ლევან სალუქვაძე გიორგი ჩაკვეტაძეზე: მას ვერ შეცვლის ვერც ფული და ვერც ძვირად ღირებული მანქანა

გიორგი ჩაკვეტაძის თემა დღეს ძალზე აქტუალურია. თბილისის "დინამოდან" "გენტში" მისი გადასვლის ისტორია კარგად არის ცნობილი ჩვენი კოლეგა ლევან სალუქვაძისთვის, რომელიც მაშინ "დინამოს" პრეზიდენტ რომან ფიფიას მრჩევლად მუშაობდა.

ამასთან დაკავშირებით სალუქვაძე "ლელოსთან" საინტერესო ამბებს ჰყვება.

ვისარგებლეთ შემთხვევით და მას "დინამოს" აკადემიაზეც ვკითხეთ, საიდანაც დაფრთიანდნენ ჩაკვეტაძე და ის ახალგაზრდები, რომლებმაც ახლო მომავალში ომახიანი სიტყვა უნდა თქვან ქართულ ფეხბურთში და არა მარტო...

სალუქვაძემ საინტერესოდ ილაპარაკა საქართველოს ეროვნულ ნაკრებზეც...

ის, რასაც ვერ ისწავლი...

"ბედნიერი ვარ, რომ თბილისის "დინამოში" ვმუშაობდი მაშინ, როცა გიორგი ჩაკვეტაძე დაწინაურდა ძირითად შემადგენლობაში. რა თქმა უნდა, მე ვერ დავიბრალებ მის აღმოჩენას. უბრალოდ, ჩაკვეტაძე მიმაჩნია თვალსაჩინო მოთამაშედ ქართული ფეხბურთისთვის, იმ მოთამაშედ, რომლის გვარსაც მალე გაიგებს მთელი მსოფლიო...

პირდაპირ უნდა გითხრათ, რომ ის ფეხბურთისთვისაა დაბადებული. მას აქვს ისეთი რაღაცები, რაც ან გაქვს და ან არ გაქვს, ანუ ის, რასაც ვერ ისწავლი. ცალკე თემაა მისი ხასიათი. დარწმუნებული ვარ, მას ვერ შეცვლის ვერც ფული და ვერც ძვირად ღირებული მანქანა. ის ისეთი ბიჭია, მხოლოდ ფეხბურთზე რომ ფიქრობს და იფიქრებს მომავალშიც...

მინდა მჯეროდეს, რომ იმ კლუბში მოტრიალე ხალხი, რომელშიც ახლა თამაშობს გიორგი, არ დააყენებენ ფინანსურ ამბებს ყველაზე წინ და ამას არ გადააყოლებენ ჩაკვეტაძის კარიერას. როცა დრო მოვა, მან უნდა დატოვოს "გენტი" და კარიერა უნდა გააგრძელოს უფრო ძლიერ გუნდში...

როცა ის გამოჩნდა "დინამოს" ახალგაზრდულ გუნდში, უკვე ეტყობოდა, რომ ტალანტი იყო. მერე იყო ვიტალი დარასელიას ხსოვნისადმი მიძღვნილი ტურნირი, იყო "დინამოს" ახალგაზრდული შემადგენლობის უიღბლო მატჩები "ქაირათთან", მაგრამ ჩაკვეტაძემ აქაც გამორჩეული გახლდათ...

მისი გადაბირება ძალიან უნდოდა "ბაიერნს". ეს ტრანსფერი არ შედგა რიგი მიზეზების გამო და ახლა ამ თემაზე საუბარს აზრი აღარ აქვს. მოდით, ამის შესახებ მაშინ ვილაპარაკოთ, როცა ის ჩაირიცხება "ბაიერნში"...

ჩვენი სურვილი იყო, რომ ის სეზონის დასრულების შემდეგ წასულიყო "გენტში". ამ შემთხვევაში თავად ფეხბურთელმა მოისურვა წასვლა. "დინამოს" ხელმძღვანელობამ გაითვალისწინა მისი პოზიცია. მას შეეძლო, კიდევ გაზრდილიყო "დინამოში"...

მაქვს დიდი იმედი, რომ გიორგი აუცილებლად მოხვდება დიდ გუნდში. შეიძლება, ეს არ იყოს მაინცდამაინც "ბაიერნი", მაგრამ იყოს "რეალი", "ატლეტიკო", ან სხვა რომელიმე გრანდი. მას აქვს ამის პოტენციალი...

