სიახლე Lelo.ge-ის მკითხველს! ლიონელ მესის ბიოგრაფია: 5 წლის ბავშვმა პირველ ვარჯიშზე დარტყმა ვერ გაბედა, შეეშინდა...

- ერთ-ერთი ვარჯიშისას გუნდები ორად გავყავი, თუმცა თამაში ვერ დავიწყეთ, რადგან ერთი ფეხბურთელი გვაკლდებოდა. პირით ხაზთან ბებოსთან მდგომი ბავშვი შევნიშნე, არ ვიცი რამდენი წლისა იყო, ძალიან პატარა, ბებოს ბიჭუნას მოედანზე გამოშვების ნებართვა ვთხოვე. პატარას პირველად ბურთი რომ მიუვიდა, არ დაუჭერია, გაატარა, მეორედ მარცხენა ფეხზე მიიღო და კარისკენ ისე დაიძრა, კარგ დრიბლიორს რომ შეშვენის. დავუძახე, დაარტყი-მეთქი, მაგრამ ვერ გაბედა, ალბათ ეშინოდა უფროსები არ დაჯახებოდნენ, - იხსენებს მოხუცი მწვრთნელი სალვადორ აპარისიო. 

სალვადორ აპარისიო და ლეო მესი

გავიდა 15 წელიწადი და ყველაფერი საპირისპიროდ შეიცვალა:

- ეს ფეხბურთელი თითქოს ისევ ბავშვია, გგონია, დაეჯახები, შეაშინებ და ბურთს დაგითმობს. მაგრამ სწორედ მაშინ იწყებს კარისკენ ელვის სისწრაფით სვლას, როცა გგონია, ბურთს აართმევ და მოედანზე გააცურებ. გაცურებული თავად რჩები. ბურთი ბავშვივით უყვარს და მისი ყოველი შეხება ისეთივე სახიფათოა მეტოქისთვის, როგორიც თავის დროზე მარადონასი და პელესი. მარადონასა და პელეს თამაშს კარიერის დასრულების შემდეგ ვაანალიზებთ, ამ "ბავშვს" კი აქტიური სპორტსმენობისას შეუძლია ორივეს გაასწროს, - ეს დასკვნა 1986 წლის მსოფლიოს ჩემპიონ არგენტინელ ანალიტიკოს ხორხე ვალდანოს ეკუთვნის. დიდი მარჩიელობა არ არის საჭირო იმის მისახვედრად, რომელ ფეხბურთელზე ლაპარაკობდნენ აპარისიო და ვალდანო - ლიონელ ანდრეს მესიზე.

ხორხე ვალდანო და ლეო მესი

ალბათ გაინტერესებთ, რა მოხდა 15 წელიწადში ისეთი, რამაც მფრთხალი, ჩია ბავშვი საფეხბურთო მონსტრად აქცია. ბევრი კარგი და ბევრიც ცუდი, ცხოვრება სწორედ შავისა და თეთრის ჭიდილია... მესიმ კი გაუძლო, ერთი მარტივი მიზეზის გამო: მისთვის ცხოვრებაში არსებობს არა შავი და თეთრი, არამედ ცისფერ-თეთრი (არგენტინის ნაკრების ფორმის ფერი) და ლურჯ-წითელი ("ბარსელონა") - ლეოსთვის დედამიწა ერთი უბრალო ტყავის ბურთია.

რაც ზემოთ წაიკითხეთ შესავალია წიგნისა "მესი", რომელიც "პალიტრა L-მა" გამოსცა, ავტორი კი მე, ვაჟა სიმონიშვილი გახლავართ.

დღეიდან Lelo.ge ამ წიგნს თავების მიხედვით შემოგთავაზებთ. ვფიქრობთ, დღევანდელ პირობებში საკითხავად დროც საკმარისად გვაქვს და წიგნიც გამოიწვევს მკითხველის ინტერესს.

2244
მკითხველის კომენტარები / 0 /
მსგავსი ამბები
რუბრიკის სხვა სიახლეები
;