ლიონელ მესი. უფრო შორს, ვიდრე ყოფილა...

ლიონელ მესიმ ფიფას ოფიციალურ საიტს ექსკლუზიური ინტერვიუ მისცა. უაღრესად საინტერესო საუბარში "ბარსელონასა" და მსოფლიო ფეხბურთის ცოცხალი ლეგენდა საყურადღებო თემებზე ამახვილებს ყურადღებას...

- არგენტინის ნაკრები მსოფლიოს ჩემპიონატის ერთ-ერთი მთავარი ფავორიტია. რას იტყვით ისეთ გუნდებთან შედარებაზე, როგორებიც არიან მუნდიალის ასევე აღიარებული ფავორიტები - ბრაზილია და გერმანია?

არგენტინის ნაკრებმა უნდა ისწავლოს მოსაგები თამაშების მოგება

- ჩვენ, როგორც გუნდი, ჯერ კიდევ ვიზრდებით. მსოფლიოს ჩემპიონატის შესარჩევმა ციკლმა დაამტკიცა, რომ არგენტინის ნაკრებმა უნდა ისწავლოს მოსაგები თამაშების მოგება.

იყო თამაშები, როცა ჩვენ ნაადრევად ჩავთვალეთ, რომ საქმე უკვე გაკეთებული იყო, ჯიბეში გვედო 3 ქულა და ამის გამო დავისაჯეთ კიდეც. ასეთი რამ მომავალში აღარ უნდა განმეორდეს.

- რამდენად დიდი სიურპრიზი იყო თქვენთვის ის, რომ ჩილეს ნაკრებმა ჩააფლავა კვალიფიკაცია და ვერ გავიდა მსოფლიოს ჩემპიონატზე?

- რა თქმა უნდა, მეც გაკვირვებული ვარ. ჩემი აზრით, სულაც არ ვიყავი ერთადერთი, ვისაც ეს გრძნობა დაეუფლა. ჩილე დიდებული გუნდია. ეს თუნდაც იმით მტკიცდება, რომ მათ მოახერხეს ზედიზედ ორი "კოპა ამერიკის" მოგება.

ამ ნაკრებში თამაშობენ შესანიშნავი შემსრულებლები. სამხრეთ ამერიკის შესარჩევი ციკლი ძალიან რთული სათამაშოა. განსაკუთრებით გასვლაზე ჭირს თამაში და თან ყველა ნაკრებთან.

- საინტერესოა, თუ გრძნობთ, რომ 30 წლის ხართ?

ძალიან ბედნიერი ვარ როგორც ფეხბურთში, ასევე პირად ცხოვრებაში

- სიმართლე გითხრათ, საერთოდ არ ვგრძნობ. არც ვფიქრობ ამაზე. ჩემთვის მთავარია, რომ ძალიან ბედნიერი ვარ როგორც ფეხბურთში, ასევე პირად ცხოვრებაში. ეს არის ის, რაც მაძლიერებს.

- ცხოვრებაში ყველაფერი იცვლება. საინტერესოა, თქვენი ფეხბურთიც შეიცვალა?

- არ არის ისეთი რამ ცხოვრებაში, რაც არ იცვლება. რა თქმა უნდა, შენ იცვლები ცხოვრებაში და იცვლები მინდორზეც. ეს გარდაუვალია. ცდილობ, ორივეგან სულ უფრო უკეთესი იყო. როგორ გამოგდის, ეს უკვე სხვა საქმეა, შენზე უკეთ ამას სხვები შეაფასებენ - ახლობელი ადამიანები, ჟურნალისტები და, რა თქმა უნდა, ის სპეციალისტები, რომლებიც თვალს ადევნებენ შენს თამაშს.

- ერთი ხანობა, არგენტინის ნაკრებიდან წასვლაზეც კი დაფიქრდით. საინტერესოა, თუ უშვებდით იმას, რომ "ალბისელესტე" ვერ მოხვედრილიყო რუსულ მუნდიალზე?

- ეს ჩემთვის უდიდესი ტრაგედია იქნებოდა. არც ვიცი, როგორ მივიღებდი ამას და არც მინდა, ამაზე ვიფიქრო. დარწმუნებული ვარ, ეს იქნებოდა ტრაგედია თითოეული ჩვენი ფეხბურთელისთვისაც. ეს არ უნდა მომხდარიყო და ძალიან კარგია, რომ არც მოხდა.

- არგენტინის ნაკრები მსოფლიოს ჩემპიონატზე ერთ-ერთი ფავორიტის რანგში ჩადის. რას ელით რუსული მუნდიალისგან?

- ველი, რომ არგენტინის ეროვნულ გუნდთან ერთად მექნება ბევრი კარგი მატჩი. ეს არის ჩემი მიზანი და ოცნება. მჯერა, ასეც იქნება.

- მას შემდეგ, რაც არგენტინის ნაკრები მსოფლიოს ჩემპიონატზე გავიდა, გუნდის მთავარმა მწვრთნელმა ხორხე სამპაოლიმ განაცხადა, რომ ფეხბურთი ეკუთვნის ლიონელ მესის...

- ეს დიდი პასუხისმგებლობაა ჩემთვის. ამ ნდობას და იმედს გამართლება სჭირდება. ვეცდებით, გავამართლოთ ის იმედი, რაც გულშემატკივრებშია.

- დაასრულეთ წინადადება: ლიონელ მესი 2018 წლის მსოფლიოს ჩემპიონატზე...

- (ფიქრობს). მოდით, ასე ვიტყვი: წავა უფრო შორს, ვიდრე ადრე ყოფილა...

ყოველდღიური სპორტული გაზეთი "ლელო"
2203
მკითხველის კომენტარები / 0 /
მსგავსი ამბები
რუბრიკის სხვა სიახლეები
;