ლიგა 1. XXV ტურის წინათქმა: როცა ბერნაბეუმდე ოთხი დღე რჩება

როცა პსჟ-ს ფეხბურთელები შაბათს ტულუზის "მუნისიპალზე" ჩამწკრივდებიან, გონებით ისინი ოთხი დღის შემდეგ "სანტიაგო ბერნაბეუზე" გასამართავ მატჩზე იქნებიან და, შესაძლოა, ფეხებსაც მოუფრთხილდნენ, მით უფრო, რომ საფრანგეთის ლიგა 1 ფაქტობრივად მოგებულია

უნაი ემერის გუნდი 11 ქულით უსწრებს "მარსელს", 12-ით "მონაკოს", ხოლო "ლიონს" - 14-ით.

აი, "ტულუზი" კი გასავარდნ ზონას 2 ქულით, პლეი აუთს კი სულ რაღაც ქულით უსწრებს და დასაკარგი არაფერი აქვს. ტრავმები პარიზელთა ტრიოს აწუხებს - ადრიენ რაბიოს, იულიან დრაქსლერსა და ტიაგო მოტას.

აქედან, გერმანელსა და იტალიელს ტულუზში ველით, ახალგაზრდა ფრანგს კი, სავარაუდოდ, არა. მასპინძლებს არ ეყოლებათ ბრაზილიელი სომალია.

ამ გუნდების შეხვედრა პირველ წრეში ნეიმარის დებიუტს დაემთხვა "პარკ დე პრენსზე" პსჟ-ს მაისურით. ბრაზილიელმა დებიუტი დუბლით აღნიშნა, ხოლო პსჟ-მ 6:2 გაანადგურა მეტოქე.

მიუხედავად იმისა, რომ "სენტ ეტიენი" ცხრილის შუაშია გაჭედილი, "მწვანეების" დაპირისპირება "მარსელთან" უდიდეს ინტერესს იწვევს. ჩემპიონი "მონაკო" "ანჟერს" სტუმრობს", ხოლო ტურს დააგვირგვინებს "ლიონის" დაპირისპირება "რენთან".

ფაქტები

* პსჟ-ს ლიგა 1-ის ბოლო 24 მატჩიდან 20-ში თითოეულში სულ მცირე, ორი გოლი აქვს გატანილი.

* როცა პსჟ ბოლოს "ტულუზს" ესტუმრა "მუნისიპალზე" 0:2 დამარცხდა (2016 წ).

* "მარსელმა" ბოლო 6 ტურში თამაშში 2 გოლი მაინც გაიტანა, აქედან კლუბმა 5 მატჩი მოიგო.

* "ანჟერმა" ბოლო სამი საშინაო მატჩი მოიგო.

* "ლიონმა ბოლო 13 საშინაო მატჩში მხოლოდ ერთხელ წააგო. "რენის" საგარეო მატჩებში ტრადიციულად ბევრი გოლი გადის.

საფრანგეთი. ლიგა 1. XXV ტური

პარასკევი, 9 თებერვალი
სენტ ეტიენი-მარსელი 23:45

შაბათი, 10 თებერვალი
ტულუზი-პსჟ 20:00
ანჟერი-მონაკო 23:00
ბორდო-ამიენი 23:00
დიჟონი-ნიცა 23:00
გენგამი-კაენი 23:00
მეცი-მონპელიე 23:00

კვირა, 11 თებერვალი
სტრასბური-ტრუა 18:00
ნანტი-ლილი 20:00
ლიონი-რენი 23:59

ბომბარდირები: 21 - ედინსონ კავანი (პსჟ), 18 - ნეიმარი (პსჟ); 17 - რადამელ ფალკაო (მონაკო); 16 - ნაბილ ფეკირი (ლიონი); 14 - მარიანო დიასი (ლიონი);13 - მარიო ბალოტელი (ნიცა), ფლორიან ტოვენი (მარსელი).

ყოველდღიური სპორტული გაზეთი "ლელო"
925
მკითხველის კომენტარები / 0 /
მსგავსი ამბები
რუბრიკის სხვა სიახლეები
;