ლევან კორღალიძე: ცუდი ის არის, რომ არც ვიცით, რამდენი უნდა დავისვენოთ?! რა პრობლემებს უქმნის ეროვნული ლიგის გუნდებს გამოცხადებული პაუზა

ცნობილია, რომ მსოფლიოსა და ჩვენს ქვეყანაში კორონავირუსთან დაკავშირებით განვითარებული მოვლენებიდან გამომდინარე, საქართველოს ფეხბურთის ფედერაციამ მიიღო გადაწყვეტილება, სფფ-ის ეგიდით გასამართი ყველა ტურნირის, მათ შორის, ეროვნული ლიგის, ლიგა 2-ის, ლიგა 3-ისა და, ასევე, ასაკობრივი ჩემპიონატების 1 აპრილამდე შეჩერების თაობაზე.

ცხადია, გუნდებმა საწვრთნელ პროცესში პაუზა აიღეს. მაგალითად, 11 მარტს "სამტრედიამ" თბილისში, დიღმის სპორტკომპლექსის მოედანზე მორიგი ვარჯიში გამართა და ხანმოკლე შესვენება გამოაცხადა.

"კორონავირუსთან დაკავშირებული მოვლენების გამო, ჩვენი გუნდი დროებით ვარჯიშებს წყვეტს. მოგეხსენებათ, ეროვნული ლიგის მატჩები აპრილამდე არ ჩატარდება", - ვკითხულობთ იმერული კლუბის ოფიციალურ გვერდზე.

მუშაობა კლუბების საფეხბურთო აკადემიებმაც. აი, ერთ-ერთი განცხადება: "ბოლო პერიოდში მსოფლიოსა და, მათ შორის, საქართველოში შექმნილი მდგომარეობის გათვალისწინებით, ასევე, სხვადასხვა უწყების რეკომენდაციის გათვალისწინებით, მივიღეთ გადაწყვეტილება, საჩხერის "ჩიხურას" საფეხბურთო სკოლის ყველა ასაკობრივ გუნდში შეგვეჩერებინა საწვრთნელმ პროცესი 20 მარტამდე. ამ დღეებში იგეგმება სადეზინფექციო სამუშაოების ჩატარება".

ჩემპიონატის შეჩერება განსაკუთრებით მტკივნეული იყო თბილისის "ლოკომოტივისთვის". ლევან კორღალიძის გუნდმა მაღალი სიჩქარე "აკრიფა" და პირველი ორი ტურის შემდეგ ჩემპიონატს უდანაკარგოდ ლიდერობდა. თბილისის "მერანთან" მატჩის წინ, გუნდმა საგურამოში ივარჯიშა, მაგრამ... ეს იყო მანამ, ვიდრე ჩემპიონატის შეჩერება გამოცხადდებოდა.

კორღალიძე "ლელოსთან" საუბარში თქვა, რომ ბოლოდროინდელმა მოვლენებმა გეგმები აურია: "წინა ტურის შემდეგ მოთამაშეთა დასვენებას ვგეგმავდით. მაგრამ ახლა მათ ერთი დღის ნაცვლად, 3-4 დღე მოუწევთ გაჩერება. ბოლოდორინდელი მოვლენების გამო, ეს ჩემი პირადი  გადაწყვეტილება იყო", - ამბობს "ლოკომოტივის" თავკაცი.

 ის არ მალავს, რომ ახლა ჩემპიონატის შეწყვეტა და მოთამაშეთა დასვენება, სპორტული კუთხით, არ ახარებს: "სეზონს კარგად მომზადებულები შევხდით და პირველი ორი თამაში მოვიგეთ. ამის გათვალისწინებით, გუნდი ფორმაში შედიოდა და შემდეგ ტურში კიდევ უკეთესი თამაშის იმედი გვქონდა. გუნდის მოსამზადებელი ეტაპი და კვირის სავარჯიშო ციკლი წინასწარ იგეგმება და ცხადია, ასეთ დროს, გაჩერება კარგად არც ფეხბურთელებზე იმოქმედებს და არც მთლიანად გუნდზე. იმედია, ჩვენი შეჩერება ხანმოკლე იქნება. მაგრამ ყველაზე ცუდი ის არის, რომ არც ვიცით, ორიოდე დღე დავისვენოთ, ერთი კვირა თუ ერთი თვე. აქედან გამომდინარე, არც ვიცით, გუნდის მომზადების და ფორმის შესანარჩუნებლად ვარჯიშები როგორ დავგეგმოთ".

კორღალიძე აცნობიერებს, რომ სხვა გამოსავალი არ იყო: "ახლა საქართველოსა და მსოფლიოში იმდენად მნიშვნელოვანი ამბავი ხდება, კარგად მესმის, რომ ფეხბურთისთვის არავის სცხელა. დღეს ყველას მხოლოდ ერთი სურვილი გვამოძრავებს - ვირუსის გავრცელება შეჩერდეს და ეპიდემია რაც შეიძლება სწრაფად ჩაცხრეს. ამიტომ, ფეხბურთის ფედერაციის გადაწყვეტილება ჩემპიონატის შეჩერებაზე ვითარების შესაბამისი იყო და გვინდა თუ არა, ყველა ვემორჩილებით. იმედია, უახლოეს დღეებში ყველაფერი დალაგდება, მოედანს დავუბრუნდებით და ვარჯიშს ჩვეულ რეჟიმში გავაგრძელებთ".

681
მკითხველის კომენტარები / 0 /
მსგავსი ამბები
რუბრიკის სხვა სიახლეები
;