ლეონარდო ჟარდიმი: არ ვარ მწვრთნელი, რომელიც კაბინეტშია ჩაკეტილი

 ლეონარდო ჟარდიმი მოკრძალებული კაცია. ჩუმად აკეთებს თავის საქმეს. მიუხედავად იმისა, რომ 43 წლის პორტუგალიელ სპეციალისტზე დღეს ბევრს წერენ და ლაპარაკობენ, ის სულაც არ მიიჩნევს საკუთარ თავს მსოფლიო სამწვრთნელო ელიტის წარმომადგენლად, თუნდაც იმიტომ, რომ "მონაკოს" მწვრთნელია და არა "რეალის" ან "ბარსელონასი". თუმცა ექსპერტები ამტკიცებენ, რომ ის უკვე მზად არის, რომელიმე გრანდი ჩაიბაროს...

"ფრანს ფუტბოლთან" ინტერვიუში ლეონარდო ჟარდიმი საინტერესო თემებზე ლაპარაკობს...

მოუთმენლად ველი, როდის დადგება ორშაბათი...

- ცოტა ხნის წინ "ტვიტერის" საკუთარ გვერდზე ალექს ფერგიუსონის ფოტო განათავსეთ. ის თქვენი კერპია?
- უდიდესი მწვრთნელია! ერთხელ ნიონში, უეფას შტაბ-ბინაში შევხვდით ერთმანეთს და გავისაუბრეთ. მან მითხრა, რომ ძალიან მოსწონს "მონაკოს" სტილი, რომ ჩვენ ვპროგრესირებთ... ძალიან სასიამოვნოა ამ რანგის სპეციალისტისგან ასეთი სიტყვების მოსმენა.

- "მონაკოში" იმდენ ხანს აპირებთ ყოფნას, რამდენიც ფერგიუსონმა "მანჩესტერში" დაყო?
- დიახ, მაგრამ თანამედროვე ფეხბურთში უფრო რთულადაა საქმე. თავის დროზე, ფერგიუსონსაც ჰქონდა პრობლემები "იუნაიტედში", მაგრამ არ გაათავისუფლეს. დღეს კლუბებში სხვა წესები მოქმედებს. აგერ, კლაუდიო რანიერის მაგალითი - "ლესტერი" ჩემპიონი გახადა, მაგრამ მომდევნო სეზონში მოხსნეს.

- ადრე თქვით, რომ 45 წლამდე აპირებდით მწვრთნელობას. ორი წელი დაგრჩათ...
- ფეხბურთი ჯერ არ მომბეზრებია, თან საქმე მხოლოდ ფულშიც არ არის. რაღაცნაირად დამოკიდებული გავხდი საქმეზე. უკვე კვირა საღამოს მოუთმენლად ველი, როდის დადგება ორშაბათი, რომ ვარჯიშზე მივიდე. ამაშია ჩემი ბედნიერება.

პირველი ადგილი მაინც სულ სხვაა...

- თქვენ გაღიარეს უცხოეთში მომუშავე საუკეთესო პორტუგალიელ მწვრთნელად, საუკეთესოდ გაღიარეს ლიგა 1-შიც, მოიგეთ საფრანგეთის ჩემპიონატი, მიაღწიეთ ჩემპიონთა ლიგის ნახევარფინალამდე... შეიძლება ითქვას, უკვე ელიტარული მწვრთნელი ხართ...
- არა, ჯერ არ ვარ ელიტაში. საამისოდ, უფრო მეტი გამარჯვებაა საჭირო, მეტი ტიტული... ვიცი, რომ საფრანგეთის ჩემპიონობის მოგების შემდეგ ჩემზე ბევრს წერდნენ, მაგრამ მანამდე ხომ მხოლოდ საბერძნეთში ვიმუშავე ფავორიტ კლუბში ("ოლიმპიაკოსი" - რედ). მიუხედავად იმისა, რომ "ბრაგასთან" ერთად მესამე ადგილზე გავედით პორტუგალიის ჩემპიონატში, "ბეირა მარი" პრიმეირა ლიგაში გადავიდა ჩემი ხელმძღვანელობით, ხოლო ჩემპიონობამდე "მონაკო" ორჯერ იყო მესამე ადგილზე, პირველი ადგილი მაინც სულ სხვაა.

