ლევან ზუხბაია: პაპუნაშვილი გერმანიაში რომ არ წასულიყო...

ბოლო დროს გიორგი პაპუნაშვილის პროგრესი თვალსაჩინოა და ამაზე ესპანური მედიაც ლაპარაკობს.

ის ერთ-ერთი გამორჩეულია "სარაგოსას" შემადგენლობაში, რომელიც ლა ლიგაში დასაბრუნებლად იბრძვის. "ლელო" პაპუნაშვილის ესპანური ტრანსფერის ერთ-ერთ შემომქმედს, ლევან ზუხბაიას ელაპარაკა.

ცხადია, ინტერვიუს თემა მხოლოდ პაპუნაშვილის პროგრესი არ ყოფილა. რესპონდენტმა სხვა საინტერესო საკითხებზეც ილაპარაკა...

რამ განაპირობა პაპუნაშვილის პროგრესი...

- დავიწყოთ გიორგი პაპუნაშვილით. მის პროგრესზე ბევრს წერს ესპანური მედია. ცხადია, ხშირად ეხმიანებით მას...

- რა თქმა უნდა, მასთან ყოველდღიური ურთიერთობა გვაქვს. მის პროგრესს ყველა ხედავს, მათ შორის, ძალიან მომთხოვნი ესპანური მედია და გულშემატკივარი.

გიორგი ძალიან ბევრს შრომობს. მისი თვითრწმენის ხარისხი მაღალია და ეს განაპირობებს კიდეც ამ პროგრესს. როცა ფეხბურთელი ამდენს მუშაობს საკუთარ თავზე, შედეგი აუცილებლად იქნება და პაპუნაშვილის მაგალითზე ეს კარგად ჩანს.

- არადა, ადაპტაციის თვალსაზრისით, ყველაფერი მთლად კარგად ვერ მიდიოდა. "სარაგოსას" მთავარმა მწვრთნელმა თქვა, პაპუნაშვილს ესპანური ენის არცოდნა საქმეს ურთულებსო...

- აქ ცოტა სხვაგვარადაა საქმე. მე ვიცი ზუსტად, რომ გიორგის არცერთ თანაგუნდელთან კომუნიკაციის პრობლემა არასოდეს ჰქონია. პირიქით, ისინი ოჯახებით მეგობრობენ ერთმანეთთან. უბრალოდ, ესპანეთშიც და სხვა ტოპსაფეხბურთო ქვეყნებშიც ენის ცოდნას ცოტა სხვანაირად უყურებენ.

ეს არის იმის საშუალება, რომ ფეხბურთელი ბოლომდე გაიხსნას მედიასთან და ასე შემდეგ... იქ არ უყურებენ ენის ცოდნას, როგორც მხოლოდ კომუნიკაციის საშუალებას და ეს გასაგებია. გიორგი სწავლობს ესპანურს და მისი პროგრესი ამ კუთხითაც თვალსაჩინოა.

- რამდენწლიანი კონტრაქტი აქვს გიორგის ესპანურ კლუბთან?

- ეს არის 5-წლიანი კონტრაქტი. თუ გნებავთ, გეტყვით გამოსასყიდ თანხასაც - 20 მილიონი ევრო. ზაფხულში "სარაგოსას" ხელმძღვანელობასთან ერთად აუცილებლად მივუბრუნდებით კონტრაქტის თემას. ვილაპარაკებთ იმის თაობაზე, რომ ხელშეკრულება გახდეს უკეთესი. გიორგი ამას ნამდვილად იმსახურებს თავისი თამაშით.

- არადა, ბევრისთვის მოულოდნელია ფეხბურთელის პროგრესი მას შემდეგ, რაც "ვერდერის" ძირითად გუნდში ვერ მოიკიდა ფეხი...

- სრული პასუხისმგებლობით გეუბნებით - რომ არ წასულიყო გერმანიაში, დიდი ალბათობით, არც ეს პროგრესი იქნებოდა. სწორედ გერმანიაში შეეჩვია გიორგი იმ მოთხოვნებს, რომელსაც ევროპული ფეხბურთი ნებისმიერი მოთამაშის წინაშე აყენებს.

ის სწორედ იქ ჩამოყალიბდა ნამდვილ პროფესიონალად. ხომ ფაქტია, რომ ის "ვერდერის" ძირითად გუნდთან ერთად ვარჯიშობდა. ვთქვათ ისიც, რომ გერმანულმა კლუბმა მის იჯარაში ფული გადაიხადა. თუ ფეხბურთელი არ გჭირდება, ამას არ გააკეთებ. ასე არ არის?

