ლეგიონი. ჯანო დაბრუნდა, კაშიამ აიაქსი დაამარცხა, ჩაკვეტაძე პირველად სასტარტოში...

ვაკო ყაზაიშვილმა სეზონი ამერიკაში ბრწყინვალედ დაიწყო. ის 2018 წელს პირველი ქართველი ლეგიონერია, რომელმაც ერთ თამაშში გოლიც გაიტანა და საგოლე პასიც გააკეთა.

4-თვიანი პაუზის შემდეგ ფეხბურთს დაუბრუნდა ჯანო ანანიძე; "აიაქსის" დამარცხებაში თავისი წვლილი გურამ კაშიამაც შეიტანა; გოლები გაიტანეს ზაქარია ბეგლარიშვილმა და გიორგი მერებაშვილმაც; შესანიშნავად ათამაშდა ვაკო გვილია შვეიცარიაში...

ესპანეთი

ლა ლიგა 2. გიორგი პაპუნაშვილის "სარაგოსა" სტუმრად უკეთესი იყო, ვიდრე მასპინძელი "ნუმანსია" - 2:1. ქართველი მხოლოდ სათადარიგო იყო. ოთარ კაკაბაძემ შეუცვლელად ითამაშა, "ჟიმნასტიკმა" კი ტრადიციულად, სუსტად ითამაშა შინ და "ტენერიფესთან" 1:2 დათმო. კვლავ წააგო ბოლოადგილოსანმა "სევილია ატლეტიკომ", რომელმაც შინ ხიხონის "სპორტინგთან" 0:1 დათმო, გიორგი აბურჯანია 81-ე წუთზე გამოცვალეს.

გერმანია

II ბუნდესლიგა. აკაკი გოგიას (არ უთამაშია) "უნიონი" სტუმრად "კაიზერსლაუტერნთან" დამარცხდა - 3:4. არსად ჩანს ლუკას ჰუფნაგელიც, მისმა "ნიურნბერგმა" მოულოდნელად, შინ "ფიურტთან" წააგო - 0:2.

იტალია

სერია C. ირაკლი შეყილაძის "ლუკეზესა" და "პისტოიეზეს" თამაში უამინდობას შეეწირა.

საფრანგეთი

ნასიონალი. ლიგის ერთ-ერთმა ლიდერმა "როდეზმა" 1:0 მოუგო "სანოას", ამირან სანაიამ კი შეუცვლელად ითამაშა.

პორტუგალია

პრემიერლიგა. გიორგი მაკარიძის "რიუ ავე" სტუმრად "სეტუბალთან" დამარცხდა - 0:1. ქართველი მეკარე განაცხადშიც არ ყოფილა.
სეგუნდა. ავთო ებრალიძის (90 წ) "ვიზეუ" შინ "ოლივეირენშესთან" 0:2 დამარცხდა.

ჰოლანდია

ერედივიზიე. გურამ კაშიას (90 წ) "ვიტესმა" შინ მეორეადგილოსანი "აიაქსი" დაამარცხა - 3:2. გამარჯვების გოლი კაშიას თავური პასით გავიდა სტუმართა კარში. "ვიტესი" 41 ქულით მე-6 ადგილზე გადავიდა.


ბელგია

ჟუპილერლიგა. 18 წლის გიორგი ჩაკვეტაძემ პირველად ითამაშა "გენტის" სასტარტო შემადგენლობაში. ეს "ოსტენდესთან" მატჩში მოხდა. ჩვენებური 67-ე წუთზე 0:1-ზე შეცვალეს. საბოლოოდ, "გენტი" 2:3 დამარცხდა, ჩაკვეტაძეს ურიგოდ არ უთამაშია, ერთი კარგი შანსიც შეექმნა.

შვეიცარია

სუპერ ლიგა. ვაკო გვილიას საგოლე პასით "ლუცერნი" "სიონთან" სტუმრობისას მარცხს გადაურჩა - 1:1. გვილიამ შეუცვლელად ითამაშა.



ავსტრია

ბუნდესლიგა. გიორგი ქვილითაიას "რაპიდი" "ზალცბურგს" ესტუმრა და 0:1 დამარცხდა. ქართველი ფორვარდი 59-ე წუთზე გამოცვალეს.

პოლონეთი

ექსტრაკლასა. მატჩის 83-ე წუთზე გიორგი მერებაშვილმა "ტერმალიცას" ცენტრალური მცველის უხეში შეცდომით ისარგებლა, მეკარესთან პირისპირ გავიდა და "პლოცკს" სტუმრად 2:1 მოაგებინა.

