ლეგიონი. ქართველების პლეი ოფი და გორგოძის ჩემპიონობა?

საფრანგეთის სარაგბო ჩემპიონატის ელიტურ, პირველ დივიზიონში რეგულარული გათამაშების დასრულებამდე ოთხი ტურიღა დარჩა.

შესაბამისად, პლეი ოფში მოხვედრისთვის ბრძოლა სულ უფრო მძაფრდება. აქ მოხვედრის თეორიული შანსი ერთბაშად რვა გუნდს აქვს. მათ შორის ოთხი ქართველი მორაგბეებისაა.

22-ე ტურში მოულოდნელი ანგარიში დაფიქსირდა ტულონში, სადაც მამუკა გორგოძის, ლევან ჩილაჩავასა და ბადრი ალხაზაშვილის "ტულონმა" უჩვეულოდ დიდი ანგარიშით დაამარცხა ქვეყნის მოქმედი ჩემპიონი, დავით ზირაქაშვილის, ვიქტორ კოლელიშვილისა და ოთარ გიორგაძის "კლერმონი" - 49:0.

"ვულკანების" კრიზისი ცნობილი ამბავია, მაგრამ ამ შეხვედრაში "ტულონის" წინააღმდეგ ისინი კიდევ უფრო უსუსურად გამოიყურებოდნენ. ტულონელები კი ნელ-ნელა ძალას იკრებენ და თუ ასეთ ტემპში განაგრძეს თამაში, ჩემპიონობის უდავოდ უმთავრესი ფავორიტები იქნებიან.

მამუკა გორგოძის ტრავმის შემდეგ დაბრუნებასა და ლელოს თაობაზე უკვე ვწერდით. კარგად ჩაერთო თამაშში შერკინების ბურჯი ლევან ჩილაჩავაც. ზირაქაშვილი ძირითად შემადგენლობაში იყო, გიორგაძე მოედანზე მეორე ტაიმში გამოჩნდა, კოლელიშვილსა და ალხაზაშვილს არ უთამაშიათ.

მორიგი გამარჯვება მოიპოვა გათამაშების ლიდერმა, მიხეილ ნარიაშვილის, დავით ქუბრიაშვილისა და კონსტანტინე მიქაუტაძის "მონპელიემ". ჩვენებურთა ამ გუნდმა შინ დიდი ანგარიშით დაამარცხა პლეი ოფში მოხვედრისთვის მებრძოლი "კასტრი" - 45:7.

ნარიაშვილი ძირითად შემადგენლობაში იყო და 71-ე წუთზე შეცვალეს, ქუბრიაშვილი თამაშში 53-ე წუთიდან ჩაერთო, მიქაუტაძე ტრავმირებულია.

"მონპელიეს" ხუთი ქულით ჩამორჩება ვასილ კაკოვინის "მეტრო რასინგი". პარიზელებმა სტუმრად უმნიშვნელოვანესი გამარჯვება მოიპოვეს უშუალო კონკურენტ "ლიონთან" დაპირისპირებაში - 24:22. "მეტრო რასინგმა" 30 წუთის განმავლობაში კაცნაკლულმა ითამაშა, რადგან არბიტრმა სტუმართა სამ მორაგბეს ყვითელი ბარათი უჩვენა. კაკოვინი თადარიგში იყო და თამაშში მე-60 წუთიდან ჩაერთო.

პლეი ოფის მებრძოლთა სიაში დაბრუნდა ლექსო ყაულაშვილის "ლა როშელი", რომელმაც შინ დაამარცხა "ბორდო" - 31:20. შერკინების ქართველი ბურჯი განაცხადში არ იყო.

არანაკლებ დაძაბული ბრძოლაა გაჩაღებული დივიზიონში ადგილის შენარჩუნებისთვის მებრძოლთა შორის. სამწუხაროდ, სატურნირო ცხრილის ბოლო ოთხი საფეხური სწორედ ქართველ მორაგბეთა გუნდებს უკავიათ.

ზურაბ ჟვანიასა და გიორგი მელიქიძის "სტად ფრანსე" შინ დამარცხდა ლიდერთა ჯგუფის წარმომადგენელ "ტულუზთან" - 33:37. ჟვანია თადარიგში იყო და მოედანზე 57-ე წუთიდან გამოჩნდა. მელიქიძეს არ უთამაშია.

კარლენ ასიეშვილის, სოსო ბეკოშვილისა და ვასილ ლობჟანიძის "ბრივმა" შინ მოუგო უშუალო კონკურენტს, თამაზ მჭედლიძისა და გიორგი თეთრაშვილის "აჟენს" - 15:12.

ბეკოშვილი, ასიეშვილი და მჭედლიძე ერთდროულად, 57-ე წუთზე შეცვალეს, იმავდროულად, თამაშში თეთრაშვილი ჩაერთო.

ირაკლი მირცხულავას "ოიონაქსმა", რომელიც ახლა ბოლო ადგილზეა, სტუმრად წააგო "პოსთან" - 12:32. მირცხულავა ძირითად შემადგენლობაში იყო და 67-ე წუთზე შეცვალეს.

