ლეროი სანე; გვარდიოლა ისეთი დესპოტიც არ არის...

შარშან ლეროი სანე ყველაზე ძვირად ღირებული გერმანელი ფეხბურთელი გახდა - 20 წლის შემტევი ნახევარმცველი "მანჩესტერ სიტიმ" "შალკესგან" 55 მილიონ ევროდ იყიდა. "ფრანს ფუტბოლთან" ინტერვიუში სანე ლაპარაკობს თავის ფესვებზე, ოცნებებსა და სხვა საინტერესო თემებზე...

რომელი მეფე მე ვარ!..

- იცით, ვინ თქვა ეს სიტყვები - "იცხოვრო შენი ვნებით, მაგრამ იყო მომთმენი სხვების მიმართ, ეს განსაკუთრებული ნიჭია"?
- არ ვიცი.

- ...სენეგალის ნაკრების ყოფილმა მწვრთნელმა, რომლის გუნდშიც ერთ დროს მამათქვენი - კლოდ ლე რუაც თამაშობდა, ადამიანი, ვის პატივსაცემად დაგარქვეს ლეროი (მწვრთნელის გვარი ფრანგულად იწერება ისევე, როგორც ფეხბურთელის სახელი - Leroy, ოღონდ დაშორებით - Le Roy).
- აი, თურმე რა... მე არ ვიცნობ იმ მწვრთნელს, ვიცი მხოლოდ ის, რომ ჩემი სახელი ნიშნავს "მეფეს". მაგრამ სახელი სახელია, მეტი არაფერი, რომელი მეფე მე ვარ (იცინის)!

- თქვენს ოჯახს ბევრი რამ აკავშირებს საფრანგეთთან. ბებია და ბაბუა იქ მუშაობდნენ, მამა "ტულუზში" თამაშობდა, თქვენ კი გერმანიის ნაკრების ფეხბურთელი ხართ...
- ...იმიტომ, რომ გერმანიაში დავიბადე და გავიზარდე, ამიტომ, თავს გერმანელად ვთვლი. არასოდეს მიფიქრია ასეთ არჩევანზე - გერმანია, სენეგალი თუ საფრანგეთი. რა თქმა უნდა, გერმანია!

- ...მაგრამ ზურგზე ტატუ გაქვთ და ეს, თითქოს, სენეგალური მოტივია...
- სენეგალის რუკაა. მამა ამ ქვეყანაში დაიბადა, ჩემი ფესვები აფრიკაშია, მაგრამ იქვეა გერმანიის რუკაც...

გოლი ჩემპიონთა ლიგაში

- კიდევ ერთი თემა. თქვენ იზეიმეთ "მონაკოს" კარში გატანილი გოლი, რომელიც წინა ჩემპიონთა ლიგის 1/8 ფინალში გაიტანეთ ("მანჩესტერ სიტის" მეხუთე გოლი თამაშში, რომელიც 5:3 დასრულდა). ეს განსაკუთრებული მოვლენა იყო თქვენს ცხოვრებაში?
- ისეთი არაფერი, მთავარი იყო გოლი ჩემპიონთა ლიგაში.

- მამათქვენი იყო ერთ-ერთი პირველი აფრიკელი ბუნდესლიგაში, რომელიც "ფრაიბურგსა" და "ნიურნბერგში" თამაშობდა. დედა, რეგინა ვებერი, ტანმოვარჯიშე იყო და 1984 წლის ოლიმპიადაზე ბრინჯაოს მედალი მოიპოვა. ცდილობდით, მშობლების კვალს გაჰყოლოდით?
- პატარა რომ ვიყავი, არაფერი ვიცოდი მათ წარმატებებზე. და საერთოდ, არასოდეს მიცდია მშობლების წინ დამეყენებინა საკუთარი თავი, უბრალოდ, მინდოდა ფეხბურთი მეთამაშა და ამისგან სიამოვნება მიმეღო. მშობლებისგან არანაირი წინააღმდეგობა არ ყოფილა.

