ლევან კაკუბავა და უკრაინელი მეკარე - 'საბურთალომ' სეზონისთვის მზადება დაიწყო

„საბურთალომ“ სეზონისთვის მზადება დაიწყო - საქართველოს ჩემპიონის შემადგენლობაში რევოლუციური ცვლილება არ მომხდარა, მაგრამ სიახლეების გარეშე არც აქ არის.

გუნდი ორივე მეკარემ დატოვა - ლაზარე კუპატაძემ და ბექა ქურდაძემ, ასევე, ნოდარ იაშვილმა, გიორგი რეხვიაშვილმა, დიმიტრი ტატანაშვილმა, დავით ვოლკოვმა და დავით თარგამაძემ.

„საბურთალომ“ ჯერ მეკარე ომარ მიგინეიშვილი დაიმატა, შემდეგ - ინტერს გიი, ხოლო „ზამთრის თასზე“ კლუბის აღმასრულებელმა დირექტორმა კახა კაშიამ ორი ახალწვეული წარადგინა - საქართველოს ჩემპიონის ღირსებას ამიერიდან ლევან კაკუბავა და დენის შელიხოვი დაიცავენ.

ლევან კაკუბავამ კარიერა თბილისის „დინამოდან“ დაიწყო. იყო საქართველოს 19 და 21-წლამდელთა ნაკრების წევრი, 3-ჯერ კი ეროვნული ნაკრების ფორმაც მოირგო. 28 წლის ცენტრალური მცველი ბოლოს საჩხერის „ჩიხურაში“ გამოდიოდა და გუნდის ლიდერიც გახლდათ. მისი პლუსი გამოცდილების გარდა ისიცაა, რომ შეუძლია როგორც ცენტრალურ მცველად თამაში, ასევე - საყრდენად.

რაც შეეხება 29 წლის შელიხოვს, ის უკრაინელი მეკარეა და დნეპროპეტროვსკის „დნიპროს“ საფეხბურთო აკადემიის აღზრდილია. უკრაინის პრემიერლიგაში, „დნიპროს“ გარდა, ლუცკის „ვოლინში“ უთამაშია. 2017 წელს ბელარუსში გადავიდა და ჯერ იქაური პრემიერლიგის ბინადარ „ისლოჩში“ გამოდიოდა, ხოლო 2018 წლიდან - მინსკის „ლუჩის“ კარს იცავდა. იყო უკრაინის ახალგაზრდული ნაკრების წევრი.

„საბურთალოს“ აღმასრულებელი დირექტორის, კახა კაშიას ცნობით, ორივე ახალწვეულმა თბილისურ კლუბთან 2-წლიანი ხელშეკრულება გააფორმა.

ყოველდღიური სპორტული გაზეთი "ლელო"
607
მკითხველის კომენტარები / 0 /
მსგავსი ამბები
რუბრიკის სხვა სიახლეები
;