ლეგიონი. ხუთი ქართული გოლის ამბავი...

მართალია, ჯერ ქართული ლეგიონის ძირითადი ნაწილი (რომელიც ყოფილი საბჭოეთის ქვეყნებში თამაშობს) საქმეში არ ჩართულა, მაგრამ მაინც შესანიშნავი უქმეები გამოდგა - ოთხმა ქართველმა ხუთი გოლი შეაგდო...

ჰოლანდია

ერედივიზიე. არნემის "ვიტესმა" "ფეიენოორდს" უმასპინძლა და 3:1 მოუგო. 43-ე წუთზე "ვიტესის" ქართველმა კაპიტანმა გურამ კაშიამ თავურით ანგარიში 1:1 გახადა. ჩვენებურმა შეუცვლელად ითამაშა. "ვიტესი" 37 ქულით მე-7, საპლეიოფო ადგილზეა. ეს ჩვენებურის მესამე გოლია სეზონში.

გერმანია
II ბუნდესლიგა. აკაკი გოგიამ ერთი საგოლე პასი მიითვალა, ხოლო მისმა "უნიონმა" 3:1 მოუგო "დიუსელდორფს".

იტალია

სერია B. ტრავმირებული ლევან მჭედლიძის "ემპოლიმ" სტუმრად "ასკოლი" დაამარცხა - 2:1 და პირველ ადგილზე გადავიდა.
სერია C. ირაკლი შეყილაძის "ლუკეზე" სტუმრად "პიაჩენცასთან" დამარცხდა - 0:1. ქართველი ფორვარდი თამაშში 68-ე წუთზე ჩაერთო, მაგრამ გუნდს ვერაფრით დაეხმარა.

ესპანეთი

ლა ლიგა 2. ოთარ კაკაბაძის (90 წ) "ჟიმნასტიკმა" სტუმრად "ალბასეტე" 1:0 დაამარცხა და 32 ქულით მე-15 ადგილზეა. გიორგი აბურჯანიას "სევილია ატლეტიკო" მადრიდში "რაიო ვალეკანოსთან" დამარცხდა - 0:2.

ქართველი ნახევარმცველი 68-ე წუთზე შეცვალეს. "სევილია" 16 ქულით ბოლოსწინა ადგილზეა. გიორგი პაპუნაშვილის "სარაგოსამ" "ლუგოს" 2:0 მოუგო. პაპუნაშვილი 78-ე წუთზე შევიდა სათამაშოდ. "სარაგოსა" 34 ქულით ქართველთა გუნდებში ყველაზე მაღლა, მე-11 ადგილზეა.

პორტუგალია

პრიმეირა ლიგა. გიორგი მაკარიძე სათადარიგო იყო, მისმა "რიუ ავემ" კი 3:0 მოუგო "მარიტიმუს". "რიუ ავე" მე-5 ადგილზეა.

სეგუნდა ლიგა. ზედიზედ 7 მოუგებელი მატჩის მერე იფეთქა "ვიზეუმ", ტურნირის ყოფილმა ლიდერმა სტუმრად "ბენფიკას" სარეზერვო გუნდი დაამარცხა - 5:1. ავთო ებრალიძემ შეუცვლელად ითამაშა და დუბლი შეასრულა, მას სეზონში უკვე 5 გოლი აქვს გატანილი.

პოლონეთი

ექსტრაკლასა. პოლონეთის ჩემპიონატი ზამთრის პაუზის შემდეგ განახლდა. გიორგი მერებაშვილის "პლოცკმა" შინ "გურნიკს" 4:2 სძლია. ქართველი ნახევარმცველი სასტარტო შემადგენლობაში იყო და მან შეუცვლელად ითამაშა.

მასპინძელთა ბოლო გოლი მისი პასით გავიდა, რომელიც 31 წლის ქართველისთვის მეხუთეა სეზონში (მერებაშვილს ამასთან 3 გოლი აქვს გატანილი). ლაშა დვალმა შეუცვლელად ითამაშა, ხოლო მისმა "პოგონმა" დიდი ანგარიშით მოუგო "სანდეციას" - 4:1.

