ლიონელ სკალონი არგენტინის ნაკრების მთავარ მწვრთნელად რჩება

ლიონელ სკალონი გააგრძელებს მუშაობას არგენტინის ნაკრების მთავარ მწვრთნელად, - ასეთი გადაწყვეტილება მიიღო ქვეყნის საფეხბურთო ასოციაციის აღმასკომმა და ეს ოფიციალური განცხადებითაც დაადასტურა.

მანამდე, სკალონი "ალბისელესტეში" დროებითი მწვრთნელის სტატუსით მუშაობდა. ამ რანგში, მისი ხელმძღვანელობით არგენტინის ეროვნულმა გუნდმა "კოპა ამერიკის" ნახევარფინალამდე მიაღწია, სადაც ბრაზილიასთან დამარცხდა, ხოლო III ადგილისთვის სკანდალურ მატჩში ჩილეს ნაკრებს მოუგო და ბრინჯაოს მედალს დასჯერდა.

მიუხედავად ამისა, არგენტინის საფეხბურთო ასოციაცია, ეტყობა, კმაყოფილი დარჩა სკალონის მუშაობით და გადაწყვიტა, მასთან კონტრაქტი 2022 წლის მუნდიალის ბოლომდე გაეფორმებინა. შესაძლოა, ამ გადაწყვეტილებაზე იმოქმედა ლიონელ მესის პოზიციამაც.

"კოპა ამერიკის" დასრულების შემდეგ მესიმ თქვა, რომ მზად არის, დარჩეს არგენტინის ნაკრებში და დაეხმაროს გუნდს ყატარის მუნდიალზე წარმატების მიღწევაში. მან იქვე დასძინა, რომ "ამ გუნდს მომავალი აქვს".

ჩანს, ეს იყო მთავარი სიგნალი არგენტინის საფეხბურთო ასოციაციის მაღალჩინოსნებისთვის. სამხრეთ ამერიკის ზონაში მუნდიალის შესარჩევი ციკლი მომავალი წლის მარტში დაიწყება.

242
მკითხველის კომენტარები / 0 /
მსგავსი ამბები
რუბრიკის სხვა სიახლეები
;