ლეგიონი. სამი ლელო, ტვინის შერყევა - ქართველთა გუნდები ლიდერებში არიან

საფრანგეთის სარაგბო ჩემპიონატის ელიტურ, პირველ დივიზიონში მეშვიდე ტურის მატჩების შემდეგ ქართველ მორაგბეთა ორი გუნდი, "კლერმონი" და "სტად ფრანსე" ლიდერობს. ახლოში კი კიდევ სამი "ქართული გუნდია."

წლევანდელ სეზონში გაოცებას იწვევს გიორგი მელიქიძის "სტად ფრანსეს" შესანიშნავი თამაში. პარიზელები შარშან გავარდნის პირას იყვნენ მისული, ამჯერად "სტად ფრანსე" საგრძნობლად მოღონიერდა და მე-7 ტურში გასვლით მატჩში საფრანგეთის მოქმედი ჩემპიონის, "კასტრის" დამარცხება შეძლო - 14:9. მელიქიძე თადარიგში იყო, მაგრამ არ უთამაშია.

"სტად ფრანსე" ახლა მეორე ადგილზეა, მას ორი ქულით უსწრებს დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონი". "ვულკანებმა" სტუმრად ითამაშეს "ლა როშელთან" და 12:16 დამარცხდნენ. კოლელიშვილი ძირითად შემადგენლობაში იყო და მალევე შეცვალეს. სავარაუდოდ, მას ტვინის შერყევა მოუვიდა. ძირითად შემადგენლობაში იყო ზირაქაშვილიც, რომელმაც მოედანი 50-ე წუთზე დატოვა.

ცუდი სტარტის შემდეგ ნელ-ნელა უმატებს და ლიდერთა ჯგუფს მიუახლოვდა მიხეილ ნარიაშვილის, კონსტანტინე მიქაუტაძის, ლევან ჩილაჩავასა და გელა აფრასიძის "მონპელიე", რომელმაც ამჯერად შინ 29:17 დაამარცხა მამუკა გორგოძისა და ბადრი ალხაზაშვილის "ტულონი", რომელსაც მძიმე დროება უდგას და 9 ქულით ბოლოდან მესამე ადგილზეა.

ქართველი მორაგბეებიდან მხოლოდ ნარიაშვილმა ითამაშა, რომელიც ძირითად შემადგენლობაში იყო და 65-ე წუთზე შეცვალეს.

ლიდერთა შორის იყვნენ, მაგრამ მე-7 ტურში დამარცხდნენ და სატურნირო ცხრილში უკან დაიხიეს ქართველ მორაგბეთა გუნდებმა, "რასინგმა" და "ბორდომ". გურამ გოგიჩაშვილისა და ვასილ კაკოვინის პარიზულმა "რასინგმა" მოულოდნელად შინ წააგო "ლიონთან" - 13:19.
გოგიჩაშვილი თამაშში 50-ე წუთიდან ჩაერთო, კაკოვინი განაცხადში არ იყო.

ბექა გორგაძის, ლექსო ყაულაშვილისა და ლაშა ტაბიძის "ბორდომ" სტუმრად წააგო დავით ქუბრიაშვილისა და ბექა გიგაშვილის "გრენობლთან" - 28:25.
გორგაძემ, რომელიც 73-ე წუთზე შეცვალეს, 48-ე წუთზე ლელო გაიტანა, ყაულაშვილი 56-ე წუთზე ტაბიძემ შეცვალა, ქუბრიაშვილი ძირითად შემადგენლობაში იყო და მოედანი 64-ე წუთზე დატოვა, იმავდროულად თამაშში გიგაშვილი ჩაერთო.

ტოპ 14. VII ტური
ლა როშელი-კლერმონი 16:12
გრენობლი-ბორდო 28:25
პო-პერპინიანი 12:9
რასინგი-ლიონი 13:19
ტულუზი-აჟენი 10:0
კასტრი-სტად ფრანსე 9:14
მონპელიე-ტულონი 29:17

სატურნირო მდგომარეობა
1. კლერმონი - 25 ქულა, 2. სტად ფრანსე - 23, 3. ლიონი - 21, 4. მონპელიე - 20, 5. კასტრი - 19, 6. ტულუზი - 19, 7. რასინგი - 18, 8. ბორდო - 17, 9. ლა როშელი - 17, 10. პო - 17, 11. გრენობლი - 10, 12. ტულონი - 9, 13. აჟენი - 9, 14. პერპინიანი - 3.

