'ლოკომოტივი'-'დინამო' 4:4 - დრამატული დერბი ვაკეში

ლოკომოტივი-დინამო 4:4 დდ
პენალტებით 3:5

13.06. თბილისი. მიხეილ მესხი (სათ)
0:1 ძალამიძე (4), 0:2 ივანისენია (38), 1:2 კიკაბიძე (48), 2:2 არდაზიშვილი (83. ჯიქიას პასით), 2:3 კიტეიშვილი (87), 3:3 გავაშელიშვილი (90. გვალიას პასით), 3:4 ბაბუნაძე (99), 4:4 არდაზიშვილი (120+2)

პენალტების სერია: 0:1 კიტეიშვილი, 1:1 სამურკასოვი, 1:2 თოთაძე, 1:2 ნ. ჭანტურია (მეკარე), 1:3 შულაია, 2:3 გვალია, 2:4 ნინუა, 3:4 კობახიძე, 3:5 ივანისენია

ლოკომოტივი (4-2-3-1): შეროზია - გაბაძე, ნ. ჭანტურია, ლობჟანიძე, უბილავა - ძებნიაური (76. სამურკასოვი), ცნობილაძე (46. გვალია) - გავაშელიშვილი, კიკაბიძე (65. არდაზიშვილი), კობახიძე - ჯიქია (105. კომახიძე).
მწვრთნელი: ლაშა ჭაღიაშვილი

დინამო (4-2-3-1): ბულისკერია - რუხაია, თოთაძე, ლოჩოშვილი, კობოური - კუცია (70. ნინუა), ივანისენია - ივანიშვილი (26. შულაია), ძალამიძე (46. ო. კიტეიშვილი), ხარაბაძე - ერგემლიძე (91. ბაბუნაძე).

მწვრთნელი: კახა კაჭარავა
გაფრთხილება: გაბაძე (29), ივანისენია (65), შულაია (78), ჭანტურია (92), სამურკასოვი (95), უბილავა (100), ნინუა (103), კობახიძე (105), გავაშელიშვილი (116), ბულისკერია (119)
არბიტრი: გ. ვადაჭკორია

საქართველოს დავით ყიფიანის სახელობის თასის მეთექვსმეტედფინალურ შეხვედრებში დამაინტრიგებელი და საინტერესო შეხვედრები იყო. მაგრამ ბოლო წლებში გამორჩეულად სანახაობრივი და თასისთვის ზედგამოჭრილი მატჩი "მიხეილ მესხის" სათადარიგო მოედანზე გაიმართა.

"ლოკომოტივისა" და "დინამოს" დაპირისპირებაში 8 გოლი გავიდა, მათ შორის - არაორდინალურები და ძალიან ლამაზებიც. თამაში 120 წუთი გაგრძელდა და არბიტრმა ყვითელი ბარათი 10-ჯერ გამოიყენა, გამარჯვებული კი პენალტების სერიაში გამოვლინდა, რაც სათასო მატჩებს განსაკუთრებულ ხიბლს ჰმატებს...

დინამოს ტაიმი

პირველ ტაიმში "დინამომ" ორბურთიანი უპირატესობა მოიპოვა. არადა, მოვლენების ასეთ განვითარებაზე არაფერი მიუთითებდა. პირველი გოლი ნიკა ძალამიძემ არაფრისგან შექმნა: მეკარეს დაურტყა, მოგერიებულ ბურთს წაქცეული თავით (?!) მისწვდა და მიხეილ ერგემლიძეს უპასა. "დინამოს" თავდამსხმელმა ძლიერად ვერ დაარტყა, თუმცა ძალამიძემ მეკარესა და მცველს შორის მოქცეულ ბურთს ფეხი წაჰკრა და - 0:1.

მე-18 წუთზე, დავით ჯიქიას გათანაბრება შეეძლო, მაგრამ დიმიტრი ბულისკერიამ ახლო მანძილიდან აუღო და დინამოელები გადაარჩინა. "დინამოს" უპირატესობის გაზრდა ერგემლიძეს შეეძლო, მაგრამ მეკარესთან პირისპირ გასულმა ლუკა შეროზიას ვერ აჯობა.

