ლეგიონი. ჩელენჯ კაპი: ორი ქართული გუნდი ფინალში 

გასულ უქმეებზე ევროთასების გათამაშების ნახევარფინალური მატჩები გაიმართა.

ყველაზე პრესტიჟულ, ჩემპიონთა თასზე ქართველ მორაგბეთა გუნდები აღარ დარჩნენ. ამიტომ, მხოლოდ ფინალისტების ვინაობას გაგაცნობთ. ნიუკასლში, „სენტ ჯეიმზ პარკზე“, 11 მაისს ევროპის საუკეთესო კლუბის სახელისთვის ინგლისური „სარასენზი“ ირლანდიურ „ლენსტერს“ დაუპირისპირდება. 

სამაგიეროდ, ქართული ფინალი იქნება „ჩელენჯ კაპზე“. ფინალი 10 მაისს ასევე „სენტ ჯეიმზ პარკზე“ გაიმართება. დავით ზირაქაშვილის, ბექა კაკაბაძისა და ვიქტორ კოლელიშვილის „კლერმონი“ ასევე ფრანგულ „ლა როშელს“ ეთამაშება, რომლის შერკინების მწვრთნელი ყოფილი „ბორჯღალოსანი“ აქვსენტი გიორგაძეა. 

„კლერმონმა“ ნახევარფინალში საკუთარ მოედანზე ინგლისური „ჰარლიქვინზი“ დაამარცხა 32:27. ქართველი მორაგბეებიდან მხოლოდ კაკაბაძემ ითამაშა. მან მოედანზე 20 წუთი დაყო. ზირაქაშვილი და კოლელიშვილი ტრავმირებულნი არიან. „ლა როშელმა“, თავის მხრივ, ასევე შინ სძლია ინგლისურ „სეილ შარქსს“ - 24:20. 

გაიმართა კონტინენტის ფარის ნახევარფინალური, განმეორებითი მატჩები. დავით კაჭარავას, მიხეილ გაჩეჩილაძის, შალვა მამუკაშვილის, დავით მესხისა და ნიკოლოზ ხატიაშვილის „ენისეიმ“ შინ რუმინული „ტიმიშოარა“ მიიღო და 40:32 დაამარცხა. პირველი მატჩი რუმინელებს 20:18 ჰქონდათ მოგებული. ამიტომ, ფინალში ჩვენებურთა გუნდი გავიდა. 

მესხმა, რომელმაც სრულად ითამაშა, მე-8 წუთზე ლელო მიითვალა, ასევე სრულად ითამაშეს ხატიაშვილმა და გაჩეჩილაძემ, კაჭარავა 73-ე წუთზე შეცვალეს, მამუკაშვილი თამაშში 35-ე წუთიდან ჩაერთო. 

აღსანიშნავია, რომ მატჩის არბიტრი ნიკა ამაშუკელი იყო, მას ეხმარებოდნენ შოთა თევზაძე და თორნიკე გვირჯიშვილი. 

საფრანგეთის ჩემპიონატის ფედერალ 1 დივიზიონში პლეი ოფის დრო დადგა. მეორე დივიზიონში ასასვლელად ქართველ მორაგბეთა რამდენიმე გუნდი იბრძვის. 

გიორგი შარაშიძის „როვალ დრომი“ ორი მატჩის ჯამში „სენ ჟან დე ლუზს“ დაუპირისპირდება. ზაზა ნავროზაშვილის „ალბის“ მეტოქე კი „დიჟონი“ იქნება. გიორგი ზაქაშვილის „ბურგუენი“ „ბლანიაკს“ ეთამაშება. ელიზბარ ყუფარაძის „დაქსი“ „რუანის“ მეტოქე იქნება. თუ ეს უკანასკნელი მეორე დივიზიონში გადასვლას შეძლებს, მაშინ ამ გუნდში თავის კარიერას საქართველოს ნაკრების შუამარბი თამაზ მჭედლიძე განაგრძობს, რომელმაც წინასწარ შეთანხმებას უკვე ხელი მოაწერა. 

ყოველდღიური სპორტული გაზეთი "ლელო"
520
მკითხველის კომენტარები / 0 /
მსგავსი ამბები
რუბრიკის სხვა სიახლეები
;