ლუდი "აისი" რაგბის კავშირისა და "ბორჯღალოსნების" სპონსორი გახდა

კომპანია "გლობალ ბიარ ჯორჯიას" პროდუქცია ლუდი "აისი", 2018 წლის თებერვლიდან საქართველოს რაგბის კავშირისა და "ბორჯღალოსნების" ოფიციალური ლუდი გახდა. ამ კომპანიასა და საქართველოს რაგბის კავშირს შორის ორწლიანი სასპონსორო ხელშეკრულება "ავჭალის" სარაგბო სტადიონზე გაფორმდა.

პროცედურას საქართველოს ნაკრების მორაგბეები და მათი დამრიგებელი მილტონ ჰეიგი ესწრებოდნენ.

ლუდი "აისი" რაგბის კავშირისა და "ბორჯღალოსნების" სპონსორი 2019 წლის ბოლომდე იქნება.

"სიხარულით მინდა გაცნობოთ, რომ თიბისი ბანკის შემდეგ, ლუდი "აისი" რაგბის კავშირისა და "ბორჯღალოსნების" ერთ-ერთი ძირითადი სპონსორი გახდა. ჩვენი პარტნიორობა და მეგობრობა მინიმუმ ორი წელი, 2019 წლის მსოფლიო თასის დასრულებამდე გაგრძელდება" - თქვა საქართველოს რაგბის კავშირის პრეზიდენტმა გოჩა სვანიძემ.

შოთა ხობელია, "ჯიბიჯის" გენერალური დირექტორი:
"ჩვენთვის დიდი პატივია ქართული რაგბის გვერდში დგომა და დიდი გამოწვევაა ვიყოთ ქვეყნის ყველაზე წარმატებული გუნდის "ოფიციალური ლუდი". ჩვენი და საქართველოს რაგბის კავშირის ერთობლივი მიზანია, საზოგადოებაში რაგბის პოპულარიზაცია და ნაკრების მატჩის დღის, როგორც დღესასწაულის მნიშვნელობის გაზრდა.

ეროვნული ნაკრების ყოველი თამაში გულშემატკივრისთვის უკვე გამარჯვების დღეა და სწორედ ამის პოპულარიზაციას შევეცდებით მომდევნო წლების განმავლობაში.

საამისოდ, გავიზიარებთ საუკეთესო საერთაშორისო პრაქტიკას და დავნერგავთ გულშემატკივრობის ახალ ტრადიციას, როგორიცაა თითოეულ თამაშზე "დღის საუკეთესო მოთამაშის" და "დღის საუკეთესო გულშემატკივარის" დასახელება.

განსაკუთრებული მოლოდინი გვაქვს 2019 წლის მსოფლიოს თასის მიმართ. ჩვენ მაქსიმუმს გავაკეთებთ, რათა ამ შეჯიბრების მიმდინარეობისას საქართველოში განსაკუთრებული სადღესასწაულო განწყობა შეიქმნას, რომელიც გულშემატკივრებს გააერთიანებს".

ყოველდღიური სპორტული გაზეთი "ლელო"
1616
მკითხველის კომენტარები / 0 /
მსგავსი ამბები
რუბრიკის სხვა სიახლეები
;