- რა თქმა უნდა... გადავიდეთ ვახტანგ ჭანტურიშვილზე. მასაც ძალიან წარმატებული სეზონი აქვს. ისიც თქვენი ძალისხმევით მოხვდა ევროპაში, კერძოდ, სლოვაკეთში...

- ჭანტურიშვილი მართლაც ძალიან კარგად თამაშობს "ტრნავაში", გუნდის შეუცვლელი ფეხბურთელი და ერთ-ერთი ლიდერია. შემთხვევითი არ არის, რომ სლოვაკეთის ჩემპიონატის პირველი წრის სიმბოლურ ნაკრებშიც მოხვდა. "ტრნავა" ძალიან ახლოს რომაა სლოვაკეთის ჩემპიონობასთან, ამაში მისი დიდი წვლილიც არის. დიდი ალბათობით, ვახტანგს წინ ჩემპიონთა ლიგაზე თამაში ელის.

ახალი გუნდი ჩოჩიშვილისთვის

- ზაფხულში რომელი ფეხბურთელის ტრანსფერზე აპირებთ მუშაობას?

- ბევრი ფეხბურთელი, რომელიც ჩვენთან თანამშრომლობს, ამჟამად დაბინავებულია. ამ დროისთვის ყველაზე აქტუალურია საქართველოს ახალგაზრდული ნაკრების მეკარის, გიორგი ჩოჩიშვილის საკითხი.

როგორც იცით, ის პრაღის "სლავიადან" "ზლატე მორავცეშია" განათხოვრებული. სეზონის ბოლოს დავსხდებით "სლავიას" ხელმძღვანელობასთან სალაპარაკოდ და ვეცდებით, გიორგისთვის ისეთი გუნდი მოვნახოთ, სადაც სისტემატური სათამაშო პრაქტიკა ექნება.

- საინტერესოა, რა მოხდა ჯაბა ჯიღაურთან დაკავშირებით? ის ჯერ "აქტობეში" გადავიდა, მერე კი უცბად "ორდაბასიში" აღმოჩნდა...

- საქმე ისაა, რომ თურქულ შეკრებაზე "აქტობეს" ერთ-ერთ შეხვედრას "ორდაბასის" პრეზიდენტი დაესწრო და იმდენად მოიხიბლა ჯიღაურის თამაშით, გადაწყვიტა მისი გადაყვანა თავის კლუბში... ჯაბა თანდათან ეჩვევა თავის ახალ გუნდს. აგერ, ულამაზესი გოლიც გაიტანა...

- ყაზახურ საფეხბურთო წრეებთან მჭიდრო საქმიანი ურთიერთობა გაქვთ. რას იტყვით იქაურ ჩემპიონატზე?

- იქ დონე მაღალია თუნდაც იმის გათვალისწინებით, როგორი ფეხბურთელებიც თამაშობენ ჩემპიონატში. ოღონდ, ეგ არის, ინფრასტრუქტურა აშკარად გაუმჯობესებას საჭიროებს.

როგორ მოვიძიოთ კერძო ინვესტიცია?

- რისი თქმა შეგიძლიათ საქართველოს ეროვნულ ჩემპიონატზე?

- ძალიან კარგია, ჩემპიონატი რომ შუქდება და ყველა მატჩის ყურება შეგვიძლია. მეორე მხარეა საშემსრულებლო ოსტატობა. ჩემი აზრით, საშველი ის არის, რომ მეტი ფული ჩაიდოს ჩვენს კლუბებში, იმატოს კერძო ინვესტიციამ. სახელმწიფომ კი პირდაპირ არ უნდა დააფინანსოს კლუბები, მან უნდა მოამზადოს ინფრასტრუქტურა და ნიადაგი კერძო ინვესტორის მოსასვლელად. ფედერაციას კი კონტროლის მეტი მექანიზმი უნდა ჰქონდეს.

- და მაინც, როგორ უნდა მოვიზიდოთ კერძო ინვესტორი? მხოლოდ ინფრასტრუქტურაა პრობლემა?

- ფაქტია, ამის გარეშე არაფერი გამოვა. საკანონმდებლო დონეზეა საჭირო ინიციატივები. უხეშად რომ ვთქვათ, მთელ მსოფლიოში ფეხბურთი თანდათან ძვირდება, საქართველოში კი იმაზე ნაკლები ხელფასებია, ადრე რომ იყო.