TOP-14

XXII ტური

ლა როშელი-ბორდო 31:20
სტად ფრანსე-ტულუზი 33:37
ბრივი-აჟენი 15:12
პო-ოიონაქსი 33:12
მონპელიე-კასტრი 45:7
ტულონი-კლერმონი 49:0
ლიონი-მეტრო რასინგი 22:24

თ მ ფ წ ბ ქ(პ)
1. მონპელიე 22 15 0 7 +168 71(11)
2. რასინგი 22 15 0 7 +102 66(6)
3. ტულუზი 22 14 1 7 +119 65(7)
4. ტულონი 22 12 0 10 +214 63(15)
5. ლა როშელი 22 13 1 8 +160 61(7)
6. პო 22 14 0 8 +38 61(5)
7. ლიონი 22 12 0 10 +118 57(9)
8. კასტრი 22 12 0 10 -4 56(8)
9. კლერმონი 22 9 1 12 -51 45(7)
10. ბორდო 22 9 1 12 -11 43(5)
11. სტად ფრანსე 22 7 0 15 -180 33(5)
12. აჟენი 22 7 0 15 -227 33(5)
13. ბრივი 22 6 1 15 -210 31(5)
14. ოიონაქსი 22 5 3 14 -236 30(4)


მეორე დივიზიონში რეგულარული გათამაშების დასრულებამდე ორი ტურიღა დარჩა. აქ პირველობისთვის, რომელიც პირველი დივიზიონის საგზურს ავტომატურად იძლევა, ორი გუნდი, "პერპინიანი" და "მონტობანი" იბრძვის. ქართველი მორაგბეები არცერთში თამაშობენ. პლეი ოფში მოხვედრისთვის კი ისევ ორი "ქართული გუნდია" ჩაბმული ბრძოლაში. ესენია: "მონ დე მარსანი" და "გრენობლი".

ბექა გიგაშვილის "გრენობლმა" 28-ე ტურში მირიან ბურდულის "კარკასონი" დაამარცხა - 30:5. გიგაშვილი განაცხადში არ იყო, ბურდული 44-ე წუთზე შეცვალეს.
ჯერ ისევ ვერ თამაშობს "მონ დე მარსანის" მესამეხაზელი ბექა გორგაძე, რომელიც ტრავმის შემდეგ ვარჯიშს შეუდგა, მაგრამ სათამაშოდ ჯერ მზად არ არის. "მონ დე მარსანმა" კი სტუმრად წააგო ბასკურ "ბაიონთან" - 15:18.

მეორე დივიზიონის დატოვების რეალური საფრთხე ბექა ბიწაძის "ნარბონს" და ელიზბარ ყუფარაძის "დაქსს" ემუქრება. ბიწაძე ტრავმირებულია და გუნდს სეზონის ბოლომდე ვერ დაეხმარება. ყუფარაძის "დაქსმა" კი შინ წააგო "ბეზიესთან" - 15:23. შერკინების ქართველი ბურჯი თამაშში 56-ე წუთიდან ჩაერთო.

დივიზიონში ადგილი შეინარჩუნა გათამაშების დებიუტანტმა შალვა სუთიაშვილის "ანგულემმა". ჩვენებურის გუნდმა, ამჯერად, სტუმრად წააგო გათამაშების ლიდერ "პერპინიანთან" - 14:37. სუთიაშვილი თადარიგში იყო და თამაშში 51-ე წუთიდან ჩაერთო.

PRO D2

XXVIII ტური

დაქსი-ბეზიე 15:23
ორიაკი-ვანი 19:14
კოლომიე-ბიარიცი 22:17
გრენობლი-კარკასონი 30:5
მონტობანი-მასი 26:10
ნარბონი-ნევერი 24:47
პერპინიანი-ანგულემი 37:14
ბაიონი-მონ დე მარსანი 18:15

თ მ ფ წ ბ ქ(პ)
1. პერპინიანი 28 19 1 8 +287 91(13)
2. მონტობანი 28 19 2 7 +150 88(8)
3. მარსანი 28 16 0 12 +213 79(15)
4. გრენობლი 28 18 1 9 +76 79(5)
5. ბიარიცი 28 16 0 12 +75 75(11)
6. ბეზიე 28 17 1 10 +53 75(5)
7. ნევერი 28 14 0 14 +77 65(9)
8. ბაიონი 28 13 1 14 -28 64(10)
9. კოლომიე 28 13 1 14 -65 63(9)
10. ანგულემი 28 13 1 14 -45 59(5)
11. ვანი 28 11 0 17 -34 57(13)
12. ორიაკი 28 12 1 15 -57 56(6)
13. მასი 28 12 0 16 -33 55(7)
14. კარკასონი 28 11 0 17 -72 53(9)
15. დაქსი 28 8 1 19 -161 42(8)
16. ნარბონი 28 6 2 120 -411 31(3)

ყოველდღიური სპორტული გაზეთი "ლელო"
1080
მკითხველის კომენტარები / 0 /
მსგავსი ამბები
რუბრიკის სხვა სიახლეები
;