ლელოს რჩეულნი. ვატო არველაძე: მანჩესტერ სიტიში, დე ბრუინის ადგილზე...

"ლელომ" ეროვნული ჩემპიონატის "აღმოჩენად" თბილისის "ლოკომოტივის" შემტევი ნახევარმცველი ვატო არველაძე დაასახელა. ის არველაძეების საფეხბურთო დინასტიის გამგრძელებელია.

მამამისი, რევაზ არველაძე, საქართველოს ნაკრების ფეხბურთელი იყო და დღემდე ფეხბურთში ტრიალებს. ასევე ეროვნული გუნდის ლიდერები იყვნენ შოთა და არჩილ არველაძეები.

20 წლის ვატომ არაერთხელ დაგვარწმუნა, რომ ის ძალიან საინტერესო ფეხბურთელია. "ლოკომოტივის" აწ უკვე ყოფილმა მთავარმა მწვრთნელმა გიორგი დევდარიანმა მას დიდი ნდობა გამოუცხადა და მანაც კარგი თამაშით უპასუხა მწვრთნელის ამ ჟესტს...

რევაზ, არჩილ და შოთა არველაძეები კარგ ფეხბურთელებთან ერთად, შესანიშნავი მოსაუბრეებიც არიან. დავრწმუნდით, რომ, ინტელექტუალური თვალსაზრისით, ვატო მამისა და ბიძების გზის ღირსეული გამგრძელებელია...

- გილოცავთ "სეზონის აღმოჩენის" ნომინაციაში გამარჯვებას. როგორი იყო დასრულებული ეროვნული ჩემპიონატი თქვენთვის?

- მადლობა უნდა გადაგიხადოთ ამ აღიარებისთვის! ჩემთვის გასულ სეზონს მხოლოდ დადებითად შევაფასებდი. სათამაშო პრაქტიკა სისტემატურად მქონდა.

ასევე უნდა ვთქვა, რომ შევიძინე ის გამოცდილება, რომელიც აქამდე ნამდვილად მაკლდა. ეს გამოცდილება სწორედაც რომ თამაშს მოაქვს. გამიადვილდა ადაპტაცია და ეს ჩემთვის სასიამოვნოა.

- რაც შეეხება "ლოკომოტივს", გუნდის მიზანი ალბათ ევროსაგზურის მოპოვება იყო, რაც ვერ შესრულდა და ამას თავისი მიზეზები აქვს...

- თავდაპირველად, ჩვენ მიზნად გვქონდა ხუთეულში მოხვედრა. მერე და მერე, როცა წარმატებული სტარტი გვქონდა, გაჩნდა მეტის ამბიცია, შანსი იმისი, რომ გავსულიყავით ევროთასებზე.

საბოლოო ჯამში ეს არ მოხერხდა და მართალი ხართ, ამას მთელი რიგი მიზეზი ჰქონდა. პირველ ყოვლისა, დავასახელებ ტრავმიანობას. ოპტიმალური შემადგენლობით ვერ ვითამაშეთ თითქმის ვერცერთი შეხვედრა და ამან სერიოზულად შეგვაფერხა...

- ეს თქვენთვის სადებიუტო სეზონი იყო უმაღლეს ლიგაში იმ მხრივ, რასაც ჰქვია სრული დატვირთვით ჩატარებული სეზონი. მაგრამ დებიუტი კლასიკური გაგებით, უფრო ადრე გქონდათ. გაიხსენეთ ის მომენტი...

- ის დღე მთელი ცხოვრება მემახსოვრება. 2015/16 წლების სეზონი იყო, "სიონის" წინააღმდეგ ვითამაშე. სულ 15 წუთი ვიყავი მინდორზე... მაშინ გუნდის მთავარი მწვრთნელი ვასილ მაისურაძე იყო და მინდა, ამისთვის დიდი მადლობა გადავუხადო - მენდო, შანსი მომცა...

- ფეხბურთში თქვენი პირველი ნაბიჯებიც უნდა გაგახსენოთ. თქვენთვის ცოტა რთული კია ამ თემაზე საუბარი, მაგრამ მაინც ვცადოთ...

