ლევან კობიაშვილი პოსტპანდემიურ ქართულ ფეხბურთზე... რა გველის და რას უნდა ველოდეთ

ეროვნული ლიგის განახლება, ბელარუსთან უმნიშვნელოვანესი ნახევარფინალური დაპირისპირება, სანაკრებო კალენდარი - ეს ის თემებია, რის შესახებაც საქართველოს ფეხბურთის ფედერაციის პრეზიდენტ ლევან კობიაშვილს ველაპარაკეთ...

ინტერვიუ უკვე ჩაწერილი იყო, როცა გაირკვა ეროვნული ლიგის განახლების თარიღი - 25 ივნისი. ამაზე ცალკე წერილში ვილაპარაკებთ. აქ კი შეგახსენებთ, რომ ახალ სეზონში მხოლოდ 2 ტურია ნათამაშები. ბოლოს მატჩი 8 მარტს ჩატარდა და 6 ქულით პირველ ადგილზე თბილისის "ლოკომოტივია".

ჩემპიონატის ფორმატი შეიცვლება და ოთხის ნაცვლად, სეზონი 2 წრედ ჩატარდება. ანუ, გუნდები 36-ის ნაცვლად, 18-18 მატჩს ჩაატარებენ, პირველ ეტაპზე - გულშემატკივრების გარეშე...

ჯერ ტესტირება...

ლევან კობიაშვილის თქმით, ჩემპიონატის განახლებამდე გუნდებს ფეხბურთის ფედერაცია დაეხმარება:

"სამინისტროსთან, მთავრობასა და შესაბამისი დარგის სპეციალისტებთან აქტიურად ვთანამშრომლობთ. ვმუშაობთ სპეციალურ პროტოკოლზე, რომლის მიხედვითაც გუნდები ივარჯიშებენ და შემდეგ ითამაშებენ. მოთამაშეთა და პერსონალის ტესტირებას კი ფეხბურთის ფედერაცია უზრუნველყოფს, რათა ისინი დაცულები იყვნენ. იმედი მაქვს, ვარჯიშისა და თამაშის უფლებას მალე მოგვცემენ, შესაძლოა, უახლოეს დღეებშიც".

ეროვნული ლიგა 25 ივნისს განახლდება!

საქართველო-ბელარუსი ოქტომბერში?

ჯერაც უცნობია, როდის გაიმართება საქართველოსა და ბელარუსის ნაკრებთა შორის ერთა ლიგის ნახევარფინალური მატჩი. პანდემიის გამო, უეფამ ეს მატჩები ჯერ ივნისისთვის გადადო, შემდეგ კი - სექტემბრისთვის, მაგრამ... საბოლოო გადაწყვეტილება მაინც ვერ მიიღო.

ლევან კობიაშვილს ამ მატჩის გამართვის შესაძლო თარიღზეც ვკითხეთ: "თარიღზე ჯერ უეფაც არ არის ჩამოყალიბებული. ამის გამო იყო, რომ 27 მაისიდან 17 ივნისისთვის გადაიტანეს. აქ არის დასადგენი 2 საკითხი - სანაკრებო და ეროვნული ჩემპიონატების, მათ შორის, ევროსაკლუბო ტურნირების, კალენდრები. არსებობს შესაძლო ვარიანტი, რომ საქართველო-ბელარუსის მატჩი ოქტომბრის დასაწყისში გაიმართოს. თუმცა, უეფას კიდევ რამდენიმე ვარიანტი აქვს. როგორც ჩანს, ელოდებიან, როგორი ვითარება იქნება ევროპაში ეპიდემიის მხრივ და გადაწყვეტილებას ამის მიხედვით მიიღებენ. მაგრამ, დიდი ალბათობით, ერთა ლიგის ნახევარფინალი ოქტომბერში გაიმართება, რაც ჩვენთვის იდეალური ვარიანტი არ არის", - ამბობს კობიაშვილი.

ქართული ალტერნატივა

სფფ-ის პრეზიდენტისვე თქმით, ამის მიზეზი უეფას სურვილია, რომ შემოდგომაზე ერთა ლიგის თამაშები მჭიდრო გრაფიკით გამართოს: "იცით, რომ ერთა ლიგის ახალი გათამაშება შემოდგომაზე უნდა დაიწყოს და სექტემბერში, ოქტომბერსა და ნოემბერში 2-2 თამაში უნდა გაიმართოს, ანუ - 6 მატჩი. თანაც, ერთა ლიგის პირველი გათამაშების ნახევარფინალები და ფინალები ამ სამ თვეში უნდა ჩაჯდეს. გამოდის, რომ ამ მატჩების გადადების გამო, ანუ უეფა შემოდგომაზე ამ 6 სანაკრებო მატჩს პლეი ოფის 2 მატჩს დაამატებს. ასე რომ, სანაკრებო კალენდარი ძალიან შემჭიდროებული იქნება...

თუმცა, უეფა სხვა ვარიანტებზეც მუშაობს. ერთ-ერთი ჩვენც შევთავაზეთ - თუ როგორ შეიძლება ამ მატჩების გადანაწილება ისე, რომ ერთ კვირაში 3 თამაში არ მოგვიხდეს. ჯერჯერობით, პასუხი არ გვაქვს. ველოდებით. საკლუბო და სანაკრებო კალენდარი, სავარაუდოდ, 17 ივლისს უეფას აღმასკომზე დამტკიცდება".

