ლოკომოტივს ახალი პარტნიორები ჰყავს - 'ლოკომოტივის” მთავარი ფასეულობაა წარმატებით იფუნქციონიროს როგორც მინდორზე, ისე მის გარეთ'

“ლოკომოტივი” სეზონის მეოთხე მატჩისთვის მზადებას განაგრძობს. თბილისურ დერბიში ლაშა ჭაღიაშვილის გაწვრთნილები 17 მარტს თბილისის “დინამოს” დაუპირისპირდებიან...

ზუკა დავითაშვილის სიტყვები გამართლდა: ის “ლოკომოტივს” დაუბრუნდა. Welcome back Zuka - ასე გამოეხმაურა თბილისური კლუბი 18 წლის ნიჭიერი მოთამაშის გუნდის რიგებში ხელმეორედ ჩარიცხვას.

ფეხბურთელსა და კლუბს შორის 1-წლიანი ხელშეკრულება გაფორმდა. დავითაშვილი “ლოკომოტივს” 2018 წელს თბილისის “დინამოდან” შეუერთდა. 2018 წლის სეზონში მან 19 შეხვედრა ჩაატარა, გაიტანა 3 გოლი და 2 საგოლე გადაცემა მიითვალა. შეგახსენებთ, რომ დავითაშვილი 2019 წლის დასაწყისში ყაზანის “რუბინში” ისინჯებოდა, გუნდთან ერთად შეკრებაც გაიარა და მთავარი მწვრთნელის ყურბან ბერდიევის სიმპათიაც დაიმსახურა, თუმცა მხარეები კონტრაქტზე ვერ შეთანხმდნენ და ზუკა საქართველოში დაბრუნდა.

ამასობაში, “ლოკომოტივში” ბევრი მნიშვნელოვანი ამბავი მოხდა. ასე მაგალითად, მცირე ხნის წინ კლუბი ერთ-ერთი ტელევიზიის პარტნიორი გახდა. მაგრამ ეს რეკლამად ჩაგვეთვლებოდა და ვერ გავაშუქეთ. კლუბში კი გაკვირვებულები არიან - ქართულმა კლუბმა ახალი პარტნიორი რომ შეიძინა, ამის გაშუქება რატომ არ შეიძლება?

ახლაც იგივე ხდება: ბოლო რამდენიმე დღის განმავლობაში “ლოკომოტივმა” სპონსორებისა და პარტნიორების მოძებნის რეკორდი დაამყარა, რაც კლუბის კარგ მუშაობაზე მეტყველებს და ჩვენ კვლავ ზოგადი ინფორმაციებით შემოვიფარგლებით. “ლოკომოტივის” პარტნიორი შვედური ბრენდის წყალი გახდა, რომელიც გამდიდრებულია სხვადასხვა ჯგუფის ვიტამინებითა და მინერალებით, გაზიანი და შაქრის შემცველი სასმელების ჯანსაღი ალტერნატივით - ეს კი ყველა კლუბს სჭირდება. კიდევ ერთი პარტნიორი კვების ობიექტი გახდა, რომელიც ფეხბურთელებს მატჩების შემდეგ უგემრიელესი პიცით ძალების აღდგენაში დაეხმარება.
ყველაზე სერიოზული ამბავი კი ახლახან მოხდა: ერთ-ერთ ბანკთან “ლოკომოტივის” თანამშრომლობა გაოფიციალურდა და პარტნიორობის შესახებ მემორანდუმი გაფორმდა. ეს ითვალისწინებს საფეხბურთო კლუბის ფინანსურ მხარდაჭერას და ახალგაზრდა, პერსპექტიული ფეხბურთელებისთვის შესაფერისი სავარჯიშო პირობების შექმნას.

“ქართული ფეხბურთის განვითარებაში ბანკის ჩართულობა სასიხარულოა. კიდევ უფრო სასიხარულია მისი სურვილი, გულშემატკივარი სტადიონზე მოიზიდოს. ჩვენთვის, ფეხბურთელებისთვის, ეს დამატებითი მოტივაციაა, რათა სტადიონზე მოსული ადამიანები ხარისხიანი ფეხბურთით ვასიამოვნოთ”, - ამბობს “ლოკომოტივის” ფეხბურთელი ნიკა ჭანტურია.