- მართლა არ მახსოვს, როდის შემოვიდა პირველად ფეხბურთი ჩემს ცხოვრებაში. უფრო ზუსტად რომ გითხრათ, სულ ბურთს ვხედავ და ფეხბურთზე ლაპარაკი მესმის.

ახლა მის გარეშე ვერც მე წარმომიდგენია ცხოვრება.ხუთნი ვთამაშობდით ფეხბურთს არველაძეების გვარიდან და მე დავრჩი მარტო. ყველაფერს რომ თავი დავანებოთ, ეს დამატებითი მოტივაციაცაა ჩემთვის.

- საინტერესოა, რას გირჩევენ ხოლმე მამა და ბიძები?

- ისინი თითქმის არასოდეს მელაპარაკებიან ჩემს პლუსებზე, უფრო ნაკლზე ვლაპარაკობთ ხოლმე. ძალიან ხშირად ვიღებ რჩევებს და ვცდილობ, ისინი გავითვალისწინო. მეუბნებიან, რომ ბოლომდე დავიხარჯო, არ შევუშინდე სირთულეებს, სულ შევინარჩუნო მოტივაცია...

- გავიხსენოთ თურქულ "ქასიმფაშაში" გატარებული პერიოდი. რა მოგცათ მან, როგორც ფეხბურთელს?

- ეს ძალიან მნიშვნელოვანი პერიოდი იყო ჩემი კარიერისთვის. "ქასიმფაშას" ყველა ასაკობრივ გუნდში ვითამაშე და კონტრაქტიც შემომთავაზეს. უბრალოდ, ჩემთვის მნიშვნელოვანი მომენტი იყო ის, რომ მქონოდა სისტემატური სათამაშო პრაქტიკა და ამიტომაც გადავწყვიტე საქართველოში დაბრუნება. "ქასიმფაშაში" ერთი წელი ვერ ვთამაშებდი იმის გამო, რომ არასრულწლოვანი ვიყავი.

- რას ფიქრობთ, საქართველოს ჩემპიონატში ახალგაზრდა ფეხბურთელს რამდენად აქვს პროგრესის საშუალება?

- მე მგონია, რომ ახალგაზრდა ფეხბურთელისთვის არის იმის აუცილებლობა, რომ ჯერ აქ დაამტკიცოს რაღაც. გინდაც პირველ და ან მეორე ლიგაში სათამაშო პრაქტიკაა მთავარი. მით უმეტეს, ახალგაზრდულ ასაკში. ეს არის აუცილებელი!

- საინტერესოა, ვარჯიშების შემდეგ თუ რჩებით კლუბის ბაზაზე, სხვადასხვა კომპონენტებს თუ ხვეწთ?

- სიმართლე გითხრათ, ამას "ლოკომოტივის" ყოფილი მთავარი მწვრთნელი გიორგი დევდარიანი სულ გვავალებდა. მომწონს კიდეც ასეთი მიდგომა. კი, ნამდვილად ვრჩები ხოლმე ვარჯიშების შემდეგ და ცალკეულ კომპონენტებზე ვმუშაობ. მინდა, ჩემი კარიერა ბოლომდე შედგეს, მინდა, რომ ვითამაშო ტოპკლუბში, რა თქმა უნდა, საქართველოს ნაკრებში...

- წეღან ნაკლი ახსენეთ. რა არის ვატო არველაძის მთავარი ნაკლი, რომლის გამოსწორებაზეც ის თავდაუზოგავად მუშაობს?

- ვერ ვიტყვი, რომ რაღაც კონკრეტულია ისეთი, რასაც ვაქცევ განსაკუთრებულ ყურადღებას. ეს არა იმიტომ, რომ ნაკლი არ მაქვს. პირიქით, არის ერთბაშად რამდენიმე კომპონენტი, რის გამოსწორებაზეც მიწევს შრომა. მე ამას უფრო კომპლექსურად ვუყურებ და არა რომელიღაც ერთს...