სამაგიეროდ შანსით დმიტრო ივანისენიამ ისარგებლა: უკრაინელი ნახევარმცველი საჯარიმოსთან ლოკომოტიველებს იოლად გაექცა და მოჭრილი დარტყმით კარის ბადე მეორედ შეარხია - 0:2.

კახა კაჭარავას გუნდი შესვენებაზე სოლიდური ანგარიშით დაწინაურდა და ერთი შეხედვით, ყველაფერი გარკვეული და გადაწყვეტილი იყო.

ლოკომოტივს დაუფასდა

თუმცა ლაშა ჭაღიაშვილის გუნდმა მეორე ნახევარში მდგომარეობის გამოსწორება მოახერხა. ლუკა კიკაბიძემ სხვაობა ძალიან ეფექტური გოლით შეამცირა: მარჯვენა ფლანგიდან მეკარე ბულისკერია მოძრაობაზე დაიჭირა და ჩაწოდების ნაცვლად, კუთხურის სიახლოვიდან ბურთი კარში გაუშვა - 1:2.

საგოლე მომენტები დინამოელებმაც შექმნეს, მაგრამ ვერ გამოიყენეს და ამისთვის დაისაჯნენ კიდეც: ორ-ორჯერ შეეძლოთ გატანა ლევან ხარაბაძესა და ოთარ კიტეიშვილს, მაგრამ შეროზია საიმედოდ იდგა.

ბოლო ათ წუთში მოვლენები საოცარი სცენარით განვითარდა: 83-ე წუთზე, ლაშა გვალიას დარტყმულ ბურთს რატი არდაზიშვილმა თავი დაახვედრა და ანგარიში გაათანაბრა - 2:2.

დარჩენილ 7 წუთში კიდევ ორი გოლი ვიხილეთ: საჯარიმოსთან კიტეიშვილს მცველებმა ხელი არ შეუშალეს და მისი გასროლის შემდეგ "ლოკომოტივის" კარის ბადე მესამედ შეირხა - 2:3.

მასპინძლებმა ბოლო წამამდე იბრძოლეს და ეს მონდომება 90-ე წუთზე დაუფასდათ: ჯარიმიდან საჯარიმოში ჩაკიდებული ბურთი უჩა ლობჟანიძის თავურის შემდეგ მამია გავაშელიშვილს მიუგორდა, რომელმაც ძირითადი დრო ფრედ დაასრულა - 3:3.

პინგ-პონგი და პენალტები

დამატებული ტაიმები არანაკლებ საინტერესოდ წარიმართა. ლაშა თოთაძემ ჯარიმიდან უძლიერესად გაისროლა, ლობჟანიძეს მოხვდა და შეცვლაზე შესულმა თამაზ ბაბუნაძემ "დინამოს" ფორმით სადებიუტო გოლი გაიტანა - 3:4.

დამატებული წუთები დასასრულს უახლოვდებოდა, როდესაც "ლოკომოტივმა" დაახლოებით 35 მეტრიდან ჯარიმის დარტყმის უფლება მოიპოვა. ყველა ელოდა, რომ არდაზიშვილი ბურთს საჯარიმოში ჩაკიდებდა, მან კი დაარტყა, ბულისკერიას ახლო კუთხეში გაუტანა და თამაში პენალტების სერიაში გადაიყვანა - 4:4.

ჯარიმა პირველად კიტეიშვილმა გამოიყენა, გადამწყვეტი კი "ლოკომოტივის" მეორე პენალტი გამოდგა - ნიკა ჭანტურიას ბულისკერიამ აჯობა. მერე დამრტყმელებს აღარ გაუფუჭებიათ. გამორჩეულად ეფექტური იყო ოთარ კობახიძის შესრულებული "პირლო". ბოლო დარტყმა კი ივანისენიამ შეასრულა და "დინამო" შემდეგ წრეში გაიყვანა 3:5.

ყოველდღიური სპორტული გაზეთი "ლელო"
1212
მკითხველის კომენტარები / 0 /
მსგავსი ამბები
რუბრიკის სხვა სიახლეები
;