ლეგიონი. სენსაცია, უიმედობა, ტრანსფერები

ბრიტანეთში მოთამაშე ქართველ მორაგბეთა გუნდებიდან ლაშა ლომიძის "ლონდონ" აირიშმა", რომელიც ინგლისის პრემიერშიპის უიმედო აუტსაიდერია, სენსაციური გამარჯვება მოიპოვა სტუმრად "ჰარლიქვინზთან" - 35:5.

ამ წარმატების მიუხედავად ლონდონური კლუბი 22 ქულით ბოლო ადგილზეა და უახლოეს კონკურენტს ცხრა ქულით ჩამორჩება. ლომიძე განაცხადში არ იყო.

"კელტთა ლიგაში" საქართველოს ნაკრების პირველხაზელის, ანტონ ფეიქრიშვილის "კარდიფმა" სტუმრად წააგო ბლუმფონტენის "ჩიტაზთან" - 27:29. ფეიქრიშვილი ძირითად შემადგენლობაში იყო და 41-ე წუთზე შეცვალეს. "კარდიფი" A ჯგუფში 48 ქულით მეოთხე ადგილზეა.

კარდიფელები რვა ქულით უსწრებენ მე-5 ადგილზე მყოფ გიორგი ნემსაძის "ოსფრიზს", რომელმაც შინ დაამარცხა ირლანდიურ "ქონოთი" - 39:10. ნემსაძის დებიუტი ამ გუნდში ჯერ არ შემდგარა.

საფრანგეთის სარაგბო ჩემპიონატი დასასრულს უახლოვდება და გუნდები თავიანთ სასურველ მორაგბეებთან უკვე აფორმებენ ახალ ხელშეკრულებებს.

სატრანსფერო პერიოდში გუნდს შეიცვლის რამდენიმე ქართველი მორაგბე. უკვე ცნობილია, რომ ელიტური, პირველი დივიზიონის "ბორდოში" განაგრძობენ კარიერას მესამეხაზელი ბექა გორგაძე (მონ დე მარსანი) და შერკინების ბურჯი ლექსო ყაულაშვილი (ლა როშელი).

პირველი დივიზიონის აუტსაიდერ "ოიონაქსის" რიგებს დატოვებს და მეორე დივიზიონის "კოლომიეში" გადაბარგდება პირველხაზელი ირაკლი მირცხულვა. ასევე პირველ დივიზიონს დატოვებს ვახტანგ ახობაძეც (აჟენი). მისი მომავალი გუნდი მეორე დივიზიონში მოასპარეზე, მაგრამ მდიდარი სარაგბო ტრადიციების ბასკური "ბიარიცი" იქნება.

ყოველდღიური სპორტული გაზეთი "ლელო"
464
მკითხველის კომენტარები / 0 /
მსგავსი ამბები
რუბრიკის სხვა სიახლეები