ლევან კორღალიძე  ფეარ პლეის  დარღვევას უარყოფს... - 'დინამიკურ ეპიზოდში უცებ ვინ იფიქრებდა,  რომ მეკარეს კუნთი დაეჭიმა?!'

თბილისის "ლოკომოტივმა" სენსაცია მოახდინა ეროვნული ლიგის XIII ტურში თბილისის "დინამო" ქვეყნის მთავარ სპორტულ არენაზე 3:1 დაამარცხა. 

ლოკომოტივის მთავარი მწვრთნელი ლევან კორღალიძე დამოუკიდებელ საქმიანობას ცოტა ხნის წინ შეუდგა ის "ლელოსთან" არ მალავს, რომ თავდაჯერებულობა მასაც სჭირდება.

- რა თქმა უნდა, ამ შეხვედრის მოგება ჩვენთვის, და პირადად ჩემთვისაც, ძალიან ბევრს ნიშნავდა. მიმდინარე სეზონში მეოთხედ მოვიგეთ, მაგრამ “დინამოსთან” გამარჯვებას მაინც სხვა ფასი აქვს. 

- თქვენი აზრით, გამარჯვება რის ხარჯზე მოიპოვეთ?

- “დინამოს” თამაშები დეტალურად გავაანალიზეთ და რადგან მოვიგეთ, გამოდის, რომ კონკრეტულად ეს თამაში სწორადაც დავგეგმეთ. მაგრამ მთავარი მაინც შემსრულებლები არიან. მათ გარეშე ვერანაირი გეგმა ვერ განხორციელდებოდა. ფეხბურთელებმა ეს გეგმა მაღალ დონეზე შეასრულეს, რის გამოც მათ მადლობას ვუხდი. რა თქმა უნდა, ხარვეზები გვქონდა, მაგრამ იდეალურები ჩვენზე ბევრად ძლიერი გუნდებიც არ არიან. მთავარი ისაა, რომ ამ შეხვედრაში გამოჩნდა ჩვენი ხაზი, საითკენაც მივდივართ - სანახაობრივი, შედეგიანი და ხარისხიანი თამაში.

- პირველი გოლი მაშინ გაიტანეთ, როცა “დინამოს” მეკარე დაშავდა და მოედანზე წაქცეული იყო. გიორგი ლორიამ “ფეარ პლეის” პრინციპის დარღვევაზე პოსტიც გამოაქვეყნა...

- ცოტა სხვაგვარად შევხედოთ მომხდარს: სამურკასოვი კარისკენ რომ დაიძრა, მეკარე წაიქცა და ეგონა, ფეხი დაუსრიალდა - ასეთ დროს თამაშს არავინ აჩერებს. ეს მერე გაირკვა, რომ სიკაჩი დაშავდა, თორემ ამ დინამიკურ ეპიზოდში უცებ ვინ იფიქრებდა, რომ მეკარეს კუნთი დაეჭიმა? ამას შეგნებულად არავინ გააკეთებს.

- ერთი მოგების შემდეგ გუნდი ფრენას ვერ დაიწყებს, მაგრამ “დინამოს”, “ტორპედოსა” და “ჩიხურას” მომგები გუნდი მე-8 ადგილზე არ უნდა იმყოფებოდეს... 

- დრო გვაჩვენებს, “დინამოსთან” მოგება მოთამაშეებზე რა გავლენას მოახდენს. ჩემი აზრით, ამით ბიჭები უფრო თავდაჯერებულები გახდებიან, რაც მათ აუცილებლად სჭირდებათ. დათრგუნვილები ვიყავით, მაგრამ ტაქტიკასა და წმინდა სპორტულ მხარესთან ერთად ბიჭების ფსიქოლოგიაზეც ბევრს ვმუშაობდით. ჩემი აზრით, ახლანდელი “ლოკომოტივი” გაცილებით მაღალ ადგილს იმსახურებს. 

- ერთმა მოგებამ ორი ადგილით ისედაც დაგაწინაურათ...

- ...მაგრამ გუნდს, სადაც ძალიან საინტერესო ახალგაზრდები და თან საკმაოდ გამოცდილი მოთამაშეებიც არიან, მეტი შეუძლია. ჩვენ ამ პოტენციალის მაქსიმალურ გამოწურვაზე ვმუშაობთ. იმედია, შემდეგ შეხვედრებში დავამტკიცებთ, რომ “დინამოსთან” შემთხვევით არ მოგვიგია. საქმე მარტო ის არ არის, რომ ფავორიტთა ჯგუფის გუნდები დავამარცხეთ. ბათუმის “დინამოსთან” დავმარცხდით, მაგრამ ბიჭებმა კარგი ფეხბურთი აჩვენეს და წაგებას არ ვიმსახურებდით. 

- ეს იმაზე მეტყველებს, რომ მოთამაშეები სხვა მატჩებს ასეთივე მოტივაციით არ თამაშობენ?

- ვერ დაგეთანხმებით. მოთამაშეთა მოტივაცია სწორედაც რომ ყველაზე ნაკლებად გვჭირდება. ისინი ყველა მატჩს მონდომებით ატარებენ. ეგაა, ყველა თამაშს ერთნაირად მოტივირებული ვერ ჩაატარებ, რაზეც “ლივერპულთან” “ბარსელონას” მარცხიც მეტყველებს. თავად ფეხბურთელი ვიყავი და ვიცი - შეუძლებელია, ყოველთვის ერთნაირი ემოციური ფონი გქონდეს. მთავარია, სტაბილურად კარგად ვითამაშოთ. მაგრამ ფეხბურთი ყოველთვის ლოგიკას არ ექვემდებარება, ყოველთვის ძლიერი ვერ იგებს...

- “დინამოსთან” ძლიერმა ვერ მოიგო?

- სტატისტიკა მოვიშველიოთ: პირველ ტაიმში ჩვენ კარში და კარისკენ 8-ჯერ დავარტყით, “დინამომ” კი კარის მიმართულებით - მხოლოდ ერთხელ, ჩვენ 3 გოლი გავიტანეთ, მეტოქემ კი - ერთი.

- ყველას აინტერესებს მამია გავაშელიშვილის ამბავი. ეს ნიჭიერი თავდამსხმელი დაბრუნდება ფეხბურთს? 

- ამის დიდი და რეალური იმედი გვაქვს. ის თურქეთში მკურნალობს და 95 პროცენტია შანსი, რომ დაბრუნდეს. ჩვენ მისი გვჯერა და გვეიმედება!

ყოველდღიური სპორტული გაზეთი "ლელო"
704
მკითხველის კომენტარები / 0 /
მსგავსი ამბები
რუბრიკის სხვა სიახლეები
;