ბოლოს ყველამ ვნახეთ სანაკრებო მატჩი, რომელშიც ჩაკვეტაძემ მართლაც შესანიშნავად ითამაშა. ჩემთვის ცოტა გაუგებარია, რატომ არ ითამაშა მან ესტონეთთან შეხვედრაშიც. ვიყავი სტადიონზე და ყველა კითხულობდა - რატომ არ არის ჩაკვეტაძეო?!

არ ვიცი, ამისთანა რა თამაში ჰქონდა "გენტს", ან რა უნდა ჰქონოდა, როცა სანაკრებო დღეები იყო მთელ მსოფლიოში... ჩემი აზრით, გიორგის რომ ეთამაშა ესტონეთთან, ეს მისთვისაც უკეთესი იქნებოდა და საქართველოს ნაკრებისთვისაც...

ვფიქრობ, ამით დიდი საქმე გაკეთდა...

"ზოგადად, "დინამოს" აკადემიამ დიდი საქმე გააკეთა, მოხარული ვარ, რომ ამაში ჩემი მცირე წვლილიც არის. დამტკიცდა, რომ 17 წლის ნიჭიერ ქართველ ფეხბურთელს უკვე შეუძლია საქართველოს ჩემპიონატში წარმატებით თამაში და სულაც არ არის აუცილებელი, დიდი ფული დახარჯო ლეგიონერების ჩამოსაყვანად.

მარტო ჩაკვეტაძეში არ არის საქმე. გამოჩნდა მთელი რიგი ნიჭიერი ფეხბურთელებისა - ლოჩოშვილი, კუცია, ნინუა, ზარია, რომელიც ძალიან შეაწუხა ტრავმებმა... ან თუნდაც ერგემლიძე. ისიც კარგ ფეხბურთს ითამაშებს და ამაში ღრმად ვარ დარწმუნებული...

დღეს თბილისის "დინამო" არის გუნდი, რომელსაც აქვს მომავალი. ერთი წელი რომ დაეკარგათ ამ ბიჭებს, არ მიეღოთ ეს შანსი და დარჩენილიყვნენ ძირითადი გუნდის მიღმა, ან სათადარიგოთა სკამზე, არავინ იცის, რა მოხდებოდა...

ალბათ, გავხდებოდით იმის მოწმე, რისიც არაერთხელ ვყოფილვართ. ეს ვაიაგენტები წაიყვანდნენ სხვადასხვა გუნდში და დაიკარგებოდა დრო. ეს დრო კი, დამეთანხმებით, ძალიან მნიშვნელოვანია ფეხბურთელისთვის, მით უმეტეს, ახალგაზრდისთვის...

აბსოლუტურად მართებული იყო გუნდის მთავარ მწვრთნელად კახა კაჭარავას დანიშვნაც. ყველა ვხედავთ, რომ ის დღესაც წარმატებით მუშაობს გუნდში. მინდა აღვნიშნო ასევე ფიზმომზადების უკრაინელი სპეციალისტის, ვიტალი შპანიუკის წვლილი...

ამ ახალგაზრდულ გუნდს ერთი დარტყმა დააკლდა ჩემპიონობამდე. გახსოვთ, ქარდავამ ტრავმის გამო გამოტოვა "ტორპედოსთან" მატჩი, თოთაძემ - ყვითელი ბარათის გამო, კიტეიშვილი არ იყო ოპტიმალურ ფორმაში, რადგან ტრავმის გამო ბევრი გაუცდა და ასე შემდეგ...

ვფიქრობ, "დინამოს" მაგალითმა ბევრი კლუბი დაარწმუნა, რომ კარგად გამართული აკადემია არის ყველაზე სწორი გზა, რომელიც მიდის წარმატებისკენ...

საქართველოს ნაკრები თამაშობს ქართულ
ფეხბურთს

"უნდა გითხრათ პირდაპირ, რომ საქართველოს ნაკრების მიერ ჩატარებული ბოლო ორი შეხვედრა ძალიან მომეწონა. როცა ამ ბოლო დროს ეროვნული გუნდის თამაშებს ვუყურებდი, იყო გარკვეული მომენტები, რომელთა ყურებაც მსიამოვნებდა, მაგრამ ასე მთლიანობაში რომ ვყოფილიყავი ნასიამოვნები, ასეთი არ მახსენდება...

საქართველოს ნაკრების კარგ თამაშს მე ასე ავხსნი: ფეხბურთელებმა გაიცნეს ვლადიმირ ვაისი, მწვრთნელმა კი გაიცნო ფეხბურთელები. გუნდს და მწვრთნელს ერთმანეთის უკვე ძალიან კარგად ესმით...

