ლომაძის ისტორია: პოდიუმიდან ციხემდე [VIDEO]

ჯერ გიორგი შაქარაშვილის იდუმალი გარდაცვალებით გამოწვეული ვნებათაღელვა არ მინავლებულა და ქართულ სპორტში მორიგმა სკანდალმა იფეთქა. მის ეპიცენტრში ბერძნულ-რომაულ ჭიდაობაში ევროპის წლევანდელი ვიცე-ჩემპიონი იური (ირაკლი) ლომაძე (72) და მისი ძმა, ფეხბურთელი ლაშა ლომაძე აღმოჩნდნენ თავიანთ არასპორტსმენ ბიძაშვილებთან ერთად. მათ ბრალი ადამიანის გატაცებაში და თავისუფლების უკანონო აღკვეთაში ედებათ, რაც 2-დან 10 წლამდე პატიმრობას ითვალისწინებს. იური ლომაძე ამჟამად 2-თვიან წინასწარ პატიმრობაში იმყოფება...

საქმეს, რომელიც ბოლო რამდენიმე დღეა, საქართველოში ერთ-ერთ ყველაზე უფრო რეზონანსულად იქცა, იმდენად მყვირალა კვალიფიკაცია მიეცა, ევროპის ვიცე-ჩემპიონი სერიოზული მაფიოზური დაჯგუფების წევრი გეგონებათ, სინამდვილეში კი ოჯახური კონფლიქტია თავისი მძლავრი ანარეკლით: ბიძაშვილების ზემოხსენებული ბრალდებები სიძის მისამართით წაუყენეს. გავრცელებული ინფორმაციით, საბიძაშვილო თავისი მამიდაშვილის უფლებებს იცავდა, რომელსაც მეუღლესთან მწვავე კონფლიქტი ჰქონდა... 

რაკიღა საქმე ოჯახურ უსიამოვნებასა და სხვის პირად ცხოვრებას ეხება, ამიტომ ჩვენს ხელთ არსებული გარკვეული ინფორმაციის გასაჯაროებას მოვერიდებით, საქმის არსზე კი ორიოდე სიტყვით გეტყვით: მოარული ხმებით, ცოლ-ქმარს შორის მომხდარი მორიგი მწვავე კონფლიქტისას ცოლმა დასახმარებლად ბიძაშვილებს დაურეკა, რომლებმაც სიძეს - ნ.ძ-ს ბათუმში ჩააკითხეს, ფიზიკურადაც გაუსწორდნენ, მერე კი მანქანაში ჩასვეს და ოზურგეთის მუნიციპალიტეტის სოფელ ბოხვაურში წაიყვანეს სიმამრთან ბოდიშის მოსახდელად... ვიმეორებთ, რომ ეს ყველაფერი მოარულ ხმებს ეყრდნობა, რომელთა სისწორეზეც თავს ვერ დავდებთ, თუმცა სოციალურ ქსელებში მომხდარის რამდენადმე განსხვავებული ვერსიაც ვრცელდება. სამაგიეროდ, თითქმის დადასტურებულადაა ცნობილი (ყოველ შემთხვევაში - ეს ვერსია აქტიურად მუსირებს) ამ ოჯახური კონფლიქტის დასასრული: ცოლ-ქმარი შერიგდა, ამ ამბიდან ხუთიოდ დღეში კი სიძემ ცოლის ნათესავებს სასამართლოში უჩივლა... მთელ ამ ტრაგედიაში (სხვას ვერაფერს დავარქმევთ მომხდარს, რადგან ამან, შეიძლება, ძალიან ნიჭიერი სპორტსმენის კარიერა შეიწიროს) ყველაზე უცნაურიც ეს გარემოებაა - ან შერიგება რა იყო, ან - ჩივილი?

ზემოთაც ვთქვით, რომ ამბავი ძალზე პირადულ-ოჯახურია და მის დეტალებში ჩაღრმავებას არც ვცდილობთ, თუმცა ამან შეიძლება, ძალიან ნიჭიერი სპორტსმენის კარიერა ფრიად აზარალოს, თუ საერთოდ არ შეიწიროს; ამასთან, საქმე ხუთ ახალგაზრდას ეხება, რომლებსაც დღეს ციხე და სასჯელი ემუქრებათ... იური ლომაძე სხვანაირი მენტალობის მოჭიდავე რომ იყოს, გული არც დაგვწყდებოდა, მაგრამ მას ვინც იცნობს, დაგვეთანხმება, რომ კრიმინალისგან შორსაა და კარგად გაზრდილი ბიჭია. კომუნიკაბელური და უბრალო ადამიანი ცხოვრებაშიც ისეთივე გამორჩეულია დადებითი თვისებებით, როგორიც ხალიჩაზეა - თავისი გამორჩეული ტექნიკით და ულამაზესი საჭიდაო სტილით. დასანანია, რომ ასეთი ადამიანი ასეთ შარში გაეხვია, რომელმაც არა მარტო ჩრდილი მიაყენა მის პიროვნებას, არამედ მის კარიერასაც დანგრევით დაემუქრა. რაც ინფორმაციები მოვიძიეთ, ის და მისი ბიძაშვილები ღირსების დასაცავად ირჯებოდნენ, თუმცა აშკარად ჯობდა, ეს სხვა, გაცილებით უფრო ცივილური ფორმებით გაეკეთებინათ. ფაქტობრივად, ახლა ისიც, მისი ძმაც და მათთან ერთად დაპატიმრებული კიდევ სამი მათივე ახალგაზრდა ნათესავი იმ ოჯახური ძალადობის მსხვერპლი გახდნენ...