- მაგრამ გენები სახეზეა - სისწრაფე, ძალა, ამტანობა! დედას და მამას მადლობა ეკუთვნით?
- კი, მამა ძალიან სწრაფი იყო და ეს მისგან მაქვს. ფიზიკური მონაცემები, ათლეტიზმი - ეს უკვე დედისგან მოდის ალბათ. თუმცა მხოლოდ გენები არ არის წარმატების წინა პირობა, ბევრი შრომაცაა საჭირო, დიდ გამარჯვებებს რომ მიაღწიო.

ჩვენ არ ვუკვეთთ მუსიკას, ეს კლუბების ბიზნესია...

- ყველაზე ძვირად ღირებული გერმანელი ფეხბურთელი ხართ. პასუხისმგებლობის ტვირთი ძალიან მძიმეა?
- სიმართლე გითხრათ, არ ვფიქრობ ამაზე. გასულ ზაფხულს იმდენი ძვირად ღირებული ტრანსფერი იყო... ჩვენ ფეხბურთელები ვართ და მუსიკას არ ვუკვეთთ, ეს კლუბების ბიზნესია. შეიძლება, ვიღაცას ეს ტვირთად აწევს, მაგრამ მე - არა. მთავარია, ერთ ადგილზე არ გავჩერდე, ბევრი ვისწავლო და საუკეთესო ვიყო როგორც ვარჯიშებზე, ისე თითოეულ მატჩში.

- თუ ფეხბურთელში ამხელა თანხას იხდიან, მისგან შესაბამის უკუგებასაც ელიან...
- სინამდვილეში, მე ასე მგონია, ამხელა თანხა არც ერთი ფეხბურთელი არ ღირს, როგორი მაღალი კლასისაც უნდა იყოს. მე ხომ არ მითქვამს, ამდენი და ამდენი გადაიხადეთ ჩემში-მეთქი. მე ფეხბურთს სხვანაირად ვუყურებ - ეს ჩემთვის არის პროფესია, რომელიც სიამოვნებას მგვრის.

- ...მაგრამ ფეხბურთი არის ასევე გულშემატკივარი, მედია, ფინანსური ურთიერთობები... არის ბევრი რამ, რაც ხელს უშლის თამაშისგან სიამოვნების მიღებას. ასე არ არის?
- გარკვეულწილად ასეა. სიამოვნების მიღება სულ უფრო ძნელი ხდება - უნდა მოიგო მატჩები, ტურნირები... რაც უფრო ტიტულოვანია კლუბი, მით უფრო მეტია წნეხი. მაგრამ მე მაინც დარწმუნებული ვარ, რომ მთავარია ფეხბურთისგან სიამოვნების მიღება.

მათ დონეს რომ მივაღწიო...

- ერთი წლის წინ ცნობილმა ინგლისურმა გამოცემამ პრემიერლიგის "ყველაზე ცუდი ახალწვეული" გიწოდათ. გაბრაზდით?
- მართლა? ასეთი რამ არ წამიკითხავს. ინტერნეტში, სოცქსელებში ბევრი ნეგატივია და ის საერთოდ არ მაინტერესებს. ყველა ფეხბურთელს აქვს უიღბლო პერიოდი. ხალხს ავიწყდება ჩემი ასაკი, არ ითვალისწინებენ, რომ ჩავედი უცხო ქვეყნიდან... ისინი ასე მსჯელობენ - რადგან შენში ამდენი გადაიხადეს, ვალდებული ხარ, ყოველთვის საუკეთესო იყო! მაგრამ ეს ხომ შეუძლებელია?! ყველაზე დიდი ფეხბურთელებიც კი ვერ ახერხებენ ყველა მატჩში გოლის გატანას.

