ლოკომოტივი დინამოს  და სიკაჩს მიმართავს... 

ქომაგებს კარგად ახსოვთ - 16 მაისს, თბილისის “დინამოსა” და “ლოკომოტივს” შორის მატჩში, დინამოელთა მეკარე სტეფან სიკაჩს საკუთარ საჯარიმოში, კარიდან გამოსვლისას, ფეხი დაუცდა და დაეცა, რის შემდეგაც “ლოკომოტივის” ნახევარმცველმა დავით სამურკასოვმა ცარიელ კარში გაიტანა გოლი.

ამ ეპიზოდში “დინამოს” მოლდაველმა მეკარემ სერიოზული ტრავმა მიიღო და შესაცვლელი გახდა. გულშემატკივრების ნაწილმა “ლოკომოტივი” და სამურკასოვი “ფეარ პლეის” (სამართლიანი თამაში) პრინციპების დარღვევაში დაადანაშაულა. საქართველოს ნაკრების მეკარე გიორგი ლორიამ ლაკონური პოსტიც გამოაქვეყნა - სად არის “ფეარ პლეიო”?..

ამის გამო “ლოკომოტივის” ადმინისტრაციამ საგანგებო განცხადება გამოაქვეყნა და მომხდარზე განმარტება გააკეთა.

“გვინდა, აღვნიშნოთ, რომ ამ დინამიურ ეპიზოდში “ლოკომოტივის” ნახევარმცველმა დავით სამურკასოვმა წესების სრული დაცვით იმოქმედა. მას არ შეუნიშნავს მეტოქე გუნდის გოლკიპერის ვარდნა, რომელიც ტრავმით იყო გამოწვეული და ყველაფერი წამის მეასედში მოხდა. აქვე, ჩვენი კლუბისა და ფეხბურთელების სახელით, ვაფიქსირებთ, რომ ზედმიწევნით ვიცავთ სამართლიანი თამაშის - “ფეარ პლეის” პრინციპებს და მომავალშიც აუცილებლად ასე იქნება. ვწუხვართ, რომ ზემოთ ხსენებული ეპიზოდი სტეფან სიკაჩის ტრავმით დასრულდა”, - წერია თბილისური კლუბის განცხადებაში. 

სიკაჩმა წინა ჯვარედინი იოგი დაიზიანა და ოპერაციის გაკეთება დასჭირდა. ბოლო ინფორმაციით, გამოცდილი მეკარე “დინამოს” მინიმუმ ნახევარი წელი მაინც ვერ დაეხმარება. 

თბილისის “დინამოს” მეკარე ამ შეხვედრის შემდეგ ანკარაში გაემგზავრა, სადაც მისმა ოპერაციამ წარმატებით ჩაიარა. ფეხბურთელი რამდენიმე დღეში დაბრუნდება და რეაბილიტაციის პროცესს დაიწყებს. “ლოკომოტივი” მას ჯანმრთელობას უსურვებს:

“სიკაჩს თურქეთში ოპერაცია ჩაუტარდა, რომელმაც წარმატებით ჩაიარა. მთელი კლუბის სახელით, ვუსურვებთ სტეფანს მალე გამოჯანმრთელებასა და მოედანზე დაბრუნებას”. 

ყოველდღიური სპორტული გაზეთი "ლელო"
512
მკითხველის კომენტარები / 0 /
მსგავსი ამბები
რუბრიკის სხვა სიახლეები
;