ლომთაძე, კენჭაძე და პეტრიაშვილი ალანების ფინალში

ვლადიკავკაზში გუშინ დაიწყო თავისუფალი სტილით მოჭიდავეთა საერთაშორისო ტურნირი - "ალანები", რომლის ფინალშიც სამი ქართველი გავიდა: ბექა ლომთაძე (61), ავთანდილ კენჭაძე (74) და გენო პეტრიაშვილი (125).
ევროპისა და მსოფლიოს ვიცე-ჩემპიონმა ლომთაძემ ფინალამდე რუსებს მოუგო: ნურგუნ ალექსანდროვს 4:0 აჯობა, მაგომედრასულ იდრისოვს 6:4 მოუგო, ნახევარფინალში ალექსანდრ ბოგომაევს 7:7-ზე აჯობა, ფინალში კი დღეს, 18 საათიდან რუს რამაზან ფერზალიევს დაეჭიდება.

წინასწარ შეხვედრებში მსოფლიოს ვიცე-ჩემპიონმა კენჭაძემაც რუსებს მოუგო, ოღონდ მან ოთხი მეტოქე დაამარცხა: აჰმედ შოკუმოვთან 4:0 იმარჯვა, კახაბერ ხუბეჟტის წმინდად, 11:0 სძლია, მაგომედ დიბიგრაჯიევს - 4:2, ხოლო ნახევარფინალში მაგომედხაბიბ კადიმაგომედოვს - 7:3. ფინალში ჩვენებური ასევე რუს კენჭაძე - ასევე რუს ტიმურ ბიჟოევს შეხვდება.

მსოფლიოს ორგზის ჩემპიონმა პეტრიაშვილმა რუსებთან ქულებით იმარჯვა, თუმცა პირველ შეხვედრაში ოსტაპ პასენოკთან თუ 5:0 მოიგო, ვიტალი გაგლოევს 12:4 სძლია. ნახევარფინალში პირველივე პერიოდში წმინდად, 10:0 დაამარცხა ამერიკელი რობერტ ნელსონი, ფინალში კი მეტოქედ ირანელ ჯაბერ ტაგი სადესადე ეყოლება.

ამათგან დასამახსოვრებელი ორთაბრძოლა მოიგო ლომთაძემ ბოგომაევთან, ვისაც რევანში აუღო ევროპული თამაშების ფინალში მარცხისთვის. საგულისხმოა, რომ ჩვენებურს ორჯერ ჩაურთეს პასიურობისთვის 30-წამიანი, მაგრამ ორივეჯერ მედგრად შეუტია და აუღო ქულები. ამათგან პირველი გადამწყვეტიც აღმოჩნდა - ფეხიდან აყვანილი 4-ქულიანზე გადააგდო, მერე კიდევ 3 ქულა დაუმატა, მერე კი დროის გაყვანაზე დაიწყო ჭიდაობა და კინაღამ დაისაჯა - ბოგომაევმა ანგარიში გაათანაბრა, მაგრამ ლომთაძეს რაკი 4-ქულიანი გდება ჰქონდა, მოგებაც მას დარჩა.

ასევე აღსანიშნავია კენჭაძის გამარჯვება ხუბეჟტისთან - წონის ერთ-ერთ ლიდერთან, და პეტრიაშვილის გამარჯვება ამერიკელთან, ვისაც ერთი ამოსუნთქვით მოუმთავრა საქმე - ჩოქბჯენში ჩაყვანილი მანამ ატრიალა, ვიდრე წმინდა მოგება არ დააფიქსირა.

814
მკითხველის კომენტარები / 0 /
მსგავსი ამბები
რუბრიკის სხვა სიახლეები
;