- და მაინც, თქვენ არ ხართ ჯერ კონტეს, მოურინიოს, ანჩელოტის ან გვარდიოლას დონეზე?
- უკვე გითხარით, მიღწევები ნაკლები მაქვს. უფრო დიდი გუნდის მწვრთნელი რომ ვყოფილიყავი, ალბათ, მათ დონეზეც ვიქნებოდი.

- არადა, თქვენ არასოდეს გითამაშიათ პროფესიულ დონეზე...
- მიმაჩნია, რომ მწვრთნელისთვის სულაც არ არის აუცილებელი სახელოვანი საფეხბურთო წარსული. უბრალოდ, უნდა იცოდე მართვა, გქონდეს ანალიზის უნარი და კარგად ერკვეოდე ფიზიოლოგიაში. და მთავარი - უნდა იცოდე, როგორ აიყვანო ფეხბურთელი ახალ, უფრო მაღალ დონეზე. მთელი ცხოვრება ვშრომობ, ვსწავლობ... ვცდილობ, ყოველდღიურად სრულვყო ჩემი საფეხბურთო ცოდნა.

აქ უფრო მედიისგან მოდის სტრესი...

- ფანატიკურად გიყვართ ფეხბურთი, თქვენი საქმე. როგორ ისვენებთ ხოლმე?
- ჩემთვის დასვენების ადგილი ერთია - ოჯახი. თუ საჭიროა, მეუღლესაც ვეხმარები. ვხვდები მეგობრებსაც, ძალიან მიყვარს ზღვა, თევზაობა, სერფინგი... მე ხომ კუნძულ მადეირადან ვარ...

- ამბობენ, რომ მწვრთნელის საქმიანობა ყოველთვის სტრესია. მართლა ასეა?
- ბოლომდე ვერ დავეთანხმები. მე მგონი, უფრო სტრესული პროფესიებიც არის, მაგალითად - ქირურგი, რომელიც გულზე ოპერაციას აკეთებს. ერთი შეცდომა და... ფეხბურთში კი შეცდი, რამდენიც გინდა. აქ უფრო მედიისგან მოდის სტრესი. სულ შენზე ლაპარაკობენ. ვიღაცას ეს ძალიან უშლის ნერვებს, მაგრამ მე - არა.

- ნუთუ, არაფერს გამოჰყავხართ წყობილებიდან?
- მე მწვრთნელი ვარ და საკუთარ თავს უნდა ვაკონტროლებდე. წინააღმდეგ შემთხვევაში, არასწორ გადაწყვეტილებებს მივიღებ. ძალიან მომთმენი ვარ თანაშემწეებისა და ფეხბურთელების მიმართ.

ჯობია, მასზე დრო არ დაკარგოთ

- შეგიძლიათ ტალანტის აღმოჩენა და მერე მისი განვითარება?
- რას ნიშნავს "ტალანტის განვითარება"? რომ იცოდეთ, ეს არ არის მხოლოდ ტექნიკური ზრდა, ან ფიზიკური სრულყოფა, აუცილებელია ფსიქოლოგიური ფაქტორიც. ფეხბურთელს უნდა შეეძლოს კონკრეტულ მომენტებში სწორი გადაწყვეტილებების მიღება. ფსიქოლოგიაში რაღაც გამეგება და ამ მხრივ, მოთამაშეებთან ძალიან ბევრს ვმუშაობ.

- რა დრო გჭირდებათ საიმისოდ, რომ შეატყოთ ჭაბუკ ფეხბურთელს, აქვს თუ არა ტალანტი?
- თუ მეკარე კარგად თამაშობს ხელითაც და ფეხითაც, მაგრამ სიმაღლით მხოლოდ 170 სანტიმეტრია, ჯობია, მასზე დრო არ დაკარგოთ. მეკარის სიმაღლე მინიმუმ 180 სანტიმეტრი უნდა იყოს... ან, მაგალითად, ფლანგის ფეხბურთელი - თუ მას სისწრაფე არ აქვს, ვერ თამაშობს პრესინგს და ტექნიკაშიც მოიკოჭლებს, ესეც დაკარგული დროა. რაც შეეხება სწორად მოძრაობას, სწორად გადაადგილებას, ამის გაუმჯობესება შეიძლება 80 პროცენტით. ეს ეხება საფეხბურთო აზროვნებასა და ფსიქოლოგიურ მომზადებასაც.

