ლევან თედიაშვილი 70 წლისაა!

უდიდესი ქართველ ფალავანი, ორგზის ოლიმპიური და ხუთგზის მსოფლიო ჩემპიონი ლევან თედიაშვილი 70 წლისა მოიყარა.

ქართული სპორტის ახალგაზრდა გულშემატკივართათვის ლევან თედიაშვილი ქართული სპორტის ლეგენდაა, ხოლო ძველ გულშემატკივრებს, მისი დიდი სპორტული გამარჯვებების უშუალო მოწმეებს, კარგად ახსოვთ ლევანის ჭიდაობის სანახავად თბილისის სპორტის სასახლეში შეკრებილი ათასობით ქომაგის ხმაშეწყობილი შეძახილი - არა! არა! არა! - აქაოდა, მეტოქე ჯერ არ წააქციო, ცოტა ხანს კიდევ გვაყურებინე შენი ჭიდაობაო!

ძველ გულშემატკივრებს კარგად ახსოვთ, ხოლო ახალგაზრდები წიგნებში კითხულობენ, როგორ სთხოვეს ლევანს საბჭოთა სამბისტთა ნაკრების მწვრთნელებმა თავისუფალ ჭიდაობაში მსოფლიო ჩემპიონატის მოგების შემდეგ, შენს წონაში კაცი ავად გაგვიხდა და იქნებ, ორი დღითაც დარჩე თეირანში და სამბოშიც იჭიდავოო და როგორ მოიგო ლევანმა იმ წელიწადს, 1973-ში, სამბოს მსოფლიო ჩემპიონატის ოქროს მედალიც.

    [ლეგენდების კვალდაკვალ] ლევან თედიაშვილი: რამდენიც გადაიხადეთ იმდენისა ვიჭიდავე!

ძველ გულშემატკივრებს ისიც ახსოვთ, როგორ იხმო ირანის შაჰმა ლევანი მას მერე, რაც მან ხალიჩას გააკრა მისი რჩეული ფალავანი და თავისი ძვირფასი ბეჭედი გადასცა, თან მოაყოლა - რაც გინდა მთხოვეო, და როგორ გამოაშვებინა ლევანმა ციხიდან თავისი ძველი მეტოქე, სახელოვანი ირანელი ფალავანი, რომელიც შაჰის რეჟიმთან დაპირისპირების გამო დაეპატიმრებინათ.

არა მარტო სპორტის გულშემატკივარმა, ყველამ, ვისაც საქართველოსთვის გული შესტკივა, კარგად იცის, როგორ გაჰყვა ლევანი აფხაზეთში მოხალისედ წასულ თავის ვაჟს, ვახტანგ თედიაშვილს იმ სასტიკ ომში და როგორ ჩააკვდა მამას შვილი ხელებში.

ყველამ იცის, როგორი იყო და როგორია ლევანი - სპორტსმენი, ლევანი - კინომსახიობი, ლევანი - კაკაბეთის კოლმეურნეობის თავმჯდომარე, ლევანი - კახეთის გუბერნატორი, ლევანი - საქართველოს სამბოს ფედერაციის პრეზიდენტი, ლევანი - საქართველო ვეტერან ოლიმპიელთა ფონდის პრეზიდენტი, ლევანი - საქართველოს პარლამენტის წევრი, ლევანი - მეუღლე, ლევანი - მამა, ლევანი - პაპა, ლევანი მეგობარი, ლევანი ქველმოქმედი.

ლევან თედიაშვილის 1972 და 1976 წლების ოლიმპიური ოქროს მედლები და 1971, 1973, 1974, 1975 წლების მსოფლიოს ჩემპიონის ტიტულები მხოლოდ აისბერგის წვერია.

ამ უმაღლეს ტიტულებთან ერთად ლევანი ფლობდა ევროპის სამგზის ჩემპიონის ტიტულს თავისუფალ ჭიდაობაში; იყო მსოფლიოს ვიცე-ჩემპიონი, საბჭოთა კავშირის სამგზის და საბჭოთა კავშირის სპარტაკიადის ჩემპიონი, საერთაშორისო ტურნირების არაერთგზის გამარჯვებული.

ლევან თედიაშვილმა მთელი ეპოქა შექმნა თავისუფალი ჭიდაობის ისტორიაში. 2005 წლიდან იგი ფილას დიდების დარბაზის წევრია.
სახელოვანი ფალავანი დაჯილდოებულია მრავალი ორდენით, რომელთა შორისაცაა ოლიმპიური ორდენი, ვახტანგ გორგასლის ორდენი, ღირსების ორდენი, სეოკის ორდენი და სხვა.

საქართველოს ეროვნული ოლიმპიური კომიტეტი, მთელი ქართული ოლიმპიური ოჯახი გულითადად ულოცავს ლევან თედიაშვილს 70 წლის იუბილეს და უსურვებს მას ჯანმრთელობას, ხანგრძლივ სიცოცხლეს და ბედნიერებას.

საქართველოს ეროვნული
ოლიმპიური კომიტეტი

ყოველდღიური სპორტული გაზეთი "ლელო"
1484
მკითხველის კომენტარები / 0 /
მსგავსი ამბები
რუბრიკის სხვა სიახლეები