არადა, როცა იური ლომაძე ქართულ საჭიდაო არენაზე შემოიჭრა ამ სიტყვის პირდაპირი მნიშვნელობით, ვინ იფიქრებდა, სულ მალე ასეთ შარში თუ აღმოჩნდებოდა გარეული! სამწუხაროდ, ლომაძე გამორჩეული მარტო საჭიდაო ხალიჩაზე არ გამოდგა...

მისი ჭიდაობის სტილი და მრავალფეროვანი ტექნიკური არსენალი კი მართლაც აღტაცებას იწვევს არა მხოლოდ ქართველებში, არამედ - მთელ მსოფლიოში, მის მეტოქეებშიც კი. „ეგვიპტელ ფარაონად“ წოდებული კარამ მოჰამედ გაბერ იბრაგიმის მსგავსად ხომ მანაც ახალი სული შთაჰბერა არა მარტო ბერძნულ-რომაული სტილის, არამედ სრულიად ჭიდაობის მინავლებულ ყოფას და წარმოუდგენელი სილამაზით ააკაშკაშა სპორტის ეს უძველესი სახეობა: მის მიერ შესრულებულ გდებებს მეტოქეებიც კი ტაშს უკრავდნენ, რადგან ეს ჭიდაობაზე მეტი იყო, სპორტული შოუ იყო... სადაც კი გამოსულა, რომელ ტურნირზეც, უღიმღამოდ არასოდეს უჭიდავია. უღიმღამოდ კი არა, ყოველთვის ბლომად აგროვებდა ქულებს, ბლომად აკეთებდა ერთიმეორეზე ულამაზეს ილეთებს, იშვიათი გამონაკლისის გარდა, ყველა შეხვედრას ვადამდე, წმინდად იგებდა და ხშირად ისეც მომხდარა, ერთ პაექრობაში ორჯერ შეუსრულებია 4-ქულიანი გდება.

თუმცა, ისიც უნდა ითქვას, რომ შარში აქამდეც გაეხვია, როცა ორი წლის წინ დოპინგზე ჩავარდა და ევროპის ჩემპიონატის ბრინჯაოს მედალი ჩამოართვეს... იმ ტურნირს დაღესტნის ქალაქმა კასპიისკმა უმასპინძლა, ლომაძეს კი ამ რანგის შეჯიბრებაზე დებიუტი ჰქონდა ეროვნულ ნაკრებში. ფართო საჭიდაო აუდიტორიამ პირველად სწორედ იქ მიადევნა თვალი მისი ტალანტის სიკაშკაშეს, მე კი იმ ტურნირიდან სწორედ მესამე ადგილისთვის ბრძოლას გამოვარჩევ მოლდოველ დანიელ კატარაგასთან - ისეთი გდებები გაუკეთა, ისე ახეთქა ლეიბს, მოლდოველი ლამის პენსიაზე გავიდა. თუმცა სწორედ მაშინდელ სინჯებში აღმოჩნდა აკრძალული ნივთიერების კვალი - როგორც გაირკვა, მან ტკივილგამაყუჩებელი მიიღო ექიმთა დაუკითხავად, რომელიც აკრძალულ ნივთიერებას შეიცავდა. თუმცა მისი დოზა იმდენად მცირე იყო, მსოფლიოს ფედერაციას ლამის მიავიწყდა მისი დოპინგი. ის მხოლოდ მაშინ გაახსენდათ, როცა ამის შესახებ... საქართველოდან დაისვა შეკითხვა...

მაშინ ლომაძე შედარებით ხანმოკლე დისკვალიფიკაციით დასაჯეს, 2019 წლიდან კი ისევ ჩერთო საერთაშორისო შეჯიბრებებში. მეორე ევროპულ წარმატებას წლეულს ეზიარა, როცა რომში გამართულ კონტინენტის პირველობაზე კვლავაც გრიგალივით გადაუარა მეტოქეებს. თანაც, საკმაოდ ძლიერებს: სერბთა ოლიმპიურსა და მსოფლიოს ჩემპიონ დავორ სტეფანეკს, ბელარუს იური კანკოუს, ხორვატ ევროპის პრიზიორ დომინიკ ეტლინგერს და თურქთა მომავალ ბრინჯაოს მედალოსან სელჯუკ ჯანს. რომში მან მხოლოდ ფინალური პაექრობა დათმო გერმანელთა სამგზის მსოფლიოსა და ევროპის ჩემპიონ ფრენკ სტაბლერთან.

იმედია, ლომაძეს კვლავაც მალე ვიხილავთ ჩვეულ ამპლუაში ანუ საჭიდაო ხალიჩაზე.

3090
მკითხველის კომენტარები / 2 /
S.K.K.
2
მე არ ვიცი სინამდვილეში რა მოხდა, მაგრამ ეს ბიჭი ნამდვილად გამოირჩევა ჩვენი ჯმუხი ქართველი მოჭიდავეებიგან არა მარტო გარეგნობით არამედ ჭიდაობის ლამაზი სტილით და ინტელექტით. რომ ვნახე ეს კოლაჟი ისევ შემოვბრუნდი ზე-მომაბეზრებელი ჭიდაობისკენ, განსაკუთრებით კლასიკურის. ერთხელ მაინც გამაბედნიერეთ და დადეთ.
მოქალაქე
4
ჩამოერთვას ტიტულებიც!!!
მსგავსი ამბები
რუბრიკის სხვა სიახლეები
;