ლელოს რჩეულნი. როინ კვასხვაძე, თავმდაბალი გმირი

ვინ იყო საქართველოს ეროვნული ჩემპიონატის საუკეთესო მეკარე დასრულებულ სეზონში?

ამ კითხვას ერთი პასუხი აქვს - ქუთაისის "ტორპედოს" 28 წლის კარის დარაჯი როინ კვასხვაძე, ვინც შეუცვლელად ჩაატარა მთელი სეზონი და "დინამოსთან" საჩემპიონო შეხვედრის ბოლო წამზე მოგერიებული პენალტით ჩვენი პირველობის ერთ-ერთი მთავარი გმირიც გახდა.

საქართველოს ნაკრების მეკარემ მესამედ მოიგო საჩემპიონო ტიტული. ცხადია, "ლელომ" ის სეზონის საუკეთესო გოლკიპერად დაასახელა და პირველი რესპონდენტი იქნება ინტერვიუების ციკლში, რომელიც სწორედ ჩვენს რჩეულებს მიეძღვნება...

- სეზონის შეფასება თქვენი მხრიდან, ალბათ, ცალსახად დადებითი იქნება. გულს მხოლოდ თასის ფინალში განცდილი მარცხი დაგწყვეტდათ...

- პირველ რიგში, მადლობა "ლელოს", რომ გამომარჩია. ეს კიდევ უფრო მმატებს პასუხისმგებლობას... რაც შეეხება სეზონის შეფასებას, რა თქმა უნდა, დადებითად შევაფასებ. კი, გულდასაწყვეტი იყო მარცხი თასის ფინალში, მაგრამ ჩვენ შევძელით და გავხდით საქართველოს ჩემპიონები.

"ტორპედოსთვის" და მთელი ქუთაისისთვის დიდი ზეიმი იყო. კიდევ ერთხელ ვულოცავ ჩემს გუნდს და ქალაქს! რაც შეეხება ეროვნულ ლიგას, ვფიქრობ, კარგი ჩემპიონატი გამოვიდა. თითოეული ადგილისთვის ბოლომდე იყო ბრძოლა.

- ეს თქვენთვის მესამე საჩემპიონო ტიტულია. წინა ორ ჯერზე "ზესტაფონში" იპირველეთ. ცხადია, სამივე მათგანს თავისი ადგილი უჭირავს თქვენს სპორტულ ცხოვრებაში. ისე მოხდა, რომ მშობლიური ქალაქის გუნდთან ერთად პირველად მოიგეთ ქართული ოქრო...

- მაშინ ძალიან ახალგაზრდა ვიყავი, "ზესტაფონში" პირველი საჩემპიონო ტიტული რომ მოვიგე. ეს განსაკუთრებული სიხარული იყო. "ტორპედოსთან" ერთად ჩემპიონობა კი მართლაც განუმეორებელი გრძნობაა. ყველაფერ ამას ხელი შეუწყო იმ დრამატულმა, ფინალის დარმა მატჩმაც, რითიც დასრულდა ეს ჩემპიონატი.

- თქვენ მიერ მოგერიებულმა თერთმეტმეტრიანმა "ტორპედოს" ჩემპიონობა არგუნა. საინტერესოა, თამაშამდე თუ ემზადებოდით სპეციალურად პენალტისთვის, თუ სწავლობდით მოწინააღმდეგის ფეხბურთელების მიერ თერთმეტმეტრიანების შესრულების მანერას?

- როცა ასეთი მნიშვნელოვანი თამაშია, შენს წარმოდგენაში ყოველთვის არის ეს მომენტი. ფიქრობ იმ რამდენიმე ფეხბურთელის შესრულების მანერაზე, რომელმაც შეიძლება პენალტი დაარტყას. ასე ვიყავი მეც.

მახსოვს, პენალტი რომ დაინიშნა, მსაჯთან მივედი და რაღაცას ველაპარაკებოდი. ვიცოდი, არ შეიცვლებოდა გადაწყვეტილება...უბრალოდ, თავში მქონდა აზრი, რომ არავითარ შემთხვევაში არ უნდა გამეშვა გოლი.