“ლოკომოტივის” მთავარი ფასეულობაა წარმატებით იფუნქციონიროს როგორც მინდორზე, ისე მის გარეთ. ვფიქრობ, დღევანდელი დღე დასტურია იმისა, რომ სწორი მიმართულებით მივდივართ. ფეხბურთში კერძო სექტორის ჩართულობა უმნიშვნელოვანესია და იმედი მაქვს, ეს პრეცედენტი კარგი მაგალითი იქნება სხვა კომპანიებისთვისაც. მოხარული ვარ, რომ ბანკის სახით ძლიერ და, რაც ყველაზე მნიშვნელოვანია, ჯანსაღი ცხოვრების წესის მხარდამჭერ ორგანიზაციას დავუმეგობრდით. მასთან თანამშრომლობით, ფინანსური სარგებელის გარდა, გავიჩენთ უფრო მეტ გულშემატკივარს. ყველა ვთანხმდებით, რომ ფეხბურთი გულშემატკივარს ეკუთვნის და მათი სტადიონზე დაბრუნება ჩვენთვის უმთავრესი პრიორიტეტია”, - ეს “ლოკომოტივის” პრეზიდენტ ლექსო თოფურიას სიტყვებია.

ბანკის წარმომადგენლების თქმით, მათი არსებობის ისტორიაში ეს პირველი დიდი მასშტაბის პროექტია, რითაც სურთ, ხელი შეუწყონ ქართული ფეხბურთის განვითარებას და ჯანსაღი ცხოვრების წესს. პლუს, მიზანია, რომ თბილისის “ლოკომოტივის” ყოველი თამაში საზოგადოების ყურადღების ცენტრში მოექცეს და ამ პროცესში ბანკი მაქსიმალურად ჩაერთოს.

ჩვენს ფეხბურთს სწორედ ასეთი პარტნიორები და მიდგომები სჭირდება. შესაძლოა, თითო ამ პარტნიორობიდან მაქსიმუმ კლუბმა 10-20 ათასი ლარის სარგებელი ნახოს, მაგრამ გასათვალისწინებელია პატარა ევროპული ქვეყნების გამოცდილება. უეფას მედიაოფიცერი მამუკა კვარაცხელია დანიური “სილკებორგის” მაგალითს იხსენებდა - კლუბს 120 სპონსორი ჰყავდა, ზოგი მათგანი 10 ათასი ევროთი ეხმარებოდა, ზოგი - 20-ით და ზოგიც 50 ათასით. მაგრამ ჯამში ამ სპონსორებისგან 2-დან 3 მილიონ ევრომდე გროვდებოდა, რაც კლუბისთვის დიდი შეღავათი იყო. ამიტომაა “ლოკომოტივის” აქტიურობა დასაფასებელი, რომ პარტნიორული ყულაბა კლუბს დაეხმარება, ხოლო სხვებისთვის ეს სქემა მაგალითი იქნება - შესაძლოა, მილიონიანი პარტნიორი ვერ ნახო, მაგრამ გამოსავალი მაინც არსებობს.

სამწუხაროდ, “ლოკომოტივის” და ქართული ფეხბურთის სივრცეში მსგავსი ფინანსური საკითხების სრულად გაშუქების უფლებას არსებული უაზრო კანონმდებლობა გვიკრძალავს - იმიტომ, რომ ეს რეკლამად ჩაგვეთვლება. ანუ ის, რაზეც განვითარებული მსოფლიო დგას, აქ მიუღებელია. ფეხბურთით დაინტერესებული ორიოდე კომპანია თუ გამოჩნდა, მათი აქტიურობა სწორედაც რომ უნდა გამოჩნდეს და დაფასდეს, სხვებისთვის მაგალითად რომ იქცეს. სხვაგვარად, ფეხბურთში რა ინტერესი შერჩებათ?

წარმოიდგინეთ, ლიონელ მესიმ “ადიდასთან” კონტრაქტი რომ გააფორმოს და ამის გაშუქებას მოერიდონ. მაშინ რისთვის აფორმებენ კონტრაქტს, ეძებენ პარტნიორებსა და სპონსორებს, თუ მთელ მსოფლიოში დადგენილი სქემით რეკლამამ არ იმუშავა და ორივე მხარემ არ ისარგებლა? ამ უვარგის კანონებს თუ დროულად არ შევცვლით, ბევრი საქმე გაფუჭდება და არა მხოლოდ ფეხბურთის.

ყოველდღიური სპორტული გაზეთი "ლელო"
680
მკითხველის კომენტარები / 0 /
მსგავსი ამბები
რუბრიკის სხვა სიახლეები
;