ლევან შენგელია ნაკრებში გახსნას იმედოვნებს: მარტის თამაშებზე ჩვენი ფეხბურთისა და ფეხბურთელების მომავალია დამოკიდებული

ინგლისელები რომ საახალწლოდ არ ჩერდებიან და ფეხბურთს თამაშობენ, ეს დიდი ხნის ტრადიციაა და აღარ გვიკვირს. საინტერესოა, რომ წლეულს თურქეთის სუპერლიგაშიც ასე იქნება - ბოლო ტური იქ 29 დეკემბერს ჩატარდება, საგაზაფხულო ეტაპი კი 19 იანვრიდან განახლდება.

თურქული სუპერლიგის კლუბ "ქონიასფორში" ზაფხულის შემდეგ საქართველოს ნაკრების თავდამსხმელი ლევან შენგელია თამაშობს. ასეთი კალენდარი, ჩვენი ნაკრების ინტერესებიდან გამომდინარე, თავდამსხმელისთვის კარგია და იმედია, მარტის სანაკრებო თამაშებს კარგად მომზადებული შეხვდება.

ახლა ლევანს ჯერ ისევ რთული პერიოდი აქვს - გუნდთან, თანაგუნდელებთან, ლიგასთან და საერთოდ გარემოსთან ადაპატაცია და ადგილის დამკვიდრება სჭირდება.

"კლუბში ჩემი საქმეები საკმოდ კარგად მიდის, თითქმის სულ ვთამაშობ და პრაქტიკა მაქვს. უბრალოდ, თავად გუნდში ცოტა რთული ვითარებაა, რადგან ბოლო 10 თამაში ვერ მოვიგეთ და ჩემპიონატში მე-15 ადგილზე ვართ", - ამბობს შენგელია.

ამის მიუხედავად, 24 წლის ფორვარდი იმედიანადაა განწყობილი: "ყველაზე გულდასაწყვეტი ის არის, რომ ამ თამაშების უმრავლესობა კარგად დავიწყეთ, მაგრამ ბოლოსკენ თამაში არ გამოგვდის და ბევრ ქულა უაზროდ ვკარგავთ. მაგრამ ჯერ 15 ტური ჩატარდა, იმედია მოგებებს დავიწყებთ და გუნდი თავის პოტენციალს გამოიყენებს".

შენგელიას თქმით, საკმაოდ კარგ ფორმაშია, მაგრამ არ მალავს, რომ თავის უკეთ გამოჩენისთვის რაც სჭირდება: "ჩემთვის მთავარია, რომ გოლი მალე გავიტანო, ეს თავდაჯერებულობისთვის მჭირდება. ახალ გუნდში ეს ძალიან მნიშვნელოვანია".

ფეხბურთელმა, რომლის დარტყმაც ეროვნულ ლიგაში ყველა მეკარისთვის ყველაზე უსიამოვნო მომენტი იყო, საქართველოს ნაკრებში უკვე 2 საგოლე გადაცემა ჩაიწერა. თუმცა ჯერ ზუსტი "გასროლით" თავი ვერ გამოიჩინა. ესეც აშკარად თავდაჯერებულობას უკავშირდება და თავად შენგელია არ მალავს, რომ ეს ეროვნულ ნაკრებში აშკარად სჭირდება:

"თავიდან თბილისის "დინამოშიც" ასე იყო და მერე გავიხსენი. ზოგადად, ახალ გუნდში თავიდან მიჭირს. იგივე ხდება ნაკრებშიც. ჯერ ბოლომდე თავდაჯერებული არ ვარ. მაგრამ მჯერა, უცებ შეიძლება ყველაფერი შეიცვალოს. მთავარია, ნაკრები მწვრთნელ ვლადიმირ ვაისისგან ნდობას ვგრძნობ და ეს ძალიან ბევრს ნიშნავს".

ჩვენი ნაკრების ისტორიაში უმნიშვნელოვანეს მატჩამდე სულ რაღაც 3 თვეა დარჩენილი - 26 მარტს, საქართველოს ეროვნული გუნდი ევრო 2020-ის პლეი ოფის ნახევარფინალში ბელარუსს უმასპინძლებს. ახალგაზრდა ფეხბურთელი ამ თამაშის მოლოდინშია:

"ყველამ კარგად ვიცით, თუ როგორი თამაშები გველოდება. მათზეა ძალიან  მნიშვნელოვნად დამოკიდებული ჩვენი ქვეყნის ფეხბურთისა და ნაკრების თითოეული მოთამაშის მომავალი - ასევე ახალგაზრდების, რომაც უფრო მეტ ყურადღებას მიაქცევენ და ევროპაში გზა გაეხსნებათ. მოკლედ, ძალიან მნიშვნელოვანი მატჩები გველის".

 ლევან შენგელიამ ჩვენი ნაკრების შანსებზეც ილაპარაკა: "ყველაფერს ვიზამთ, რომ გავიმარჯვოთ. ეს თუ ვერ მოვახერხეთ, ფსიქოლოგიურად ძალიან რთული გადასატანი იქნება. მაგრამ არ ვნერვიულობ. რატომ? იმედი მაქვს, მოვიგებთ და სანერვიულო არ გახდება".

1107
მკითხველის კომენტარები / 0 /
მსგავსი ამბები
რუბრიკის სხვა სიახლეები
;