ლუკა ბულაშვილი - მიზანი ნაკრებია 

ამ სეზონის წინ "გრან კანარიაში" ჩაირიცხა 17 წლის ქართველი უკანახაზელი ლუკა ბულაშვილი.

იგი თამაშობს, როგორც ება-ს ლიგაზე, ასევე ესპანეთის 22-წლამდელთა ჩემპიონატში. ლუკას კანარებზე დავუკავშირდით და იქაური ამბები გამოვკითხეთ.

- "გრან კანარიასთან" სამწლიანი კონტრაქტი გავაფორმე, რომელიც 1+1+1 ტიპისაა. ვვარჯიშობ უმაღლესი ლიგის გუნდთან ერთად და ვთამაშობ, ება-ს ლიგასა და ესპანეთის 22-წლამდელთა ჩემპიონატში. 

- რომელ პოზიციაზე გათამაშებენ?

- ძირითადად გამთამაშებლად. თუმცა, თუ სიტუაციას დასჭირდა, მსროლელის ფუნქციებსაც ვასრულებ. ასეა, როგორც 22-წლამდელთა პირველობაზე, ისე ება-ს ლიგაზე.მყავს მწვრთნელი, რომელიც ინდივიდუალურად მავარჯიშებს პლეიმეიქერისთვის საჭირო თვისებებზე.

ასევე ვემზადები ტრენაჟორებზე, დიდ ყურადღებას ვაქცევ სამქულიან ტყორცნებს. დღეში დაახლოებით 6 საათი მიწევს ვარჯიში. ნამდვილად არ ვიღლები, რადგან მაქვს ჩემი მიზანი და მინდა მას მივაღწიო.

- მიზანი, ალბათ, ესპანეთის ჩემპიონატის უმაღლეს ლიგაში თამაშია...

- რა თქმა უნდა. ეს და საქართველოს ნაკრებში მოხვედრა. ამ სეზონში "გრან კანარიაში" ვითამაშებ, მომავალი სეზონიდან კი "ოქროს ლიგის" რომელიმე გუნდში გამანათხოვრებენ, სადაც შევეცდები იმის დამტკიცებას, რომ "გრან კანარიას" პირველი გუნდისთვის მზად ვარ და მომდევნო სეზონიდან ისევ კანარებზე დავბრუნდები.

- პირველ გუნდს კარგი სეზონი აქვს, თუმც ვერ ვიტყვით, რომ ვარსკვლავებითაა გაჭედილი...

- ესპანეთის ჩემპიონატის პარალელურად ევროთასზე ასპარეზობენ. ამ შეჯიბრების მოგებასაც აპირებენ, რომ მომდევნო წელს ევროლიგაზე ითამაშონ. ასე რომ, სერიოზული ამბიციები აქვთ. კარგი მწვრთნელი გვყავს და გუნდიც მშვენივრადაა აწყობილი.

- ყველაზე მეტად ვის დაუახლოვდი?

- ალბერტ ოლივერი გამოცდილი გამთამაშებელია. კარგი პიროვნებაა, ძალიან ჭკვიანი.... ვარჯიშებზე ყოველთვის გვერდში მიდგას და გამოცდილებას მიზიარებს. 

- საქართვლოს ნაკრები ახსენე, როგორ ფიქრობ, რამდენად მზად ხარ?

- ეროვნულ გუნდში თამაში ყველა კალათბურთელისთვის საამაყოა. მათ შორის ჩემთვისაც. დიდი სურვილი მაქვს, ნაკრებში მოვხვდე და გუნდს, მაქსიმალურად დავეხმარო.

თუმცა ისიც მესმის, რომ მხოლოდ მოთამაშის სურვილი საკმარისი არ არის, მთავარია, მწვრთნელის შეხედულება. თუკი შანსი მომეცემა, ვეცდები სათანადოდ გამოვიყენო.

ყოველდღიური სპორტული გაზეთი "ლელო"
611
მკითხველის კომენტარები / 0 /
მსგავსი ამბები