ლოგიკური და მშვიდობიანი დღე

თბილისის სპორტის სასახლეში გრძელდება მოჭიდავეთა საქართველოს ჩემპიონატი. დღეს შეჯიბრების მესამე დღე იყო, რომელმაც მშვიდად ჩაიარა და გამოვლინდნენ მედალოსნები კიდევ 7 წონით კატეგორიაში, პარალელურად კი გაირკვნენ ფინალისტები 6 წონაში.

ფინალურ ბლოკში ბერძენ-რომაელთა შორის 60 კილოგრამში ფინალური შეხვედრა არ გაიმართა: ტრავმის გამო აჭარის ნაკრების წევრმა გიზო მელაძემ ვერ შეძლო საჭიდაოდ გასვლა თანაგუნდელ რამაზ სურმანიძესთან. მეორე აჭარულ ფინალში რამაზ ზოიძემ (72) დამაჯერებლად და სუფთად, 8:0 მოუგო ოლიმპოიურ პრიზიორ შმაგი ბოლქვაძეს. ახალ წონაში გადასული ბოლქვაძე მსაჯებმა თავიდან პასიურობისტვის ქულით დასაჯეს და ჩოქბჯენშიც ჩააყენეს, რითაც ჩინებულად ისარგებლა ზოიძემ და ზედიზედ სამჯერ დაატრიალა. ამდენად, ანგარიში 7:0 გახდა, თუმცა ბოლქვაძის სამწვრთნელო შტაბმა ეპიზოდი გააპროტესტა, რაც მსაჯებმა არ დააკმაყოფილეს და წესისამებრ, ერთი ქულა ზოიძეს დაუმატეს.

ამ ფინალს ჰგავდა მძიმე წონის ფინალიც, სადაც პასიურობისთვის მსაჯებმა ევროპის მედალოსანი ლევან არაბული იაკობ ქაჯაიასთან პაექრობაში ქულით დასაჯეს და ჩოქბჯენში დააყენეს, ქაჯაიამ კი ორჯერ დაატრიალა და 5:0 დაწინაურდა. პირველ პერიოდში ანგარიში აღარ შეცვლილა, მეორეში კი პასიურობისთვის უკვე ქაჯაია დასაჯეს ქულით და დაბლაც ჩააყენეს, მაგრამ არაბულმა ვერ დაატრიალა, ანგარიში კი 5:1 დარჩა. მოგვინებით ქაჯაიამ ისევ გადაიყვანა და 2 ქულაც დაუმატეს, თუმცა ეპიზოდი არაბულის მწვრთნელებმა გააპროტესტეს, რაც მსაჯებმა დააკმაყოფილეს, ქაჯაიას 2 ქულა ჩამოაკლეს და მან საბოლოოდ 5:1 იმარჯვა.

ბერძენ-რომაელთა მეოთხე ფინალში ახალგაზრდებში მსოფლიოს სამტრედიელმა ჩემპიონმა გიორგი მელიამ მათე სოფაძეს 4:1 მოუგო. სცენარი აქაც დაახლოებით იგივე იყო: სოფაძე პასიურობისთვის ქულით და ჩოქბჯენით დაისაჯა, მელიამ კი დაატრიალა და 3:0 დაწინაურდა. ამ მონაგარს მეტოქეებმა მერე თითო ქულაც დაუმატეს, მელია კი პირველად გახდა ქვეყნის ჩემპიონი.

მოულოდნელობები არც თავისუფალი სტილით მოჭიდავეთა შორის მომხდარა და ფავორიტებმა იოლად გაიმარჯვეს. განსაკუთრებით - მსოფლიოს ორგზის ჩემპიონმა გენო პეტრიაშვილმა (125) და მსოფლიოს ფინალისტმა ბექა ლომთაძემ (61). ლომთაძემ ტექნიკის, სისწრაფისა და გამოცდილების ხარჯზე ადვილად დაჩაგრა თეიმურაზ ვანიშვილი - 10:0, პეტრიაშვილმა კი სულაც 1.30 წუთში 11:0 აჯობა როლანდ ანდრიაძეს. პეტრიაშვილმა თავის სტილში მოიგო - ფეხიდან აყვანით მეტოქე იოლად ჩააგდო დაბლა, სადაც ზედიზედ სამჯერ დაატრიალა: 8:0. მოგვიანებით კიდევ ერთხელ აიყვანა ფეხიდან, თუმცა ანდრიაძე წრიდან გაექცა - 9:0, ამას კი მალევე მოჰყვა გენოს კიდევ ერთი გდება და 11:0.

დღეს წმინდად მხოლოდ 70 კილოგრამის ფინალი არ დასრულებულა, თუმცა მირზა სხულუხიამ 9:2 აჯობა გია ავალიანს, ანგარიში კი ყველაფერზე მიუთითებს.

ბერძნულ-რომაული ჭიდაობა
60 კგ.
1. რამაზ სურმანიძე; 2. გიზო მელაძე (ორივე - აჭარა); ნოდარ ოქრომჭედლიშვილი (თბილისი), ირაკლი ძიმისტარიშვილი (ოზურგეთი).
72 კგ.
1. რამაზ ზოიძე; 2. შმაგი ბოლქვაძე; 3. ოთარ აბულაძე (სამივე - აჭარა), ნიკოლოზ ჭიკაიძე (გარდაბანი).
97 კგ.
1. გიორგი მელია (სამტრედია); 2. მათე სოფაძე (ბაღდათი); 3. ალექსი ლოდია (ოზურგეთი), გივი თევდორაძე (ქუთაისი).
130 კგ.
1. იაკობ ქაჯაია (წყალტუბო); 2, ლევან არაბული (თბილისი); 3. სულხან ბუიძე (ქუთაისი), გიორგი ბარბაქაძე (გარდაბანი).

61 კგ.
1. ბექა ლომთაძე (ქუთაისი); 2. თეიმურაზ ვანიშვილი (გორი); 3. რამაზ თურმანიძე, თორნიკე ქათამაძე (ორივე - აჭარა).
70 კგ.
1. მირზა სხულუხია (ქუთაისი); 2. გია ავალიანი (სამტრედია); 3. ლევან ქელეხსაშვილი (ხაშური), დავით როდინაძე (აჭარა).
125 კგ.
1. გენო პეტრიაშვილი (გორი); 2. როლანდ ანდრიაძე (ხონი); 3. ალექსი ჟორჟოლიანი (ქუთაისი), მარადი ვანაძე (აჭარა).

ფინალური წყვილები
ბერძნულ-რომაული ჭიდაობა
63 კგ.
ლევან ქავჟარაძე (ოზურგეთი) - ლერი აბულაძე (აჭარა)
77 კგ.
დემურ ქავთარაძე (გარდაბანი) - ბექა მამუკაშვილი (გარდაბანი)
82 კგ.
ლაშა გობაძე (აჭარა) - გელა ბოლქვაძე (აჭარა)

თავისუფალი ჭიდაობა

57 კგ.
ლაშა ლომთაძე (ქუთაისი) - ოთარ გოგავა (ხონი)
74 კგ.
ავთანდილ კენჭაძე (ამბროლაური) - გიორგი სულავა (ქუთაისი)
დავით მარსაგიშვილი (ყაზბეგი) - ირაკლი მწითური (თბილისი)

845
მკითხველის კომენტარები / 0 /
მსგავსი ამბები
რუბრიკის სხვა სიახლეები
;