ლევან ზუხბაიას ინტერვიუ: 'სარაგოსა' პაპუნაშვილს გაყიდის თუ...

გუშინ “ლელო” SmartBall Sports Management-ის ერთ-ერთ დამფუძნებელ ლევან ზუხბაიას დაუკავშირდა. ეს სააგენტო არაერთ ქართველ ფეხბურთელს ეხმარება კარიერის აწყობაში. მათ შორის არიან საქართველოს ნაკრების მოთამაშეები. 

რა თქმა უნდა, მკითხველს გამორჩეულად აინტერესებს მათი ბედი. აქედან გამომდინარე, საინტერესოა, რომელი მათგანი აპირებს კლუბის შეცვლას და რომელი დარჩება ამჟამინდელ გუნდში...

- დავით ვოლკოვის პროგრესი თვალსაჩინოა. აზერბაიჯანში მას გოლი გოლზე გააქვს. ბოლოს თასის ნახევარფინალში გაუტანა “ყარაბაღს” და ფინალში გაიყვანა “გაბალა”. არ გაგვიკვირდება, მის მიმართ ზაფხულში ინტერესი რომ იყოს. ასეა?

- “გაბალაში” მას ჯერ მაინც ახალი დაწყებული აქვს თამაში. ძალიან კარგ გუნდშია, სადაც ბოლომდე სჯერათ მისი. თავად დათოც კმაყოფილია და თავს შესანიშნავად გრძნობს. “გაბალა” სწორედ ის კლუბია, სადაც მას ეძლევა შესაძლებლობების ბოლომდე გამოვლენის საშუალება.

- ვახტანგ ჭანტურიშვილზე ვთქვათ. არის მის მიმართ ინტერესი?

- “ზლინში” ახლახან შეიცვალა მწვრთნელი. ჭანტურიშვილი ამ კლუბში გადავიდა იმ მიზნით, რომ იყოს ისეთივე ლიდერი, როგორიც იყო “ტრნავაში”. ეს მას ნამდვილად შეუძლია. ასე რომ, ვახო რჩება “ზლინში” და მჯერა, ის დაამტკიცებს, რომ შეუძლია ლიდერობა. ოღონდ, უნდა გავითვალისწინოთ ისიც, რომ ჩეხური ლიგა მინიმუმ ერთი თავით მაღლა დგას სლოვაკურზე.

- ლევან გრძელიძე თქვენი მეშვეობით მოხვდა “სარაგოსაში”. რამდენადაც ვიცით, ის თბილისშია და მკურნალობს...

- დიახ, ლევანი ახლა თბილისშია და რეაბილიტაციას გადის ოპერაციის შემდეგ. მინდა, თქვენი გაზეთის მეშვეობით დიდი მადლობა ვუთხრა ექიმ მერაბ ვარძუკაშვილს - თავისი საქმის დიდ პროფესიონალს, რომელსაც ყველა ქართველი ფეხბურთელი ემადლიერება, ვისაც მასთან ჰქონია შეხება! მერაბს უდიდესი ავტორიტეტი აქვს უცხოეთშიც.

როცა “სარაგოსას” ხელმძღვანელობას ვუთხარი, რომ გრძელიძე სარეაბილიტაციო პერიოდის მნიშვნელოვან ნაწილს გაივლიდა საქართველოში ვარძუკაშვილის მეთვალყურეობის ქვეშ, იქ არანაირი კითხვა აღარ დასმულა. მერაბთან ძალიან დიდი ხნის ურთიერთობა მაქვს, ერთად ვიყავით თბილისის “დინამოში”. ჩვენი ურთიერთობა სცდება მხოლოდ სამსახურს, ვამაყობ, რომ ის ჩემი მეგობარია...

ლევანს დავუბრუნდები. მან ჯვარედინი იოგის ოპერაცია გაიკეთა. ეს არის ზუსტად ისეთი ოპერაცია, რომელიც რამდენიმე დღის წინ გაიკეთა გიორგი ჩაკვეტაძემ. ორი თვის განმავლობაში იქნება საქართველოში, ივნისის ბოლოს კი ესპანეთში გაემგზავრება და იქ გააგრძელებს სარეაბილიტაციო კურსს. მოედანზე მის დაბრუნებას აგვისტოს ბოლოსთვის უნდა ველოდოთ. რაც მთავარია, ისე მიდის სარეაბილიტაციო პერიოდი, უკეთესს რომ ვერც ვინატრებდით.

- რომელ გუნდში დაბრუნდება გრძელიძე?

- ჩემი აზრით, თავდაპირველად ეს იქნება “სარაგოსა B”, მაგრამ შორს არ არის ის დრო, როცა ლევანი ძირითადი გუნდის მაისურასაც მოირგებს. პირველ და მეორე გუნდებს შორის “სარაგოსაში” ძალიან პატარა ზღვარია. საკმარისია, ფეხბურთელმა პირველ გუნდში თავი გამოიჩინოს, რომ მას ეგრევე მთავარ გუნდში აწინაურებენ. რაც მთავარია, ძალიან ეიმედებათ გრძელიძისა “სარაგოსაში”. მას მართლაც ყველანაირი მონაცემი აქვს იმისთვის, რომ დიდი ფეხბურთი ითამაშოს.