მერებაშვილმა სრულად ითამაშა და ყვითელი ბარათიც მიიღო. მასპინძელთა რიგებში არ ყოფილა ნიკა კვანტალიანი. 31 წლის ქართველმა ნახევარმცველმა წლეულს პირველი, სეზონში კი მე-4 გოლი გაიტანა.

ქართული დუელი ვნახეთ პოლონეთში - ნიკა კაჭარავას "კორონა" ლაშა დვალის "პოგონს" დაუზავდა - 0:0. დუელი მცველის გამარჯვებით დასრულდა. ლუკა ზარანდიას არ უთამაშია, მისმა "არკამ" კი სტუმრად "კრაკოვიასთან" დათმო - 1:2.

ავსტრია

ერსტე ლიგა. უამინდობამ ლევან ელოშვილის "კაპფენბერგერისა" და "ლინცის" მატჩი გადადო, ისევე, როგორც ამ ლიგის შეხვედრების უმეტესობა.

დანია

სუპერლიგა. საბა ლობჟანიძეს არ უთამაშია, მისმა "რანდერსმა" კი შინ უშანსოდ წააგო "ნორდსიელანდთან" - 0:3.
I დივიზიონი. ლაშა პარუნაშვილის (სათადარიგო) "ესბიერგმა" შინ 2:0 მოუგო "სკივეს".

სლოვაკეთი

ფორტუნა ლიგა. ვახტანგ ჭანტურიშვილის "ტრნავა" სტუმრად "დუნაისკა სტრედას" დაუზავდა - 0:0, ქართველმა შემტევმა ნახევარმცველმა შეუცვლელად ითამაშა. სამაგიეროდ, დეკემბრის მერე არ გამოჩენილა "ტრენჩინში" გიორგი ბერიძე, მისმა გუნდმა კი სტუმრად "მორავცე" დაამარცხა დიდი ანგარიშით - 4:1. "მორავცეს" მეკარე გიორგი ჩოჩიშვილი ჯერჯერობით პირველ გუნდში ვერ ხვდება.

შვედეთი

თასი. გიორგი ხარაიშვილის "გეტებორგი" სტუმრად 2:2 დაუზავდა "სირიუსს", ქართველის დებიუტს ჯერ ისევ ველით.

ჩეხეთი
I ლიგა. ირაკლი სიხარულიძის "სლოვაცკო" სტუმრად "სიგმასთან" დამარცხდა - 0:1. ქართველი ახალწვეული ტრავმირებულია. მის დებიუტს ჯერაც ველით.

უნგრეთი

OTP ლიგა. უნგრეთში ლაშა შინდაგორიძის დებიუტი შედგა - ის "ბალმაზივაროშის" რიგებში "პაკშთან" (0:0) 79-ე წუთზე გამოჩნდა. ბაჩანა არაბული 49-ე წუთზე გამოცვალეს, ხოლო ირაკლი მაისურაძე სათადარიგო იყო.

ისრაელი
ლიგატ ჰაალი. ლადო დვალიშვილის "აშკელონი" სტუმრად "ნეთანიასთან" დამარცხდა - 0:2.

ალბანეთი

სუპერლიგა. ირაკლი ძარიას (90 წ) "კუკესიმ" სტუმრად 2:1 მოუგო "ლუშნიას". სტუმართა პირველ გოლში მონაწილეობა ქართველმა ნახევარმცველმაც მიიღო.

მალტა

პრემიერლიგა. გიორგი გოროზიას (90 წ) "ჰიბერნიანსი" შინ "სლიემასთან" 0:1 დამარცხდა, ქართველმა ფეხბურთელმა ყვითელი ბარათი მიიღო.

რუსეთი

პრემიერლიგა. განახლდა რუსეთის ჩემპიონატი - გიორგი ლორიას "ანჟიმ" "რუბინს" უმასპინძლა და 1:1 დაუზავდა. მასპინძელთა კარში სწორედ ქართველი მეკარე იდგა (შეფასება - 6 ბალი). გიორგი ჭანტურიას (66-ე წუთზე შევიდა) "ურალი" სტუმრად ალან ძაგოევის გოლით დამარცხდა ცსკა-სთან - 0:1.