ფეხბურთელმა ერთი წუთი რომ დააგვიანოს ვარჯიშზე...

- კილიან მბაპე თქვენს შეგირდებს შორის ყველაზე ნიჭიერი იყო?
- მის თანატოლებს შორის - კი. 16 წლის იყო, როცა გუნდში ავიყვანე და ეს ძალიან მახარებს. თუ შეიძლება ასე ითქვას, კარგად ვიმუშავეთ მასზე, მაგრამ უფრო მეტს თავადაც შრომობდა საკუთარ თავზე. თუ ფეხბურთელები ფიქრობენ, რომ მხოლოდ მწვრთნელია მათი წარმატების საწინდარი, ასე არ არის და მბაპე ამის ნათელი მაგალითია.

- როგორია ფეხბურთელებთან თქვენი ურთიერთობის სტილი?
- ახლოს ვარ მათთან, ოღონდ, გარკვეულ დისტანციასაც ვიცავ. არ ვარ მწვრთნელი, რომელიც კაბინეტშია ჩაკეტილი. ყოველდღე ინდივიდუალურად ვესაუბრები ფეხბურთელებს, მაგრამ არა მხოლოდ საქმეზე - ხანდახან ვხუმრობთ, ვიცინით...

- ...მაგრამ მომთხოვნიც ხართ?
- ფეხბურთელმა ერთი წუთი რომ დააგვიანოს ვარჯიშზე, ან სხვადასხვა ფერის ბუცებით მოვიდეს, ეს არ არის საშინელება. მთავარია, კარგად ივარჯიშოს. აი, აქ კი ძალიან მკაცრი ვარ.

- სუსტი წერტილები თუ გაქვთ?
- ფრანგული ენა! (იცინის). მაგრამ დღეს ფეხბურთი მრავალეროვანია. იწყებ პორტუგალიურით, გადადიხარ იტალიურზე და ამთავრებ ფრანგულით...


მთავარია, ამით იღებდე კმაყოფილებას

- გვარდიოლა, კონტე, მოურინიო... ისინი ყოველთვის მოდურად არიან ჩაცმულები. თქვენ ამას ყურადღებას არ აქცევთ?
- მე ჩემი იმიჯი მაქვს. კოსტიუმი, ჰალსტუხი... არ ვგიჟდები ამაზე, არ არის ეს ჩემი სტილი. მთავარია, მოხერხებულად მეცვას და რაღაც არ მიშლიდეს ხელს. ასეთ დროს ტვინიც კარგად მუშაობს.

- რომელიმე კლუბზე ან ნაკრებზე თუ ოცნებობთ?
- არა. თუ კომფორტულად ხარ იქ, სადაც ხარ, მერე აღარაფერზე ფიქრობ. რა თქმა უნდა, მეც მსურს რომელიმე დიდ კლუბში მუშაობა, ეს არ არის თვითმიზანი. მთავარია, ამით კმაყოფილებას იღებდე. დღესდღეობით, "მონაკოშიც" კარგად ვარ.

- ...მაგრამ ყოველ სეზონში გუნდიდან მიდიან საუკეთესო ფეხბურთელები...
- ასეთია პოლიტიკა "მონაკოში". ჩვენი პროექტის არსი ისაა, რომ აღვზარდოთ ფეხბურთელები და დავაწინაუროთ, ახალ სიმაღლეზე ავიყვანოთ. ძალიან მომწონს ეს სამუშაო.

- და როგორ ეხამება ეს ბიზნესი ფეხბურთისადმი თქვენს უანგარო სიყვარულს?
- არ ფიქრობ იმაზე, ბიზნესია ეს თუ არა. ცხადია, ძალიან მინდა საუკეთესო ფეხბურთელების შენარჩუნება, მაგრამ როცა სხვა გამოსავალი არ არის და ისინი მაინც მიდიან, უკვე ახალი გამოწვევის წინაშე დგები - ახალი ტალანტები უნდა აღმოაჩინო და აღზარდო. ეს სასარგებლოა იმ მხრივაც, რომ მწვრთნელიც იზრდება და ვითარდება.

ყოველდღიური სპორტული გაზეთი "ლელო"

537
მკითხველის კომენტარები / 0 /
მსგავსი ამბები
რუბრიკის სხვა სიახლეები