პირდაპირ გეტყვით, არ ვიცი, რატომ, მაგრამ მჯეროდა, რომ არც გავუშვებდი.

თავდაჯერებული ვიყავი ძალიან. მქონდა შეგრძნება, რომ გმირი უნდა გავმხდარიყავი. მართლა ვერ ვიტყვი ახლა, რატომ იყო ასე. არადა, ნამდვილად არ ველოდი, თუ ოთარ კიტეიშვილი შუაში დაარტყამდა

- ვიცით, რომ კიტეიშვილს დაურეკეთ და გაამხნევეთ...

- იმ მომენტში ოთოსთვის არაფერი მითქვამს. როცა ემოციები ცოტა გაცივდა, მერე დავურეკე. ეს ფეხბურთია... შეიძლება, დღეს შენ იყო გმირი, ხვალ სხვას გაუღიმოს ბედმა... ზუსტად ვიცი, ოთარს რომ გაეტანა, ისიც დამირეკავდა, გვერდში დამიდგებოდა, გამამხნევებდა... ჩვეულებრივი მომენტია.

ადამიანები გვერდით უნდა დავუდგეთ ერთმანეთს. სულაც არ მიმაჩნია, რომ რაღაც განსაკუთრებული გავაკეთე. ოთარს ძალიან კარგად ვიცნობ, ძალიან კარგი ფეხბურთელია... თან ემოციურია და ვიცი, როგორ განიცადა. ამასთან, მჯერა, რომ ძალიან დიდი წარმატებები ელოდება კარიერაში.

- მთელი ჩემპიონატი შეუცვლელად ჩაატარეთ და ყველაზე ნაკლები გოლი გაუშვით. ამას ფეხბურთში სტაბილურობა ჰქვია და ეს, ალბათ, ყველაზე ფასეული თვისებაა ნებისმიერი ამპლუის მოთამაშისთვის, განსაკუთრებით - მეკარისთვის. როგორ მიაღწიეთ ამას?

- ალბათ, მთავარი იყო ის გარემო, რომელიც კლუბში შეიქმნა. "ტორპედო" მართლაც ერთი დიდი ოჯახია. იყო შემთხვევები, როცა თითქმის გამორიცხული ყოფილა ჩემი თამაში, მაგრამ გამაყუჩებელი გამიკეთებია და ისე გავსულვარ მინდორზე...

ალბათ, თავისი როლი ითამაშა იმან, რომ ჩემპიონობისთვის ვიბრძოდით და იყო უდიდესი მოტივაცია. და კიდევ - მყავს დიდებული კონკურენტები მაქსიმე ქვილითაიასა და კახა მეშველიანის სახით...

- სწორედ მათზე უნდა გკითხოთ. თქვენ შეუცვლელად ითამაშეთ მთელი სეზონი. როგორც წესი, ამ დროს "თეთრი შური" მაინც ჩნდება. ზუსტად ვიცი, რომ თქვენს კონკურენტებში ესეც არ ყოფილა...

- ყველა მეკარეს აქვს ამბიცია, რომ ითამაშოს. ეს ასეც უნდა იყოს და თუ სპორტსმენი ხარ, სხვანაირად წარმოუდგენელია. ზუსტად ვიცი, რომ ჩვენ ყველას სუფთა გული გვაქვს. გამორიცხულია იმის გაფიქრებაც კი, ნეტავ, ახლა ეს შეცდეს, მე რომ დავდგე კარში მომდევნო შეხვედრაშიო...

ვარჯიშებზე ვინც შედარებით უკეთეს ფორმაშია, ვინც კონკრეტულ მომენტში უფრო კარგად გრძნობს თავს, იმან უნდა ითამაშოს. ასეა ჩვენთან. ამ ეტაპზე ალბათ მე ვიყავი ასეთი. მართლა ვამაყობ, რომ ასეთი მეკარეები ჰყავს "ტორპედოს". ისინი ჩემი უახლოესი მეგობრები, ძალიან კარგი, უაღრესად თავმდაბალი და წესიერი ადამიანები არიან.

