ლეონარდო რიბეირო: 'დილას' შეუძლია ტიტულის მოგება... საქართველო კი ძალიან მომწონს

საქართველოს ჩემპიონატის დამფასებელი დაგვეთანხმება: "დილას" ბრაზილიელი ლეგიონერი ლეანდრო რიბეირო ერთ-ერთი საუკეთესოა ჩვენს პირველობაზე.

23 წლის გარემარბს უდიდესი წვლილი აქვს გიორგი დარასელიას გუნდის წარმატებებში...

გორელთა ლიდერმა "ლელოს" კითხვებს უპასუხა...

- გაიხსენეთ ფეხბურთში თქვენი პირველი ნაბიჯები...

- თამაში დავიწყე ბრაზილიაში, კერძოდ, "ვასკო და გამაში".

- როგორ მოხვდით საქართველოში?

- გორის "დილას" მოწვევით. დავთანხმდი, რადგან ყოველთვის მზად ვარ ახალი გამოწვევებისთვის.

- მცირე ხნით ითამაშეთ ისრაელში. რატომ ვერ აეწყო იქ თქვენი კარიერა?

- მწვრთნელი არ მაძლევდა სათამაშო დროს და აქედან გამომდინარე, არ მომეცა ჩემი შესაძლებლობების დამტკიცების საშუალება. სულ ეს იყო.

- ...და დაბრუნდით "დილაში" . რატომ მიიღეთ ასეთი გადაწყვეტილება?

- ჩემთვის ფეხბურთის თამაში სიამოვნებაა და ბედნიერი ვარ, როცა თამაშის შესაძლებლობა მეძლევა. ამიტომ ვარჩიე "დილაში" დაბრუნება.

- როგორ ფიქრობთ, რა შედეგის მიღწევა შეუძლია "დილას" მიმდინარე სეზონში?

- მე მხოლოდ მაღალ მიზნებზე ვფიქრობ და მიმაჩნია, რომ წელს "დილას" შეუძლია ჩემპიონის ტიტულისთვის ბრძოლა.

- რას იტყვით საქართველოს ჩემპიონატის შესახებ? რა არის ამ ტურნირის მთავარი დადებითი მხარე და მინუსი?

- საქართველოს ჩემპიონატში ძალიან დიდი კონკურენციაა და ვფიქრობ, "დილას" შეუძლია, გაუძლოს ამ გამოწვევას. მე ყველაფერს გავაკეთებ ამისთვის.

- როგორ შეეჩვიეთ საქართველოს? როგორ მოგწონთ ხალხი? ჩვენი სამზარეულო?

- საერთოდ, იოლად ვეჩვევი სხვადასხვა კულტურასა და გარემოს. ძალიან მომწონს საქართველო, სტუმართმოყვარე ხალხი ხართ... ქართულ სამზარეულოსთან ჯერ კიდევ მიჭირს შეგუება, რადგან ძალიან მიყვარს ბრაზილიური კერძები.

- როგორ ატარებთ თავისუფალ დროს?

- მიყვარს ფილმების ყურება, საყიდლებზე სიარული... ხშირად ველაპარაკები ჩემს ნათესავებს ბრაზილიაში.

- ვის დაუმეგობრდით გუნდში ყველაზე მეტად?

- ნოდარ ქავთარაძეს, ფორტესს და ლემპტის.

- ბრაზილიის ნაკრების გარდა, რომელ კლუბს ან ნაკრებს ქომაგობთ?

- "ბარსელონას".

- როგორ ფიქრობთ, რას იზამს თქვენი სამშობლოს ნაკრები მსოფლიოს ჩემპიონატზე?

- მჯერა, ბრაზილია მსოფლიოს ჩემპიონი გახდება. მართლაც ძალიან ძლიერი გუნდი გვყავს წელს. წინ, ბრაზილია!

ყოველდღიური სპორტული გაზეთი "ლელო"
1627
მკითხველის კომენტარები / 0 /
მსგავსი ამბები
რუბრიკის სხვა სიახლეები
;