- საქართველოს ახალგაზრდულ ნაკრებზეც უნდა გკითხოთ. ყველა ვთანხმდებით იმაზე, რომ გვყავს ძალიან კარგი შემადგენლობა. არადა, მიმდინარე შესარჩევ ციკლში შედეგი ისეთი ვერ არის, როგორსაც ელოდა ქართველი გულშემატკივარი...

- რა თქმა უნდა, ასეა. ალბათ, თავი იჩინა შეთამაშების პრობლემამ. ყველა ცალკე, უფრო ინდივიდუალურად ცდილობდა წარმატების მიღწევას. რაც შეეხება შემადგენლობას, ის მართლა ძალიან კარგია. ამაშიც უნდა დაგეთანხმოთ. მჯერა, ჩვენ ვიტყვით ჩვენს სათქმელს.

- თქვენთვის, ალბათ, განსაკუთრებით ძნელია, იყოთ ფეხბურთელი. არ მინდა, ეს სიტყვა გამოვიყენო, მაგრამ მაინც - ძნელი უნდა იყოს ზოგადად არველაძეების ჩრდილიდან გამოსვლა...

- ძნელია, მაგრამ ყველა ადამიანი ცდილობს, რაღაც თავისი შექმნას ცხოვრებაში, თავისი კვალი დატოვოს... თავიდანვე ვიცოდი, რომ ეს არ იქნებოდა იოლი, მაგრამ მჯერა, რომ ამის შესაძლებლობა არის.

- საყვარელი კლუბი, ჩემპიონატი და ნაკრები...

- "ბარსელონა" ერთმნიშვნელოვნად! ფეხბურთის ყურება რომ დავიწყე, მესი და რონალდინიო ერთად თამაშობდნენ "ბარსაში". რა თქმა უნდა, მიყვარს შემტევი, შემოქმედებითი ფეხბურთი. ალბათ, ამის გარეშე მას ხიბლი დააკლდებოდა. ინგლისური პრემიერლიგა ჩემი საყვარელი ჩემპიონატია. ყველა თამაშს ვუყურებ, საშუალო გუნდებისაც კი, ისეთი ტემპი და აურაა... ნაკრებებიდან კი არგენტინას ვქომაგობ.

- როგორ ფიქრობთ, რატომ წყვეტს განვითარებას ქართველი ფეხბურთელი კონკრეტულ ასაკში?

- აქტუალური კითხვაა. მე ვიტყოდი, რომ ჩვენს ფეხბურთში, ზოგადად, არის განათლების დეფიციტი. საქმე მხოლოდ ის არ არის, რომ ბურთს კარგად დასდევდე. როგორ წარმართო შენი კარიერა, როგორ მართო საკუთარი თავი... ამას ცოდნა სჭირდება.

მთელ ევროპაში არაერთი ფსიქოლოგი მუშაობს ფეხბურთელებთან. მენტალურად, ევროპელი ფეხბურთელი უფრო ძლიერია, ვიდრე ჩვენი. ეს არის სამწუხარო რეალობა და ამას რომ ვამბობ, საკუთარ თავსაც ამ რეალობის ნაწილად მივიჩნევ.

- განათლება ახსენეთ და, ამისთვის თუ გრჩებათ დრო?

- ბოლო სამი წლის განმავლობაში, ჩემი საფეხბურთო გრაფიკიდან გამომდინარე, ვეღარ ვიარე სკოლაში. ამის მიუხედავად, ძალიან მიყვარს კითხვა და როგორც კი მიჩნდება შანსი, სულ ვკითხულობ რაღაცას...

- რომელ კლუბში თამაშზე ოცნებობთ?

- თუ ოცნებაა, "მანჩესტერ სიტიში" ვითამაშებდი დე ბრუინის ადგილზე...

ყოველდღიური სპორტული გაზეთი "ლელო"
20154
მკითხველის კომენტარები / 3 /
Gela
0
Mec minda barsashiiiiiiiiiii
Gexvecebit amikvanon
ირაკლი
0
წარმატებები
მსგავსი ამბები
რუბრიკის სხვა სიახლეები
;