ლოკომოტივმა დაადასტურა: მთავარი მწვრთნელის პოსტზე სოსო ფრუიძე იმუშავებს

lelo.ge-მ უკვე გაცნობეთ,რომ მთავარი მწვრთნელის პოსტზე ლევან კორღალიძის შემცვლელს თბილისის "ლოკომოტივი" ორშაბათს, 30 მარტს დაასახელებდა. ჩვენ გვქონდა ინფორმაცია, რომ ერთ-ერთი ყველაზე რეალური კანდიდატი იყო სოსო ფრუიძე - 62 წლის სპეციალისტი, რომელიც ბოლო 12 წლის განმავლობაში საჩხერის "ჩიხურაში" მუშაობდა...

გუშინ "ლოკომოტივმა" ჩვენი ინფორმაცია დაადასტურა: "ლოკომოტივს" ახალი მთავარი მწვრთნელი ჰყავს. წლის ბოლომდე გუნდი გამოცდილმა სპეციალისტმა, სოსო ფრუიძემ ჩაიბარა.

სოსო ფრუიძე ქართულ ფეხბურთში საკმაოდ ცნობილი მწვრთნელია. მისი სამწვრთნელო კარიერა 1994 წლიდან დაიწყო. ყველაზე დიდი დრო კი, ფრუიძემ საჩხერის "ჩიხურაში" გაატარა, სადაც 2008 წლიდან მუშაობდა და იმერული კლუბი მხოლოდ მიმდინარე სეზონის დაწყებამდე დატოვა. წარმატებებს ვუსურვებთ ბატონ სოსოს "ლოკომოტივთან" ერთად", - ვკითხულობთ "ლოკომოტივის" ოფიციალურ განცხადებაში.

* * *

2007 წელს, საქველმოქმედო ფონდ "ქართუს" დაფინანსებით, საჩხერეში დაიწყო ფეხბურთის გამოცოცხლება და ამ პროცესს სწორედ ფრუიძე ხელმძღვანელობდა. ამავე პერიოდში დაარსდა "ჩიხურას" აკადემია, გადამზადდნენ ვეტერანი საჩხერელი ფეხბურთელები (C, B, A, PRO სამწვრთნელო ლიცენზია), ჩამოყალიბდა სამედიცინო შტაბი და დღემდე კლუბის აკადემიაში რეგულარულად 450 ბავშვზე მეტი ვარჯიშობს.

ფრუიძემ ჩამოაყალიბა ბრძოლისუნარიანი "ჩიხურა", რომელიც 2011 წლიდან საქართველოს ჩემპიონატის უმაღლეს ლიგაში თანამედროვე ქართული ფეხბურთის ფლაგმანად იქცა, რაზეც ნათლად მეტყველებს საჩხერელთა მიერ დაკავებული პოზიციები ეროვნულ ჩემპიონატში: "ჩიხურა" იყო ვიცე-ჩემპიონი, სამჯერ ითამაშა თასის ფინალში (2017 წელს გაიმარჯვა), ხოლო ორჯერ - სუპერთასზე (2013 წელს გაიმარჯვა).

ამ დროის განმავლობაში "ჩიხურას" ყველაზე დაბალი პოზიცია ეროვნულ ჩემპიონატში იყო მე-5 ადგილი. "ჩიხურა" სულ 6-ჯერ გავიდა ევროტურნირზე. მადლიერების ნიშნად, სოსო ფრუიძე 2017 წელს საჩხერეს საპატიო მოქალაქედ აირჩიეს.

1559
მკითხველის კომენტარები / 0 /
მსგავსი ამბები
რუბრიკის სხვა სიახლეები
;