ლელოს რჩეულნი. გიორგი ხარაიშვილი: თავიდან ვერც კი გავაცნობიერე, რა მოხდა...

საქართველოს ჩემპიონატში თითზე ჩამოსათვლელად, მაგრამ მაინც არიან გამორჩეული ინდივიდუალისტები, ვის სანახავადაც ქომაგი სტადიონზე დადის. ერთ-ერთი ასეთი უდავოდ "საბურთალოს" 21 წლის ნახევარმცველი, გუნდის კაპიტანი, გიორგი ხარაიშვილია.

ტექნიკური, ფიზიკურად კარგად მომზადებული ფეხბურთელი გუნდის "საბურთალოს" სული და გულია. იმაში, რომ გიორგი ჭიაბრიშვილის გაწვრთნილი გუნდი უაღრესად ახალგაზრდული შემადგენლობით შესწვდა მეოთხე ადგილს ეროვნულ ლიგაში, ეს ხარაიშვილის დიდი დამსახურებაცაა.

შემთხვევითი არ არის, რომ "ლელოს" ვერსიით სწორედ ის გახდა საქართველოს ჩემპიონატის საუკეთესო ახალგაზრდა ფეხბურთელი.
გუშინ ჩვენი გაზეთის ერთ-ერთ რჩეულთან ინტერვიუ ჩავწერეთ...

- საინტერესოა, როგორია დასრულებული სეზონის თქვენეული შეფასება? ფაქტია, "საბურთალოს" სულ ცოტა დააკლდა ევროტურნირების საგზურის მოპოვებამდე...

- მართალი ბრძანდებით, ცოტა დაგვაკლდა... არადა, ბოლომდე ვიბრძოლეთ... მთავარი, რამაც უარყოფითად იმოქმედა ჩვენს თამაშზე, მოჭარბებული ტრავმიანობა იყო. მთელი სეზონის განმავლობაში ვერ გავიხსენებ ისეთ მატჩს, რომელშიც 4-5 ფეხბურთელი არ დაგვკლებოდეს.

იყო ხანგრძლივი პერიოდი, დაახლოებით თვე-ნახევარი, როცა 6-7 ფეხბურთელიც არ გვყოლია. იმ პერიოდში არაერთი ქულა დავკარგეთ. ფაქტია, წინა სეზონს ბოლო ბევრად სჯობდა გუნდისთვის. რაც შეეხება ჩემს თამაშს, ეს თქვენი და სპეციალისტების შესაფასებელია. ჩემთვის ყოველთვის მთავარია, რომ გუნდმა მიაღწიოს წარმატებას.

- გასაგებია თქვენი მაქსიმალიზმი, მაგრამ მეოთხე ადგილი ასეთი ახალგაზრდული გუნდისთვის ცუდი შედეგი ნამდვილად არ არის...

- გასათვალისწინებელია ის, რომ ჩვენ ყოველთვის მაქსიმუმისთვის ვიბრძვით. ერთი მხრივ, ჩვენ გვყავს ძალიან ახალგაზრდული გუნდი, მაგრამ მეორე მხარეცაა - ჩვენ უკვე დაგვიგროვდა გარკვეული გამოცდილება.

მესამე სეზონია, პირადად მე საქართველოს ჩემპიონატის უმაღლეს ლიგაში ვთამაშობ. და მაინც, არ არის მეოთხე ადგილი მიუღებელი შედეგი, თუმცა მეტი გვინდოდა და რომ არა ტრავმები, ალბათ, შევძლებდით კიდეც ევროპის ლიგაში მოხვედრას.

- ზოგადად, რა შეფასება შეგიძლიათ მისცეთ საქართველოს დასრულებულ ჩემპიონატს, რომელიც ახალი სისტემით ჩატარდა?

- მიმაჩნია, რომ ამ ცვლილებამ გაამართლა. საქართველოს ჩემპიონატში დღეს უფრო ძლიერი გუნდები თამაშობენ, ვიდრე ეს იყო ადრე. ამის გათვალისწინებით მაქვს ასეთი აზრი - ძალიან მომწონს ის, რომ უმაღლესი ლიგის ყველა მატჩი ქომაგმა ნახა პირდაპირ ეთერში და ეს არ ეხება მხოლოდ უმაღლეს ლიგას. საშუალება გვქონდა, დაბალი ლიგის თამაშებისთვისაც გვეყურებინა.

- რის გამოსწორებას ისურვებდით საქართველოს ჩემპიონატში?

- ვისურვებდი იმას, რომ მოედნები ყოფილიყო უფრო უკეთესი, თან - მხოლოდ ბუნებრივი.

- მოედნის საფარის მდგომარეობა რიგ მატჩებში გიშლიდათ ხელს იმაში, რომ გეჩვენებიათ ის ფეხბურთი, რომელიც ბოლო წლებში "საბურთალოს" საფირმო ნიშნად იქცა?

- მოგეხსენებათ, ჩვენი გუნდი შემტევ, სწრაფ და სანახაობრივ ფეხბურთს ანიჭებს უპირატესობას. არის ისეთი მოედნები, სადაც ასეთ ფეხბურთს, უბრალოდ, ვერ ითამაშებ. ჩვენ იძულებული ვხდებოდით, გვეღალატა ჩვენ მიერ არჩეული გეზისთვის და გვეთამაშა შედარებით "უკნიდან".

- "საბურთალოს" კაპიტანი ხართ. რას ნიშნავს ეს თქვენთვის?

