ლევან ყენია: იმედს მაინც არ ვკარგავ, შეიძლება, ეს ჩემი ბოლო ცდაც იყოს...

თბილისის "ლოკომოტივში" დიდი იმედი ჰქონდათ, რომ ლევან ყენია გუნდს 2017 წელს ევროპა ლიგის საგზურის მოპოვებაში დაეხმარებოდა.

სამწუხაროდ, პრაღის "სლავიადან" დაბრუნებული გამოცდილი შემტევი ნახევარმცველი არათუ შარშან, გუნდის ფორმის მორგებას ახლაც ვერ ახერხებს და უცნობია, ამას როდის შეძლებს.

ყენია "ლოკომოტივში" შარშან ზაფხულში, 9-წლიანი პაუზისა და რამდენიმე უცხოურ კლუბში თამაშის შემდეგ დაბრუნდა. მაგრამ 27 წლის ფეხბურთელი, რომელმაც საქართველოს ნაკრებში 29 მატჩი (4 გოლი) ჩაატარა და გელზენკირხენის "შალკეში" 18 წლისა ჩაირიცხა, დღემდე რეაბილიტაციას გადის.

"ლელო" ყენიას დაუკავშირდა და ინტერვიუ ჩაწერა:

- ყველას აინტერესებს, თქვენკენ რაიმე სიახლე თუ არის?

- დღემდე რეაბილიტაციას გავდივარ. იმედი მაქვს, რომ ეს პროცესი მალე დასრულდება და ვითამაშებ.

- მოედანზე დაბრუნების მიახლოებითი დრო თუ შეგიძლიათ გვითხრათ?

- იყო პერიოდი, როცა თავს შედარებით კარგად ვგრძნობდი და მეგონა, რომ მალე დავბრუნდებოდი. მაგრამ მერე გაუმჯობესება ვეღარ ვიგრძენი და ამან ფსიქოლოგიურად ცუდად იმოქმედა. ამიტომაა, დაბრუნების ზუსტ ვადას რომ ვერ ვამბობ, მიახლოებითაც კი. თუმცა, ვიმეორებ - იმედს მაინც არ ვკარგავ. შეიძლება, ეს ჩემი ბოლო ცდაც იყოს...

- ბურთით თუ ვარჯიშობთ?

- ვვარჯიშობ, თუმცა ჯერ სასურველ კონდიციებამდე ვერ მივდივარ. თითქოს, კარგად ვიწყებ, მაგრამ მერე რაღაც მაჩერებს.

- ფსიქოლოგიურად ეს ცუდად იმოქმედებდა...

- ყველაზე მძიმე გადასატანი სწორედ ეს არის. ტრავმა იმდენჯერ გადავიტანე, უკვე ძალიან ვფრთხილობ. ყველაზე ცუდი ის არის, რომ ექიმები შემოვიარე და ზუსტად ვერავინ მეუბნება, კონკრეტულად რა მჭირს.

- საქართველოში მკურნალობდით?

- არა მხოლოდ. გერმანიაშიც ვიყავი, სადაც მსოფლიოში საუკეთესო ექიმები არიან, ფიზიოთერაპიის კურსს გავდიოდი და მერე საქართველოში ვვარჯიშობდი.

ცდა არ დამიკლია და ექიმი არ დარჩენილა, ვისთვისაც არ მიმიმართავს. რეაბილიტაციას ვაგრძელებ და ძალიან მინდა, რაც შეიძლება მალე ვითამაშო. ჩეხეთში კარგად ვერ მიმკურნალეს და დრო ამიტომ გამეწელა.

- საქართველოს ნაკრებსა და ერთა ლიგაზეც უნდა გკითხოთ. რას ფიქრობთ ამ ტურნირზე და ეროვნული გუნდის შანსებზე?

- უეფამ ძალიან საინტერესო ტურნირი მოიფიქრა. ერთა ლიგაში საქართველოს ნაკრებს ევროპის ჩემპიონატზე მოხვედრის ბევრად მეტი შანსი აქვს, ვიდრე ჩვეულებრივი შესარჩევი ციკლიდან.

რა თქმა უნდა, ეს იოლი არც ერთა ლიგაში იქნება, რადგან იგივე სურვილი ლატვიასა და ყაზახეთსაც ამოძრავებთ, მაგრამ ადრინდელისგან განსხვავებით, ახლა იმის პერსპექტივა მაინც ჩანს, რომ გასვლისთვის ვიბრძოლოთ. დანარჩენს თამაშები გამოაჩენს.

- ბოლო პერიოდში ეროვნული ნაკრები გულშემატკივრის იმედებს ვერ ამართლებს. ასეთ დროს, დამაიმედებელს რას ხედავთ?

- ჩვეულებრივ შესარჩევ ციკლში გრანდები ან მეორე რანგის ევროპული ნაკრებები გვხვდებოდნენ, ლატვიას და ყაზახეთს კი ასეთი დონის გუნდები ნამდვილად არ ჰყავთ.

ყაზახებს ბოლო დროს ამბიცია გაუჩნდათ, ჩემპიონატიც გააძლიერეს, თუმცა მათი ნაკრები ახლაც ვერაფერს აღწევს. რაც მთავარია, თამაშის ბედს ფეხბურთელები წყვეტენ. ყაზახეთსა და იმავე ლატვიას ჩვენნაირი მოთამაშეები ნამდვილად არ ჰყავთ და ვერავინ იტყვის, რომ დაუმარცხებლები არიან.

ყოველდღიური სპორტული გაზეთი "ლელო"
2363
მკითხველის კომენტარები / 0 /
მსგავსი ამბები
რუბრიკის სხვა სიახლეები
;