- როგორ ფიქრობთ, ერთი "თავკომბალა" გუნდით შესაძლებელია ევროასპარეზზე წარმატებაზე ფიქრი?

- მე მაინც მგონია, რომ საქმისადმი ასეთი მიდგომა ძველი, საბჭოთა გადმონაშთია და მას არ უნდა მივბაძოთ. ჩვენ არ უნდა ვსდიოთ ერთ "თავკომბალა" გუნდს. გასაგებია, რომ არის ამის მაგალითები - ბატე, "შერიფი", ვარდარი"... სხვებიც... მაგრამ მე მომხრე ვარ იმის, რომ ჩემპიონატში რამდენიმე ძლიერი კლუბი იყოს.

- "ვარდარი" ახსენეთ. მაკედონიურ კლუბს ძალიან კარგად იცნობთ. ჯაბა ჯიღაურის დიდი ძალისხმევით ეს გუნდი ამ ქვეყნის ფეხბურთის ისტორიაში პირველად გავიდა ევროპალიგის ჯგუფურ ეტაპზე. საინტერესოა, რის ხარჯზე მიაღწია "ვარდარმა" ამას?

- მთავარი ფაქტორია სტაბილურობა. გუნდმა 3 წლის განმავლობაში შეინარჩუნა შემადგენლობა. აქ თამაშობდა მაკედონიის ნაკრების არაერთი ფეხბურთელი, სომხეთის ეროვნული გუნდის მოთამაშეები...

კლუბის ბიუჯეტი კი დაახლოებით 8 მილიონი ევრო იყო. მე არ ვამბობ, რომ 8 მილიონი საკმარისია ევროთასების ჯგუფურ ეტაპზე მოსახვედრად, მაგრამ "ვარდარმა" დაამტკიცა - გუნდურობით, ერთიანობით რომ ასეთი შესაძლებელია. ანუ, პრეცედენტი არსებობს. თან არ დაგავიწყდეთ, მათ თვით "ფენერბაჰჩე" გამოთიშეს ასპარეზობიდან.

- თქვენი აზრით, რამდენი უნდა იყოს ქართული კლუბის ბიუჯეტი, რომ მან რეალურად განაცხადოს პრეტენზია ევროტურნირების ჯგუფში მოხვედრაზე?

- მიფიქრია ამაზე და გეტყვით ჩემს აზრს. არ არის საჭირო კოლოსალური ბიუჯეტი. ყველა კლუბს საშუალოდ 3 მილიონის ფარგლებში რომ ჰქონდეს ბიუჯეტი და 3 წლის განმავლობაში შეინარჩუნოს შემადგენლობა, ერთად ვნახავთ, რა შედეგიც დადგება. ჩვენთან არის ადგილობრივი რესურსი.

ესპანელები მოდიან...

- რა ვუყოთ იმას, რომ საქართველოდან ფეხბურთელები გარბიან?

- ამას ორი მხარე აქვს. საქართველოს ჩემპიონატში მაქსიმუმს რომ მიაღწევს ფეხბურთელი, უმჯობესია, წავიდეს. ჩვენ ხომ ნაკრების პრიზმაშიც უნდა შევხედოთ საკითხს. ფაქტია, თუ ფეხბურთელს გამოეპარა წასვლის დრო, მას რეგრესი დაეწყება.

- ხომ არ არის მოსალოდნელი, რომ ახლო მომავალში საქართველოში რომელიმე ქვეყნიდან ფეხბურთელებზე დასაკვირვებლად ჩამოვიდნენ?

- მოდი, გაგიმხელთ ექსკლუზიურად: მაისის შუა რიცხვებისთვის ველოდებით დელეგაციას "სარაგოსადან".

- საინტერესოა... როგორ ფიქრობთ, არიან საქართველოს ჩემპიონატში ისეთი ფეხბურთელები, რომელთაც შეუძლიათ, არ დაუშვან დაბლა ის თამასა, რომელიც ჩვენებურებმა ესპანეთში საკმაოდ მაღლა ასწიეს?

- არიან ასეთი ფეხბურთელები, თუმცა ახლა მათ დაკონკრეტებას მოვერიდები...

ყოველდღიური სპორტული გაზეთი "ლელო"
2247
მკითხველის კომენტარები / 0 /
მსგავსი ამბები
რუბრიკის სხვა სიახლეები
;