ლუკა ბულაშვილი გალისიაში, ბურჯანაძის გზაზე: მწვრთნელი თამაშს ჩემზე აწყობს

ლუკა ბულაშვილი კარიერას კვლავ ესპანეთში განაგრძობს. იგი გალისიაში, ქალაქ ლა კორუნიას გუნდ "ბალონცესტო კუიერედოში" ითამაშებს.

ლუკა უკვე ესპანეთშია და აქტიურად ემზადება ახალი სეზონისთვის. ჩვენც სწორედ ესპანეთში დავუკავშირდით.

თავდაპირველად დავინტერესდით, რატომ დატოვა "გრან კანარია", რომელშიც გასულ სეზონში თამაშობდა.

- "გრან კანარია" ევროლიგის გუნდია. ამ სეზონის წინ შემადგენლობა საგრძნობლად გაძლიერდა, ჩამოიყვანეს ევროლიგის დონის ლეგიონერები. კანარის კუნძულებზე რომ დავრჩენილიყავი, პირველ გუნდში კი ვივარჯიშებდი, მაგრამ მეორეში ვითამაშებდი. "გრან კანარიას" მეორე გუნდი კი არ იყო ისეთი სიძლიერისა, რომ ჩემს დარჩენას აზრი ჰქონოდა.

- რა იყო მთავარი მიზეზი, რამაც "კუიერედოში" გადასვლა გადაგაწყვეტინა?

- შეთავაზებები მქონდა რიგით მეორე, ოქროს ლიგიდანაც, მაგრამ იმ ლიგაშიც ბევრი ლეგიონერია და წინასწარ რთული განსასაზღვრი იყო, რამდენი წუთი მერგებოდა სათამაშოდ. მინდოდა ისეთ კლუბში გადასვლა, სადაც დრო საკმარისი მექნებოდა და შესაძლებლობებს კარგად გამოვავლენდი. სწორედ ამიტომ ავირჩიე "კუიერედო". იგი ებას ლიგაზე ასპარეზობს, შემადგენლობაც კარგია და მწვრთნელიც ბოლომდე მენდობა. მინდა, ამ სეზონში სტატისტიკაც კარგი მქონდეს, რომ გაისად უკეთეს ლიგაში ვითამაშო.

- ესპანეთში სექტემბრის მეორე ნახევარში ჩახვედი. საკონტროლო მატჩებში რას ატყობ, მიაღწევ დასახულ მიზანს?

- რამდენიმე ამხანაგური მატჩი გავმართეთ. ერთში 29 ქულა ჩავაგდე, მეორეში 30, მესამეში - 34. იმედი მაქვს, გუნდიც წარმატებულად ითამაშებს და ებას ლიგაზე სასურველი შედეგები გვექნება. ჩვენს კლუბს ახლო კავშირი აქვს უმაღლესი ლიგის წარმომადგენელ გალისიურ კლუბებთან, "ლუგოსთან" და "ბურგოსთან", კარგი თამაში აქაურებს მხედველობის არედან არ გამორჩებათ.

- რომელ პოზიციაზე გათამაშებს და რას გეუბნება მწვრთნელი?

- გამთამაშებელი ვარ, შეიძლება ითქვას, მწვრთნელი თამაშს ჩემზე აწყობს, თავისუფლებას მაძლევს. საერთოდ, პლეიმეიქერობა ძალიან მომწონს, ბურთი შენ გაქვს და უფრო იოლია აჩვენო, რა შეგიძლია.

- საქართველოს ნაკრებშიც გამოგიძახეს...

- მწვრთნელმა ილიას ზუროსმა პირველად ივნის-ივლისის მატჩებისთვის გამომიძახა. გუნდთან ერთად სექტემბერშიც ვვარჯიშობდი, თუმცა 12-კაციან განაცხადში ვერ მოვხვდი. ჩემთვის ეროვნული გუნდის წევრებთან ვარჯიში და თამაში ძალიან ბევრს ნიშნავს. დამატებითი სტიმულია - კიდევ უფრო მონდომებული ვარ, რომ შემდეგ ჯერზე 12-კაციან განაცხადში მოვხვდე.

ჩვენი მხრიდან დავძენთ, რომ ოთხი წლის წინ ბექა ბურჯანაძეც სწორედ სათამაშო პრაქტიკისა და შესაძლებლობების გამოსავლენად გადავიდა გალისიურ კლუბ "კორუნიაში", ოქროს ლიგის ერთ-ერთ საუკეთესო კალათბურთელად ჩამოყალიბდა და უმაღლესლიგურ "ანდორაშიც" კარგად მომზადებული გადავიდა... გალისია ბულაშვილსაც ტრამპლინად სჭირდება..."

ყოველდღიური სპორტული გაზეთი "ლელო"
801
მკითხველის კომენტარები / 0 /
მსგავსი ამბები
რუბრიკის სხვა სიახლეები