად შემადეგნლობაში იყვნენ, 55-ე წუთზე შეცვალეს, ჩილაჩავა და აფრასიძე საქართველოს ნაკრებში გაისარჯნენ, ნარიაშვილი ტრავმირებულია.

გიორგი თეთრაშვილისა და თამაზ მჭედლიძის „აჟენმა“ შინ უმნიშვნელოვანესი გამარჯვება მოიპოვა მამუკა გორგოძის „ტულონთან“ - 19:10. თეთრაშვილი ძირითად შემადგენლობაში იყო და 53-ე წუთზე შეცვალეს, გორგოძე თამაშში შვიდი წუთით ადრე ჩაერთო, მჭედლიძე ტრავმირებულია.

ბექა გიგაშვილისა და დავით ქუბრიაშვილის „გრენობლი“ შინ დამარცხდა „ლა როშელთან“ - 21:28. ქუბრიაშვილი ძირითად შემადგენლობაში იყო და 61-ე წუთზე შეცვალეს. გიგაშვილმა ეროვნულ ნაკრებში ითამაშა.

I დივიზიონი
XVI ტური
კლერმონი-ბორდო 40:20, მონპელიე-პერპინიანი 10:28, სტად ფრანსე-ლიონი 13:24, პო-კასტრი 9:14, აჟენი-ტულონი 19:10, გრენობლი-ლა როშელი 21:28, რასინგი-ტულუზი 29:34

სატურნირო მდგომარეობა
1. ტულუზი - 58 ქულა, 2. კლერმონი - 56, 3. ლა როშელი - 51, 4. ლიონი - 48, 5. ბორდო - 43, 6. სტად ფრანსე - 42, 7. რასინგი - 41, 8. კასტრი - 41, 9. მონპელიე - 33, 10. პო - 29, 11. ტულონი - 28, 12. აჟენი - 21, 13. გრენობლი - 20. 14. პერპინიანი - 8

ინგლისის ჩემპიონატში მე-13 ტურში სტუმრებმა ერთადერთ გამარჯვებას მიაღწიეს და ისიც ზურაბ ჟვანიას „ვოსფსი“ იყო. ჩვენებურის გუნდი „ბრისტოლს“ დაუპირისპირდა და 29:22 დაამარცხა. ჟვანია ძირითად შემადგენლობაში იყო და 61-ე წუთზე შეცვალეს. ამ მოგების შემდეგ „ვოსფს“ 34 ქულა დაუგროვდა, მე-5 ადგილზეა და პლეი ოფში მოხვედრისთვის ბრძოლას განაგრძობს.

ყოველდღიური სპორტული გაზეთი "ლელო"
654
მკითხველის კომენტარები / 0 /
მსგავსი ამბები
რუბრიკის სხვა სიახლეები
;