გუნდი არ თამაშობს ფეხბურთს, რომელიც ორიენტირებულია მხოლოდ და მხოლოდ ზონების გადაკეტვასა და სირბილზე. ის, რასაც საქართველოს ნაკრები თამაშობს დღეს, არის ქართული ფეხბურთი. დიახ, ის ფეხბურთი, რომლის თამაშიც ყველაზე მეტად გვეხერხება. კარგია, რომ ვაისი მივიდა იმ დასკვნამდე, რომლის მიხედვითაც სწორედ ასეთი ფეხბურთი უნდა ვითამაშოთ...

ჩემი აზრით, ამ ორი მატჩის შემდეგ, კითხვამ - უნდა მოვუგოთ თუ არა ისეთი დონის ნაკრებებს, როგორებსაც მოვუგეთ, დაკარგა ლეგიტიმაცია. არადა, ბოლო ხანს ჩვენ ისეთი ნაკრებები წარმოგვიჩინეს გრანდებად, რომ არ ვიცი, რა ვთქვა - ლამის ფარერებიც კი გრანდი გავხადეთ...

სკეპტიკოსების გასაგონად მინდა ვთქვა - მოვუგეთ იმას, ვისაც ვეთამაშეთ. აგერ, სომხეთის ნაკრებმა ვერც ლიტვა დაამარცხა და ვერც ესტონეთი. ლიტვასთან საერთოდ წააგო. არადა, სომხეთს ჰყავს მხითარიანი. ამ გუნდს მოუგია დანიასთან, ფრედ უთამაშია იტალიასთან...

სახრჩობელას არავის ვუმზადებ, მაგრამ...

"ჯერ კიდევ საბჭოთა დროიდან და მერეც, დამოუკიდებლობის ხანაში, როცა გვყავდნენ არველაძეები, ქინქლაძის, ჯამარაულისა და სხვა ფეხბურთელების შესანიშნავი თაობა, ჩვენი თამასა ძალიან მაღლა იყო აწეული...

თავადაც გახსოვთ, შესარჩევ ჯგუფში ხან ინგლისი გვყავდა, ხან გერმანია და ხან მსოფლიოს 1994 წლის ჩემპიონატის მთავარი აღმოჩენა ბულგარეთი, მაგრამ ჩვენ მიზნად სულ ჯგუფიდან გასვლას ვისახავდით...

ისე არავინ გამიგოს, რომ მე ვინმეს სახრჩობელას ვუმზადებ, მაგრამ საქართველოს ნაკრებს მიზნად მხოლოდ ერთა ლიგის მოგება უნდა ჰქონდეს. ასეთი მიზანი და ამოცანა უნდა გვქონდეს ჩვენც, გულშემატკივრებსა და ფეხბურთელებს, ფეხბურთის ფედერაციის ხელმძღვანელობას...

წეღანაც ვთქვი, ისეთი ნაკრებების გრანდებად წარმოჩენის მცდელობა იყო, რომელთაც ამ სტატუსთან საერთო არაფერი აქვთ. ჩვენ ერთა ლიგაში D კალათაში ვართ. ჩ-შიც რომ ვიყოთ, პირადად მე ამ შემთხვევაშიც გამარჯვების ამბიცია მექნებოდა...

შეუშლის თუ არა საქართველოს ნაკრებს ხელს ის, რომ ფავორიტია? ვფიქრობ, რომ არა. ჯერ ერთი, მთელ მსოფლიოში საქართველოს ნაკრებს უპირობო ფავორიტად არ განიხილავენ და მეორეც - ჩემი აზრით, ჩვენი გუნდი უკვე მომწიფებულია იმისთვის, რომ პირველ ნომრად ითამაშოს ასეთი დონის ნაკრებებთან.

ჩვენ ძალიან ხშირად ვლაპარაკობთ იმაზე, რომ პირველხარისხოვანი ნაკრებებისთვის გვიჭირდა წინააღმდეგობის გაწევა. ახლა საქმის დაჭერა ისეთ გუნდებთან მოგვიწევს, რომ აუცილებლად წარმატება უნდა დავგეგმოთ".

P.შ. "silk TV-მ" შეიძინა ერთა ლიგის მთელი გათამაშების ჩვენების უფლება და გულშემატკივარი ამ არხის მეშვეობით იხილავს საქართველოსთვის ამ მეტად მნიშვნელოვან ტურნირს.

ყოველდღიური სპორტული გაზეთი "ლელო"
1672
მკითხველის კომენტარები / 0 /
მსგავსი ამბები
რუბრიკის სხვა სიახლეები