"ჩემპიონატმა" ჩვენებურის თამაში 6 ბალით შეაფასა. ტრავმირებული თორნიკე ოქრიაშვილის "კრასნოდარმა" 3:1 მოუგო "როსტოვს". ხაბაროვსკში სკა 0:1 დამარცხდა "ტოსნოსთან", მასპინძელთა რიგებში გიორგი ნავალოვსკი სათადარიგო იყო. ჯიმი ტაბიძემ შეუცვლელად ითამაშა, ხოლო "უფამ" 1:1 ითამაშა მოსკოვის "დინამოსთან".

ჯიმიმ 6,5 ბალი დაიმსახურა "ჩემპიონატისგან". მოსკოვური დერბის 78-ე წუთზე მოედანზე ჯანო ანანიძე გამოჩნდა. აი, ასე, 20-გრადუსიან ყინვაში შედგა ჯანოს დაბრუნება ფეხბურთში 4-თვიანი იძულებითი პაუზის შემდეგ.

თამაში "ლოკომოტივსა" და "სპარტაკს" შორის 0:0 მორჩა, ხოლო საბა კვირკველიამ (90 წ) "ჩემპიონატისგან" 7 ბალი დაიმსახურა, რაც ქართველებში ყველაზე მაღალი შეფასებაა ტურში. გია გრიგალავამ შეუცვლელად ითამაშა (6,5 ბალი შეფასება) ტულის "არსენალის" რიგებში, რომელმაც "ახმატს" 1:0 მოუგო.

უკრაინა

პრემიერლიგა. დუბლების ჩემპიონატში "შახტარმა" გიორგი არაბიძის გარეშე მოუგო სტუმრად "კარპატის" 4:2. სანდრო კობახიძემ საგოლე პასით გამოიჩინა თავი "ვორსკლასა" და "ჩერნომორეცის" მატჩში, რომელიც ქართველი ფეხბურთელის გუნდმა 2:1 მოიგო. კობახიძე 85-ე წუთზე ანდრო გიორგაძემ შეცვალა. ნიკა სანდოხაძის "კარპატი" შინ 0:3 დამარცხდა დავით ხოჭოლავას "შახტართან". სანდოხაძემ შეუცვლელად ითამაშა, ხოჭოლავა განაცხადშიც კი არ იყო.

ლიტვა

A ლიგა. ლევან მაჭარაშვილის "შტუმბრასი" შინ "ჟალგირისს" დაუზავდა - 0:0. მაჭარაშვილი მოედანზე 61-ე წუთზე გამოჩნდა და ყვითელი ბარათი მიიღო.

ესტონეთი

პრემიუმ ლიგა. ახალი ჩემპიონატი "ფლორამ" გამარჯვებით დაიწყო, ზაქარია ბეგლარიშვილის გუნდმა "ტულევიკს" 1:0 მოუგო. გამარჯვების გოლი სწორედ ბეგლარიშვილმა გაიტანა ტაიმის მიწურულს საჯარიმო დარტყმით. მატჩის საუკეთესო მოთამაშედ სწორედ იგი დაასახელეს.

აზერბაიჯანი

პრემიერლიგა. ქართველთა "საბაილი" სტუმრად "ქიაფაზთან" დამარცხდა - 1:2. ნიკა აფაქიძე მე-60 წუთზე გამოცვალეს, ხოლო თამაზ ცეცხლაძემ შეუცვლელად ითამაშა.

უზბეკეთი
PFL. შოთა არველაძის "ფახთაქორმა" ჩემპიონატი გამარჯვებით დაიწყო - 2:0 დაამარცხა "სოგდიანა".

აშშ

MLS. ვაკო ყაზაიშვილმა ახალი სეზონი ფანტასტიკურად დაიწყო - მან "მინესოტასთან" გოლი და 2 საგოლე პასი მიითვალა. ჩვენებური 88-ე წუთზე გამოცვალეს. მანამდე კი "სან ხოსეს" ქართველმა ვარსკვლავმა მოედანზე ნამდვილი შოუ მოაწყო. "სან ხოსემ" ჩემპიონატი მოგებით დაიწყო - 3:2.



დღეს ითამაშებენ
* დავით სხირტლაძისა და მათე ვაწაძის "სილკებორგი" "მიდტიულანდს" უმასპინძლებს.
* ლევან მჭედლიძის "ემპოლი" "ფოჯას" ესტუმრება.

ყოველდღიური სპორტული გაზეთი "ლელო"
2244
მკითხველის კომენტარები / 0 /
მსგავსი ამბები
რუბრიკის სხვა სიახლეები