ლუის ვან გაალი: მაშინ მანჩესტერმა  გამყიდა!.. 

“მანჩესტერ იუნაიტედის” ყოფილმა დამრიგებელმა ლუის ვან გაალმა განაცხადა, რომ ისეთი შეგრძნება აქვს, თითქოს, მაშინ ის კლუბმა... გაყიდა.

ლეგენდარული ჰოლანდიელი ამაში განსაკუთრებით “იუნაიტედის” აღმასრულებულ დირექტორ ედ ვუდვორდს ადანაშაულებს. ეს ის ვუდვორდია, ვისთან ურთიერთობის გაფუჭებასაც მოჰყვა ჟოზე მოურინიოს წასვლა “ოლდ ტრაფორდიდან...

ლუის ვან გაალმა ორი წელი გაატარა “მანჩესტერ იუნაიტედში”. მან თავის ბოლო შეხვედრაში ინგლისის თასი მოიგო, მაგრამ საბოლოო ჯამში მაინც დაუთმო ადგილი ჟოზე მოურინიოს. ვან გაალი ჟოზეს არ უწყრება. ის გაბრაზებულია ვუდვორდზე, რომელიც მოურინიოს მის ზურგსუკან მოელაპარაკა.

“მაშინ მე ისეთი შეგრძნება მქონდა, რომ, უბრალოდ, გამყიდეს. ბევრი ადამიანისგან მოვისმინე, რომ უკვე დეკემბერ-იანვარში ყველაფერი გადაწყვეტილი იყო. ვუდვორდთან ყოველ კვირას მქონდა საუბარი. როცა დეკემბერში ვიწვნიეთ სამი მტკივნეული მარცხი და გამოვვარდით ჩემპიონთა ლიგიდან, მე მას ვუთხარი - ყველაფერი მესმის, შეგიძლია, თანამდებობიდან გამიშვა-მეთქი. ისეთი გუნდი, როგორიც “მანჩესტერ იუნაიტედია”, არ უნდა აგებდეს ზედიზედ სამ მატჩს...

მაშინ მან მე სიტყვასიტყვით მითხრა: “არა, არასოდეს. მე შენ არასოდეს არ გაგათავისუფლებ. გქონდეს საკუთარი თავის რწმენა და ნუ კითხულობ გაზეთებს”.

ასეთ ვითარებაში როცა აღმოჩნდები, შეიძლება იფიქრო, რომ გაგყიდეს. ახლა მე მესმის მისი. მან იცოდა, რომ შემდეგ სეზონში მაინც წავიდოდი. ამასთან, მოურინიო ეძებდა სამუშაოს. ვუდვორდმა იფიქრა, რომ ხელში ჩაიგდო ტოპმწვრთნელი...

ისიც მესმის, რატომ სურდა მოურინიოს “მანჩესტერის” სათავეში ჩადგომა. ჩემი აზრით, ეს ინგლისში ყველაზე მაღალი სამწვრთნელო პოსტია. სანამ “მანჩესტერს” დაველაპარაკებოდი, ჩემთან სასტუმროში მოლაპარაკებებზე მეჯდა მისტერ დანიელ ლევი, რომელმაც “ტოტენჰემის” მწვრთნელობა შემომთავაზა.

მაშინ ჩემს მეუღლეს ვუთხარი კიდეც, რომ “ტოტენჰემს” უკეთესი ფეხბურთელები ჰყავდა, ვიდრე “იუნაიტედს”. ბოლოს მაინც ეს უკანასკნელი ავირჩიე, რადგან მე ყოველთვის ქვეყნის ნომერ პირველ კლუბს ვწვრთნი...

ძალიან ცუდად გამაგდეს. მომწონს ინგლისი ხალხისა და კულტურის გამო. იქ არის ბევრი იუმორი და ადამიანები ბოლომდე უჭერენ მხარს ერთმანეთს. ყველას მადლობა, ვინც მხარს მიჭერდა”, - უთხრა ვან გაალმა “გარდიანს”.

ყოველდღიური სპორტული გაზეთი "ლელო"
680
მკითხველის კომენტარები / 0 /
მსგავსი ამბები
რუბრიკის სხვა სიახლეები
;