- "ტორპედოს" ჩემპიონთა ლიგაში მოუწევს ასპარეზობა. იყო მომენტი, როცა ევროპალიგაში "ტრენჩინთან" წარუმატებლობის შემდეგ ბევრმა ჩათვალა, რომ გუნდი საბოლოოდ დაეშვა დაღმართში. არადა, პირიქით მოხდა...

- "ტრენჩინთან" თამაშს რაც შეეხება, ეს იყო საშუალო, ან, შეიძლება უფრო დაბალი დონის ევროპული კლუბი. გული მტკივა იმის გამო, რაც მოხდა. ჩემი აზრით, ქართული კლუბები ასეთ გუნდებს უნდა უგებდნენ.

მოხდა ის, რაც მოხდა და ახლა აღარ მინდა ყველა მიზეზზე ლაპარაკი... მხოლოდ ერთს ვიტყვი - ჩვენ ევროპალიგაში გავედით თასიდან. მაშინ გუნდი უმაღლეს ლიგაში ადგილის შესანარჩუნებლად იბრძოდა.

დაიწყო ახალი სეზონი და... ჩემი აზრით, "ტორპედო" არ იყო მზად ევროთასებზე კარგად სათამაშოდ. ახლა სულ სხვა, უფრო ძლიერი გუნდი გვყავს. რა თქმა უნდა, მასაც სჭირდება გაძლიერება იმისთვის, რომ ჩემპიონთა ლიგაში კარგი თამაშით გაახაროს ქართველი გულშემატკივარი.

- როცა "ტორპედოს" წარმატებაზე ვლაპარაკობთ, გვერდს ვერ ავუვლით კახა ჩხეტიანის როლს. თავის დროზე თქვენ თანაგუნდელებიც იყავით "ზესტაფონში"...

- კახას წვლილი მართლაც უდიდესია. მის გარეშე არ იქნებოდა ეს დიდი წარმატება. კი, ჩვენ ერთად ვთამაშობდით "ზესტაფონში" და ახლაც მეგობრები ვართ, მაგრამ ეს - მინდვრის გარეთ, მინდორზე კი ჩვენ ვართ მწვრთნელი და ფეხბურთელი.

კახას პიროვნული თვისებები ყველამ კარგად იცის. მან მაგრად შეკრა გუნდი. ეს ყველაფრიდან კარგად ჩანს. ყველამ ზუსტად იცოდა გუნდში თავისი როლი და ადგილი. ალბათ, თქვენც დამეთანხმებით, რომ "ტორპედოში" ყველა ერთისთვის იყო და ერთი - ყველასთვის. ეს ძალიან მნიშვნელოვანი მომენტია.

- ჩემპიონთა ლიგაში ასპარეზობა დიდი გამოწვევაა. ცხადია, "ტორპედოს" სჭირდება კაპიტანი...

- კლუბმა უკვე დაიწყო მოლაპარაკება ფეხბურთელებთან ახალ კონტრაქტებზე. ზოგიერთ მოთამაშესთან უკვე გაფორმდა ახალი ხელშეკრულება. ამ ეტაპზე, "ტორპედოსთან" ჯერ არ გამიფორმებია ახალი ხელშეკრულება, მაგრამ იმედი მაქვს, ამ მხრივ ყველაფერი კარგად იქნება.

ყოველდღიური სპორტული გაზეთი "ლელო"
3209
მკითხველის კომენტარები / 1 /
ენლილ
0
ოდესღაც ქართულში გვქონდა მშვენიერი სიტყვა-მეკარე. რატომ "გოლკიპერი" და არა "მეკარე"?
მსგავსი ამბები
რუბრიკის სხვა სიახლეები
;