- ესპანურ პრესაში პერიოდულად ჩნდება ხოლმე ინფორმაცია, რომ ზაფხულში “სარაგოსა” გიორგი პაპუნაშვილის გაყიდვას აპირებს...

- 100 პროცენტით მინდა დაგარწმუნოთ, რომ ამ ეტაპზე პაპუნაშვილის გაყიდვას არ აპირებენ. კი ბატონო, ფეხბურთში ვერასოდეს ვერაფერს გამორიცხავ, მაგრამ ეს მოხდება მხოლოდ იმ შემთხვევაში, თუ იქნება სოლიდური წინადადება რომელიმე ძლიერი გუნდიდან. ასეთ სიტუაციაში გიორგის “სარაგოსა” ხელს ნამდვილად არ შეუშლის. ამ სეზონში მას ბევრი გაუცდა, მაგრამ მერწმუნეთ, კლუბის ხელმძღვანელობას მისი ძალიან ეიმედება და გუნდისთვის საკვანძო ფეხბურთელად მიაჩნია. სამწვრთნელო შტაბიც ნელ-ნელა აჩვევს მინდორს. აგერ, “დეპორტივოსთან” 55 წუთი ითამაშა. გიორგი თანდათან უახლოვდება ოპტიმალურ ფორმას.

- საინტერესოა, რა ხდება ჯაბა ჯიღაურის თავს. მას სათამაშო პრაქტიკა აკლია...

- პირდაპირ შემიძლია გითხრათ, რომ ჯაბა ძალიან დიდი ალბათობით დატოვებს ფრანგულ “გრენობლს” და სხვაგან გააგრძელებს კარიერას. აქ ძალიან სპეციფიკური სიტუაცია შეიქმნა. ამ კლუბში ჯიღაური მთავარი მწვრთნელის უშუალო ინიციატივით მოხვდა, არადა, სწორედ ამ მწვრთნელის ხელში აკლია სათამაშო პრაქტიკა. ჩვენ მას ასეთ რთულ ვითარებაში ნამდვილად ვერ მივატოვებთ, მით უმეტეს, ჯიღაური საქართველოს ნაკრების ფეხბურთელია და, ცხადია, მას სჭირდება სათამაშო პრაქტიკა. ჯაბა ვარჯიშებზე თავს არ ზოგავს. მას აქვს, როგორც იტყვიან, ფეხბურთელისთვის იდეალური ხასიათი, მაგრამ ხდება ხოლმე ასე. რაღაც ვერ აეწყო... 

- რაკი ამბობთ, “გრენობლს” დატოვებსო, ალბათ, ჯიღაურს აქვს კონკრეტული შეთავაზება...

- ამ ეტაპზე, სიმართლე გითხრათ, არ არის ისეთი ვარიანტი, სერიოზულ განსჯად რომ ღირდეს, მაგრამ ჯერ კიდევ არის დრო სატრანსფერო “ფანჯრის” გახსნამდე...

- რას იტყვით პოსტსაბჭოთა სივრცეში მოასპარეზე ქართველ ფეხბურთელებზე, რომლებთანაც თანამშრომლობთ?

- ლატვიურ “იელგავაში” თამაშობენ გურამ ლუკავა და ირაკლი ბიძინაშვილი. ისინი გუნდის ლიდერები არიან. ბელარუსის “ნემანში” თამაშობს გიორგი ქანთარია და ყველაფერს გავაკეთებთ იმისთვის, რომ მან უკეთეს გუნდში გააგრძელოს კარიერა.

- თუ აპირებთ ზაფხულში ისეთი ტრანსფერის განხორციელებას, რომელიც ძალიან გაახარებს ქართული ფეხბურთის გულშემატკივარს?

- წინასწარ ლაპარაკი ძალიან ძნელია, როცა საქმე ტრანსფერებს ეხება. ყოველ შემთხვევაში, ჩვენ ვმუშაობთ ამაზე... მიზნად გვაქვს, ქართველი ფეხბურთელები, რაც შეიძლება, ძლიერ კლუბებში წავიდნენ სათამაშოდ და ამით უფრო მეტად გამოადგნენ საქართველოს ნაკრებს.

- ევროტურნირები ახლოვდება. რომელიმე ქართულმა კლუბმა ხომ არ მოგმართათ თანამშრომლობის სურვილით?

- არა, ასეთი რამ ჯერ არ ყოფილა...

ყოველდღიური სპორტული გაზეთი "ლელო"
4236
მკითხველის კომენტარები / 2 /
წვიმა იყო
0
მიხოც ეგრეა ხოლმე საზამთროს მოსავალზე, თუ საბურთალოზე ვერა, მაშინ ბორჯომში წავალ, იქაც ვერა? მერე ქობულეთში და ამ კატაობაში გაიყიდება მა რა ჯანდაბა მოუა ჯოო!!!
yyy
0
ადმინ ამ კაცს არაფერს ვერჩი, მარა ჩვენი ნაკრების ფეხბურთელების აწუყობილი კარიერა სად ნახე?დდდდდ
მსგავსი ამბები
რუბრიკის სხვა სიახლეები
;