ლივერპულის ჯადოსნური ტრიო ანუ რაღა საჭიროა კოუტინიო?

მას შემდეგ, რაც ფელიპე კოუტინიო "ბარსელონაში" გადავიდა, ბევრმა ჩათვალა, რომ "ლივერპულს" თავდასხმის ხაზში უამრავი პრობლემა გაუჩნდებოდა.

არადა, გუნდმა შედეგიანობას კი არ მოუკლო, პირიქით, მოუმატა. სადიო მანე, მოჰამედ სალაჰი და რობერტო ფირმინო ნამდვილ მონსტრებად ჩამოყალიბდნენ მოწინააღმდეგე გუნდებისთვის. როგორ და რატომ ხდება ეს?

კლოპის ფაქტორი

იურგენ კლოპს ყველაზე კარგად შეუძლია, ფეხბურთელებს თავიანთი საუკეთესო თვისებების დემონსტრირებაში დაეხმაროს. ამის მკაფიო მაგალითია 19 წლის ტრენტ ალექსანდერ-არნოლდი. ამ ახალგაზრდა ფეხბურთელმა უკვე ყველა ფრონტზე მოახერხა თავის გამოჩენა, მათ შორის - ჩემპიონთა ლიგაში.

თავის დროზე კლოპმა შეიტყო, რომ ალექსანდრ-არნოლდის ამერიკელი ნათესავები პრემიერლიგის მატჩზე დასწრებას აპირებდნენ, რომელშიც "ლივერპული" "სუონსის" ეთამაშებოდა. მან შანსი მისცა ფეხბურთელს და ახალგაზრდამაც ნდობა გატანილი გოლით გაამართლა.

"იმ შეხვედრის წინ შევიტყვე, რომ თამაშზე მისი ნათესავები იქნებოდნენ. ჩემი აზრით, არ არსებობს უკეთესი დრო, რომ ასეთ სიტუაციაში ენდო ახალგაზრდა მოთამაშეს. მანაც ბოლომდე გამიმართლა ნდობა. თამაშის მერე იმასაც კი ამბობდა - უკმაყოფილო ვარ, ჩემების თვალწინ უკეთესად უნდა მეთამაშაო", - იხსენებს კლოპი.

სადიო მანე ხშირად ექცეოდა ფილიპე კოუტინიოს ჩრდილში. ყოველ შემთხვევაში, სენეგალელი არცთუ იშვიათად უთმობდა ადგილს ბრაზილიელს ძირითად შემადგენლობაში.

ბევრი მიიჩნევს, რომ მანეს ბოლოდროინდელი ჩავარდნა სწორედ ამით იყო განპირობებული. ახლა კი ყველაფერი სხვანაირადაა. აფრიკელმა თავდამსხმელმა იგრძნო ნდობა და კიდევ უფრო უკეთ ათამაშდა.

არნახულად მოუმატა რობერტო ფირმინომაც. "გოლს პლუს პასის" სისტემით ბრაზილიელმა მიმდინარე სეზონში უკვე 30 ქულა მოაგროვა. არადა, აქამდე მისი მაქსიმუმი მხოლოდ 27 იყო. არიან ასევე ემრე ჯანი და ენდრიუ რობერტსონი, რომლებიც კლოპის ხელმძღვანელობით შესანიშნავ სეზონს ატარებენ.

გამოასწორე  შეცდომები!

აი, რას ამბობს მოჰამედ სალაჰი, ეგვიპტელი შემტევი, რომელმაც ყველა მოლოდინს გადააჭარბა: "ბედნიერებაა, იმუშაო ისეთ მწვრთნელთან, როგორიცაა კლოპი. ის არასოდეს არის კმაყოფილი და ყოველთვის მოგიწოდებს იმისკენ, რომ ხვალ დღევანდელზე უკეთესი იყო.

მაგალითად, ასეთი სეზონისთვის მე ყველა მაქებს, მაგრამ კლოპი მუდამ მიმითითებს ჩემს შეცდომებზე. მართალიც არის თუნდაც იმაში, რომ გაცილებით უკეთ უნდა გამოვიყენო საგოლე მომენტები", - ამბობს სალაჰი.

ყოველდღიური სპორტული გაზეთი "ლელო"
1603
მკითხველის კომენტარები / 0 /
მსგავსი ამბები
რუბრიკის სხვა სიახლეები
;