- პირველ რიგში, ეს არის უდიდესი პასუხისმგებლობა. სიმართლე გითხრათ, თავიდან ვერც კი გავაცნობიერე, რა მოხდა. იყო გუნდის კაპიტანი ასეთ ახალგაზრდულ ასაკში და, მით უმეტეს, ისეთი გუნდის, როგორიცაა "საბურთალო", მართლაც დიდი პატივია.

- ბოლო რამდენიმე წლის განმავლობაში "საბურთალოში" ძალიან სტაბილური გარემოა, მათ შორის, სამწვრთნელო კუთხით. რამდენად აისახება ეს გუნდის თამაშზე?

- ორი აზრი არ არის, რომ დადებითი კუთხით აისახება. არ მინდა, ვინმემ ბანალურად ჩამითვალოს, მაგრამ "საბურთალო" არის ერთი დიდი ოჯახი და ამ სიტყვებს ვამბობ სრული პასუხისმგებლობით.

ნიშანდობლივია ისიც, რომ როცა ჩვენთან მოდის ახალი ფეხბურთელი, ის ძალიან მალე ახერხებს გუნდში ადაპტაციას. გადაჭარბების გარეშე ვიტყვი, რომ ძალიან შეკრული გუნდი გვყავს და ეს გია ჭიაბრიშვილის დამსახურებაა.

- თქვენი ერთ-ერთი საფირმო ნიშანი საჯარიმოების კარგი შესრულებაა. ამაზე საგანგებოდ ვარჯიშობთ?

- რა თქმა უნდა, საერთო წვრთნის შემდეგ ვრჩები და ჩემთვის სხვადასხვა კომპონენტებზე ვვარჯიშობ, მათ შორის - საჯარიმო დარტყმებზეც. ფეხბურთელმა ყოველთვის უნდა იზრუნოს ნაკლის გამოსწორებაზე და პარალელურად, დახვეწოს ის ძლიერი მხარე, რაც აქვს. მე ასე მგონია და ამას ვცდილობ სწორედ.

- რას იტყვით ჩვენი ჩემპიონატის გამორჩეულ ახალგაზრდა ფეხბურთელებზე - ვისი თამაში მოგწონთ ყველაზე მეტად?

- რა თქმა უნდა, საქართველოს ჩემპიონატში არიან გამორჩეული ახალგაზრდა ფეხბურთელები. მათ ყველას წარმატებას ვუსურვებ... მე უფრო ოთარ კიტეიშვილს გამოვარჩევდი. მისი თამაში ძალიან მომწონს.

- როგორ გგონიათ, საქართველოს ჩემპიონატში არის იმის საშუალება მაინც, რომ ახალგაზრდა ფეხბურთელმა შეძლებისდაგვარად მოუმატოს?

- ვერ ვიტყვი, საქართველოს ჩემპიონატი ისეთი დაბალი დონის ტურნირია, რომ აქ არ არსებობდეს მომატების შანსი. რა თქმა უნდა, ყველა ვისურვებდით უკეთესს, მაგრამ მართლა მგონია - დიახ, აქაც არის შანსი, რომ მოუმატო, თავი საუკეთესო კუთხით წარმოაჩინო და მერე იფიქრო სხვა კლუბში წასვლაზე.

- რეჟიმზე უნდა გკითხოთ. ადრე მას განუხრელად იცავდით. ამ ცოტა ხანში ვითარება ხომ არ შეცვლილა?

- არა და არც შეიცვლება! როცა შენ ირჩევ ფეხბურთს, ის ხდება შენი ცხოვრება და ვალდებული ხარ, მისთვის ყველაფერი გაიღო. თამამად შემიძლია ვთქვა, რომ ფეხბურთი არის ჩემი ცხოვრება და მას ბოლომდე ვუერთგულებ.

- რა თქმა უნდა, საქართველოს ჩემპიონატში სასიამოვნოა თქვენი თამაშის ყურება, მაგრამ, ალბათ, მოდის დრო, როცა წასვლაზე და კლასის ამაღლებაზე უნდა დაფიქრდე...

- არ დავმალავ, არის გარკვეული შემოთავაზებები, თუმცა ვერ ვიტყვი, რომ ახლა რამე კონკრეტული ვარიანტი მაქვს. რა თქმა უნდა, ყველა ფეხბურთელი ფიქრობს იმაზე, რომ უფრო მაღალ დონეზე მოსინჯოს თავისი შესაძლებლობები და ეს ნორმალურად მიმაჩნია.

და მაინც, არ არის ისე, რომ უეჭველად გადაწყვეტილი იყოს ჩემი წასვლა. ჩემს ინტერესებზე ზრუნავს "საბურთალო". მოგეხსენებათ, ამ გუნდმა ძალიან ბევრი გააკეთა ჩემთვის.

- თქვენ რომელ ჩემპიონატში თამაში გხიბლავთ ყველაზე მეტად?

- ჰოლანდიის ჩემპიონატში. ჩემი აზრით, ამ ქვეყნის ჩემპიონატი ახალგაზრდა ფეხბურთელისთვის არის იდეალური საშუალება, რათა განვითარდეს და მიიღოს ის ნდობა, რომელიც ძალიან სჭირდება. რომ გადავხედოთ, არაერთმა ფეხბურთელმა მიიღო ჰოლანდიის ჩემპიონატში საფეხბურთო განათლება.

ყოველდღიური სპორტული გაზეთი "ლელო"
1249
მკითხველის კომენტარები / 0 /
მსგავსი ამბები
რუბრიკის სხვა სიახლეები
;