კობიაშვილი არ მალავს, რომ ასეთი კალენდრით აღტაცებული არ არის: "გამოდის, რომ 6 მატჩის ნაცვლად, უეფა, სავარაუდოდ, 8 შეხვედრას გეგმავს. ნახევარფინალი ოქტომბრის დასაწყისში იქნება, შემდეგ ეგრევე ერთა ლიგის ახალი გათამაშების მატჩებს ჩაატარებს, ანუ - 6 დღეში სამ თამაშს. ეს ჩვენთვის იდეალური არ არის, რადგან ახალი გათამაშების ჯგუფში მეტოქეები უფრო დასვენებულები იქნებიან. უეფას ალტერნატიული წინადადებით ამიტომაც მივმართეთ, თუმცა, ეს საკითხი უეფასთვისაც რთული გადასაწყვეტია, რადგან დაკავშირებულია დიდ თანხებთან, ტელევიზიებთან და მათთან დაკავშირებულ შემოსავლებთან - განსაკუთრებით იმ დიდი გუნდების ინტერესებთან, რომლებიც A დივიზიონში თამაშობენ. მათ არ სურთ, რომ სექტემბერ-ოქტომბერში 3-3 მატჩი ჩაატარონ და ნოემბერში მატჩი აღარ ითამაშონ. მათი ინტერესი ამ თამაშების სამ თვეზე გადანაწილებაა".

ვაისისთვის ეს მნიშვნელოვანი იყო...

კობიაშვილმა ეროვნული ნაკრების მთავარ მწვრთნელ ვლადიმირ ვაისთან კონტრაქტის გახანგრძლივების დეტალებზე ილაპარაკა.

"საერთოდ, ორი მხარე ყოველთვის ცდილობს, რომ მისთვის სასარგებლო ხელშეკრულება გააფორმოს. მაგრამ ამ შემთხვევაში დასტურდება, რამდენად მნიშვნელოვანი იყო ვაისისთვის ეს ხელშეკრულება და როგორ სჯერა მას ჩვენი ნაკრების და მისი წარმატების. გვიხარია, რომ ის ჩვენთან არის და იმ გზას, რომელსაც წლების წინ დავადექით, არ გადავუხვევთ და ბოლომდე ღირსეულად მივიყვანთ".

დარჩა! ვლადიმირ ვაისმა საქართველოს ნაკრებთან ახალი კონტრაქტი გააფორმა

სფფ-ის პრეზიდენტის თქმით, სლოვაკ სპეციალისტთან შეთანხმება იოლი არ ყოფილა: "ვერ ვიტყვი, რომ შეთანხმება იოლი იყო, რადგან მარტის შემდეგ ვლადიმირ ვაისთან კონტრაქტი აღარ გვქონდა, ის ჩვენი გუნდის მწვრთნელი აღარ იყო. მასთან ახალი კონტრაქტი 1 ივლისიდან გაფორმდა და წლის ბოლომდეა გათვლილი. ხელშეკრულება ჩვენთვისაც რთულია, რადგან ბელარუსთან მატჩი შემოდგომაზე დაინიშნა, მაგრამ რეალობაში ზუსტი თარიღი მაინც არავინ ვიცით. გრძელვადიანი ხელშეკრულების გაფორმება ამიტომაცაა რთული. წლის ბოლომდე შეთანხმებით ორივე მხარე კმაყოფილები ვართ. ეს პლეი ოფის მატჩსა და ერთა ლიგის ახალ გათამაშებას მოიცავს. შემდეგ შევხედავთ, რა და როგორ იქნება".

კობიაშვილის თქმით, ვაისის ნაცვლად სხვა კანდიდატურა არც განიხილებოდა: "სხვა კანდიდატთან მოლაპარაკება არც გვქონია. კონტრაქტი კი იყო დასრულებული, მაგრამ შინაგანი განწყობა მქონდა, რომ ვაისი ისევ "ჩვენი" მწვრთნელი იყო. წარმოიდგინეთ, აპრილი, მაისი და ივნისი კაცი შემოსავლის გარეშე იყო და ხვდებით, მარტივი არ იქნებოდა. ამის მიუხედავად, სხვაგან არ წასულა, რადგან ჩვენი ნაკრების სჯერა. ვაისის ასეთი დამოკიდებულება დასაფასებელია და მას მადლობა უნდა გადავუხადოთ".

ბევრ ღონისძიებას ვგეგმავდით...

სფფ-ის პრეზიდენტმა კომენტარი გააკეთა საქართველოს ეროვნული ნაკრების პირველ მატჩზე და, ზოგადად, დამოუკიდებელი ქართული ფეხბურთის 30 წლის იუბილეზეც.

"დამოუკიდებელი ქართული ფეხბურთისთვის და ფეხბურთის ფედერაციისთვის მნიშვნელოვანი წელი და თარიღია. ამასთან დაკავშირებით, ჩვენ წელს ბევრი აქტივობა გვქონდა დაგეგმილი. თუმცა, პანდემიიდან გამომდინარე, ამ გეგმას ვერ ვახორციელებთ. თუმცა, ყველაზე მნიშვნელოვანი პლეი ოფის მატჩებია. რა თქმა უნდა, დიდი სურვილი იყო, რომ წარმატებისთვის ნაკრებს მანამდე მიეღწია. ამის გამო თვითკრიტიკულებიც უნდა ვიყოთ, რომ ეს აქამდე ვერ შევძელით. მაგრამ გვაქვს იმის რეალური შესაძლებლობა, რომ საიუბილეო თარიღი ღირსეულად აღვნიშნოთ. მე მჯერა ჩვენი გუნდის, მოთამაშეების და თითოეული იმ ადამიანის, რომელიც ქართულ ფეხბურთს ემსახურება", - ამბობს კობიაშვილი.

2408
მკითხველის კომენტარები / 0 /
მსგავსი ამბები
რუბრიკის სხვა სიახლეები
;