გოლით და საგოლე პასით განაახლა სეზონი ნიკა კაჭარავამ. მისმა "კორონამ" სტუმრად დაამარცხა ნიკა კვანტალიანის (განაცხადში არ ყოფილა) "ტერმალიცა" - 3:0. ქართველმა საკმაოდ კურიოზულ სიტუაციაში გახსნა ანგარიში.

"კორონა" 34 ქულით მე-5 ადგილზეა. ქართველმა ფორვარდმა სეზონში მეხუთე გოლი გაიტანა. "არკა" შინ "ლეხს" დაუზავდა - 0:0. ლუკა ზარანდია მასპინძელთა რიგებში 65-ე წუთამდე თამაშობდა.

დანია

სუპერლიგა. ზამთრის შესვენება დასრულდა დანიაშიც, სადაც უმალ ვიხილეთ ქართული გოლი - "სილკებორგმა" "ოლბორგს" 3:2 მოუგო. მატჩის მე-8 წუთზე მასპინძელთა გოლი დავით სხირტლაძემ გაიტანა, რომელიც 73-ე წუთზე თანამემამულე მათე ვაწაძემ შეცვალა. სხირტლაძემ ჩემპიონატში მე-5 გოლი გაიტანა, ბოლო 5 შეხვედრაში კი - მეოთხე.

საბა ლობჟანიძის "რანდერსი" ბოლო ადგილზეა, ქართველის გუნდი "კოპენჰაგენს" ესტუმრა და 1:5 დამარცხდა, საბა მე-80 წუთზე გამოცვალეს.

ბელგია

ჟუპილერლიგა. გიორგი ჩაკვეტაძის "გენტმა" შინ "სენტ ტრუიდენს" სძლია - 3:0. ქართველი უკვე 3:0-ზე, 69-ე წუთზე შეიყვანა მწვრთნელმა. "გენტი" 43 ქულით მე-4 ადგილზეა.

შვეიცარია

სუპერლიგა. ვაკო გვილიას დებიუტი "ლუცერნში" ფეხბედნიერი გამოდგა, ქართველის გუნდმა სტუმრად აჯობა "გრასჰოპერსს" - 2:1. გვილიამ მეორე ტაიმი ითამაშა. "ლუცერნი" 26 ქულით უკვე მე-7 ადგილზეა.

ავსტრია

ბუნდესლიგა. გიორგი ქვილითაიას "რაპიდი" სტუმრად "ადმირასთან" 1:2 დამარცხდა. გიორგი მოედანზე 82-ე წუთზე გავიდა, მას მერე სტუმრებმა გაათანაბრეს, მაგრამ შემდეგ მაინც გაუშვეს გოლი.

რუმინეთი

ლიგა 1. აკაკი ხუბუტიას "პოლი ტიმიშოარა" შინ "ვოლუნტარისთან" დამარცხდა - 2:3, ქართველი მცველი სათადარიგო იყო.

ალბანეთი

სუპერლიგა. ირაკლი ძარიას "კუკესიმ" შინ 0:1 დათმო "კამზასთან", ძარია სასტარტოში იყო.

აზერბაიჯანი

პრემიერლიგა. "კეშლია"-"საბაილის" მატჩში (1:1) სტუმართა რიგებში შეუცვლელად ითამაშეს ნიკა აფაქიძემ (დებიუტი) და თამაზ ცეცხლაძემ (ყვითელი ბარათი).

დღეს ითამაშებენ
* ლუკას ჰუფნაგელის "ნიურნბერგი" "ზანკტ პაულის" ესტუმრება.
* გიორგი გოროზიას "ჰიბერნიანსი" "სენგლეას" მასპინძლობს.

ყოველდღიური სპორტული გაზეთი "ლელო"
1222
მკითხველის კომენტარები / 0 /
მსგავსი ამბები
რუბრიკის სხვა სიახლეები
;