- მესი, რონალდო, ნეიმარი, გრიზმანი... ბევრი გაკლიათ მათ დონემდე?
- არ მიფიქრია ამაზე. გასაგებია, რომ ისინი ასაკით ჩემზე უფროსები და უფრო გამოცდილები არიან, უამრავი მიღწევაც აქვთ... მათ დონეს რომ მივაღწიო, კიდევ ბევრი ოფლის ღვრაა საჭირო. ვერავინ იტყვის წინასწარ, რომ სამ-ოთხ წელიწადში მათ დონეს მიაღწევს... მაგრამ მე ვცდილობ...

მწვრთნელი კი არა, სასწაულია...

- ერთი წლის წინ "სიტი" გვარდიოლას გამო აირჩიეთ...
- დიახ, აქ სწორედ მის გამო ვარ. ის, რაც გვარდიოლამ "ბარსელონასა" და "ბაიერნში" გააკეთა, უბრალოდ, ფანტასტიკაა! ველაპარაკე ახალგაზრდა ფეხბურთელებს, რომლებიც მისი ხელმძღვანელობით თამაშობდნენ და იცით, რას ამბობენ ისინი? რომ გვარდიოლა მწვრთნელი კი არა, სასწაულია. მან იცის, როგორ აიყვანოს ფეხბურთელი უმაღლეს დონეზე.

- ახალგაზრდებთან უფრო მკაცრია თუ ვეტერანებთან?
- სინამდვილეში, ის ისეთი დესპოტიც არ არის, როგორც ბევრს ჰგონია. რა თქმა უნდა, ახალგაზრდებს უფრო მეტს გვთხოვს, მაგრამ ისიც იცის, რომ ჩვენ ეს კარგად გვესმის. გვარდიოლას მიზანი გასაგებია - მას უნდა, რომ თამაშის დროს ყველაფერი ლაღად და ძალდატანების გარეშე გავაკეთოთ, მოედანზე სწორი გადაწყვეტილებები მივიღოთ... ეს კი ბევრი ვარჯიშის გარეშე შეუძლებელია.

ყველაფერი გაცილებით რთულადაა

- "სიტიში" ბევრი ახალგაზრდა ტალანტია...
- ...და ეს სწორი პოლიტიკაა. გუნდში ბევრია ჩემი ასაკის ფეხბურთელი და ჩვენ საერთო ინტერესები გვაქვს. საჭიროა ოპტიმალური ბალანსი ახალგაზრდებს და ვეტერანებს შორის. სხვანაირად არ გამოვა, რადგან რთულ მატჩებში ახალგაზრდებს გამოცდილება არ გვყოფნის.

- ...რაც მოხდა კიდეც ჩემპიონთა ლიგის წინა გათამაშებაში, როცა "სიტი" "მონაკოსთან" 1:3 დამარცხდა და ტურნირს გამოეთიშა...
- არა, სინამდვილეში ყველაფერი გაცილებით რთულადაა. მიზეზი უფრო ფსიქოლოგიაში იყო. პირველ მატჩში, უბრალოდ, ბრწყინვალედ ვითამაშეთ, თითქოს, ეს იყო სეზონის უმთავრესი დაპირისპირება. მაგრამ საპასუხო მატჩის პირველ ტაიმში ცუდად ვითამაშეთ, არადა, სასწორზე იდო მეოთხედფინალის საგზური... მეორე ტაიმში ამას უიღბლობაც დაემატა და როცა გავიტანეთ, უკვე დაგვიანებული იყო.

- ანუ, ეს იყო გაკვეთილი მომავლისთვის?
- გაკვეთილი მთელი ცხოვრებისთვის. დარწმუნებული ვარ, ასეთ შეცდომებს აღარ გავიმეორებთ. ამიტომ, წლევანდელი სეზონი აუცილებლად წარმატებული უნდა იყოს!..

ყოველდღიური სპორტული გაზეთი "ლელო"
1553
მკითხველის კომენტარები / 0 /
მსგავსი ამბები
რუბრიკის სხვა სიახლეები
;