მეორე დივიზიონის მე-7 ტურში ყველა მასპინძელმა გაიმარჯვა. ჩვენებურთა გუნდებიდან კი საუკეთესო მაჩვენებელი ისევ "ბრივსა" და "ნევერს" აქვთ.

კარლენ ასიეშვილის, სოსო ბეკოშვილის, ოთარ გიორგაძისა და ვასილ ლობჟანიძის "ბრივმა" შინ დაამარცხა შალვა სუთიაშვილისა და ნიკოლოზ ხატიაშვილის "ანგულემი" - 31:18. ანგარიში ლელოთი საქართველოს ნაკრების მესამეხაზელმა გიორგაძემ გახსნა, რომელმაც სრულად ითამაშა. ლობჟანიძე თამაშში 70-ე წუთიდან ჩაერთო, ძირითად შემადგენლობაში იყო სუთიაშვილი, რომელიც 55-ე წუთზე შეცვალეს, ერთი წუთით ადრე კი მოედანზე ხატიაშვილი გამოჩნდა.

თორნიკე მატარაძისა და გურამ პაპიძის "ნევერმა" სტუმრად წააგო ბასკურ "ბაიონთან" - 21:26. მატარაძე თამაშში 57-ე წუთიდან ჩაერთო, ექვსი წუთის შემდეგ მოედანზე პაპიძეც გამოჩნდა.

უმნიშვნელოვანესი გამარჯვება მოიპოვა შინ "მონტობანთან დაპირისპირებაში მერაბ შარიქაძის, გიორგი ცუცქირიძის, ლაშა ლომიძის, გიორგი ჯავახიასა და გიორგი ვეფხვაძის "ორიაკმა - 28:15. ქართველებიდან მხოლოდ ცუცქირიძემ ითამაშა, რომელმაც მე-20 წუთზე ლელო გაიტანა.

ნიკა ნეფარიძის "ვანმა" საკუთარ მოედანზე მშრალი ანგარიშით დაამარცხა ბექა შეყლაშვილის "კოლომიე" - 16:0. შეყლაშვილი თამაშში 48-ე წუთზე ჩაერთო, თუმცა ერთ წუთში შესაცვლელი შეიქნა. ნეფარიძე მოედანზე 59-ე წუთიდან გამოჩნდა.

პრო დ2. VII ტური
ბეზიე-ოიონაქსი 24:19
ორიაკი-მონტობანი 28:15
ბაიონი-ნევერი 26:21
ბურგ ან ბრესი-მასი 22:18
ვანი-კოლომიე 16:0
ექსი-კარკასონი 28:25
მონ დე მარსანი-ბიარიცი 20:13
ბრივი-ანგულემი 31:18

სატურნირო მდგომარეობა
1. მონ დე მარსანი - 25 ქულა, 2. ბრივი - 23, 3. ნევერი - 20, 4. კარკასონი - 20, 5. ბაიონი - 20, 6. ოიონაქსი - 19, 7. ანგულემი - 18, 8. ბეზიე - 17, 9. ბიარიცი - 16, 10. ვანი - 16, 11. ექსი - 16, 12. მონტობანი - 13, 13. ორიაკი - 13, 14. კოლომიე - 10, 15. ბურგ ან ბრესი - 10, 16. მასი - 2.

ინგლისის ჩემპიონატის მე-6 ტურში ზურაბ ჟვანიას "ვოსფსმა" შინ წააგო უშუალო კონკურენტ "გლოსტერთან" - 21:35. ჟვანია თამაშში 47-ე წუთიდან ჩაერთო. "ვოსფს" ახლა 19 ქულა აქვს და მესამე ადგილზეა. ის ათი ქულით ჩამორჩება დაწინაურებულ "ექსეტერსა" და "სარასენზს". ერთი ქულით უსწრებს "გლოსტერს".

ყოველდღიური სპორტული გაზეთი "ლელო"
351
მკითხველის კომენტარები / 0 /
მსგავსი ამბები
რუბრიკის სხვა სიახლეები